Awa Pangɔ Kwa 15 - Fana Ngbangɔ 1987

Lo ti fangɔ ganza

¹ Ambanga azi alo ka sese ti Yudea agwe ka Antiɔsɛ. Ala lɔ ha azi ti Eklezia mɛ kai na ye ya: “Se ta ĩ fa ganza nga ma se ko ndo Mɔizɛ alu na ndia tɛ lo ma ko, ta Nzapa aso ĩ ma.”

² Polo na Barnabasi ĩ ma so ko, ala kɛ̃ tɛnɛ ni ko, la ala na azi ko ato nda bimbingɔ tɛnɛ kpengbani na popo tɛ la. Azi ti Eklezia ti Antiɔsɛ ĩ hũ so ko, ala pa hɛ̃ Polo, na Barnabasi, nga na ambanga azi ti Eklezia ti Antiɔsɛ mɛ ndɛ̃ ya: “Ĩ nɔ ka Yeruzalɛmɛ, wa ĩ na awa pangɔ kwa tɛ Yezo, nga na akangba ti Eklezia ĩ tɛnɛ tɛnɛ na lo ni.”

³ La azi ti Eklezia ti Antiɔsɛ ato la ka Yeruzalɛmɛ. Ala fangbi ti lɛ sese ti Fenisia na ti Samaria. Ngoi mɛ ala so ndogwe ko, ala so ndopa hɛ̃ azi se mɛ azi mɛ ta Ayuda ma agbinya na bɛ la, la ala ti azi tɛ Nzapa. Awa Kristo ĩ ma so ko, bɛ la ade sĩ.

⁴ Ngoi mɛ ala ĩ si kai ko, awa pangɔ kwa tɛ Yezo, na akangba, nga na ambanga azi ti Eklezia ti Yeruzalɛmɛ ayamba la nzɔ̃ni. Ko Polo na Barnabasi akambisa lo zu mɛ Nzapa ali ti ndo la.

⁵ La ambanga Afarizeo mɛ aye lo tɛ Yezo alonga ndozu, apa ya: “Azi ko la ta Ayuda ma ko, ale afa la ganza, ko ahɛ̃ nyɔ hɛ̃ la ya, ala tɔndɔ ndia tɛ Mɔizɛ.”

⁶ Awa pangɔ kwa tɛ Yezo, na akangba ti Eklezia agwe lingo so bangɔ nda tɛnɛ ni ko.

⁷ Ala ĩ bimbi tɛnɛ ngbĩi ko, Petro alo ndozu, apa hɛ̃ la ya: “Aya bua, ĩ hĩnga nzɔ̃ni ya, Nzapa asara ndo mbi na popo tɛ ĩ gã ya, mbi pa Nzɔ̃ Pa tɛ ni hɛ̃ azi mɛ ta Ayuda ma, ya ala ma ni, wadila ala ye lo tɛ Yezo Kristo.

⁸ Ko Nzapa mɛ ahĩnga dangɔ bɛ tɛ azi zu ndofa hɛ̃ la ya, bɛ ni aye la. E hĩnga ni, na lo mɛ ya, lo hɛ̃ ndo la Tɔrɔ Santo nga ma se mɛ lo hɛ̃ na ni hɛ̃ e.

⁹ E na azi ko zu ka lɛ Nzapa bo kwɛ kɔi. Nzapa akpo bɛ la ati vuruni na lo mɛ ya, ala ye lo tɛ lo.

¹⁰ Na olo ko, ĩ ndotara be Nzapa, ta sanga ma, ĩ separa hɛ̃ngɔ awa yengɔ lo tɛ lo kota kumba mɛ ta e na akotara e zu, e lengbi ti yɔngɔ ni ma.

¹¹ Kanda e hĩnga tɛ e ya, e so na lo nzɔ̃ bɛ tɛ Gbia tɛ e Yezo, kwɛ kɔi nga ma se mɛ ala so na ni.”

¹² Na pɛ tɛnɛ tɛ Petro ko, azi akai ngĩi so mangɔ Barnabasi na Polo. Ala ndopa lo ti aye ti kpɛnɛ zu, nga na lo ti akukuna ye mɛ ndo ala li na gbɛlɛ azi mɛ ta Ayuda ma, na lo nguru mɛ Nzapa ahɛ̃ la.

¹³ Ngoi mɛ ala ĩ kɔ nda tɛnɛ tɛ la wɛ ko, Zaki apa hɛ̃ azi ya: “Aya bua, í ma mbi hĩ!

¹⁴ Simɔ apa hɛ̃ ĩ se mɛ ndo Nzapa abi lɛ lo uzu na ndo azi mɛ ta Ayuda ma ya, ni sara ambanga azi na popo tɛ la, wa ala du azi tɛ ni.

¹⁵ Se mɛ ndo awa pangɔ nyɔ Nzapa aha nga na ni la. Ta sanga ma, Buku tɛ Nzapa anɛ ya:

¹⁶ ‘Gbia apa ndo ya, Na pɛ ye olo ko, mbi na gangɔ gesi. Da mɛ ndo Davidi awa, la akara ko, Mbi na diringɔ wangɔ ni. Mbi na yangɔ da mɛ ndɛ̃ na panda oko ndo akara, Ko mbi na wangɔ ni ya,

¹⁷ Azi mɛ ndɛ̃ zu mɛ ta Ayuda ma, Na azi ti lɛ sese zu mɛ mbi ili la ya, Ala du azi tɛ mbi ko, ala hũ ni, wa ala gi lege tɛ Gbia.

¹⁸ Se nyɔ Gbia ndo la, lo nvɛni ndo la lo fa aye ni ko na azi gã.’ ”

¹⁹ Zaki apa nga ndo ya: “Se adu mbi ko, ale ta ahɛ̃ pɛnɔ hɛ̃ azi mɛ ta Ayuda ma, wadila ala gbinya bɛ la, ati azi tɛ Nzapa.

²⁰ Wa é su mbɛti, é to hɛ̃ la, ko é pa hɛ̃ la ya, ta ala tɛ sa mɛ aho, alu na angbilondo ma, ta ala li asiɔ ye ti kamɛnɛ ma, ta ala tɛ sa mɛ andosã gɔ̃ ni sangɔ wa aho ma, ta ala tɛ bere anyɔ mɛnɛ tɛrɛ sa ma.

²¹ Ta sanga ma, ndo gã na ngoi tɛ akotara e ko, awa tɔndɔngɔ nda ndia tɛ Mɔizɛ ndodu da na ya kɔdɔrɔ kɔi kɔi, ko ngoi zu na lá ti wɔngɔ tɛrɛ ko, andodi ndia ni na ya da sambela.”

Azi ti Eklezia ti Yeruzalɛmɛ ato mbɛti ka Antiɔsɛ

²² Awa pangɔ kwa tɛ Yezo, na akangba ti Eklezia, nga na azi ti Eklezia kwɛ zu amangbi ya, ani sara ambanga azi na popo tɛ ani, ko ato la ka Antiɔsɛ, ndoni kɔi na Polo nga na Barnabasi. La ala hã Silasi na Yudɛ mɛ mbanga ili lo la Barnabasi. Ala kwɛ zu adu azi ti ndima na popo tɛ afɔ̃ la mɛ ndɛ̃.

²³ La asu mbɛti, ahɛ̃ Barnabasi na Silasi ya, ala nɔ na ni ka Antiɔsɛ. Tɛnɛ mɛ asu ka ya mbɛti ni lo mɛ: “E awa pangɔ kwa tɛ Yezo, na akangba ti Eklezia, nga na azi ti Eklezia mɛ ndɛ̃ zu, e bala ĩ ayata e mɛ ta ĩ Ayuda ma, ĩ mɛ azi ti Eklezia ti Antiɔsɛ, na ti Siria, nga na ti Silisia.

²⁴ E ma ya, azi alo ge tɛ e anɔ ka tɛ ĩ, agia ya li ĩ, ko bɛ ĩ angbã ngbũ na ndo tɛnɛ mɛ ala tɛnɛ hɛ̃ ĩ. Ko ta e la e to la ma.

²⁵ Nda mɛ e kwɛ zu e mangbi ya, e hã ambanga azi, e to la ka tɛ ĩ la. Ala na nɔngɔ ndoni kɔi na Barnabasi nga na Polo mɛ ala afɔ̃ e ti kpɔ̃ bɛ e.

²⁶ Angbã yakere ndo azi aho la, na lo ti kwa mɛ ala ndoli hɛ̃ Gbia tɛ e Yezo Kristo.

²⁷ E to Yudɛ na Silasi ka tɛ ĩ ya, tɛnɛ mɛ e su ka ya mbɛti ko, ala nvɛni apa nga hɛ̃ ĩ na nyɔ la.

²⁸ Ta sanga ma, adu nzɔ̃ni ka lɛ Tɔrɔ Santo, nga ge lɛ e ya, ale ta e hɛ̃ ĩ kumba mɛ ndɛ̃ na ndo aye olo ma, wa ĩ ba aye ni ko lo mɛ:

²⁹ ta ĩ tɛ sa mɛ aho, alu na angbilondo ma, ta ĩ tɛ bere ĩ nyɔ mɛne tɛrɛ sa ma, ta ĩ tɛ sa mɛ andosa gɔ̃ ni sãngɔ, wa aho ma, ta ĩ li asiɔ ye ti kamɛnɛ ma. Wa se ĩ zia lingɔ asiɔ ye ni zu ko, ĩ li nzɔ̃ni. Wa ĩ ngba nzɔ̃ni o!”

³⁰ Ngoi mɛ asu mbɛti ni wɛ ko, amu ni, ahɛ̃ Yudɛ na Silasi, la ala gwe na ni ka Antiɔsɛ. Yudɛ na Silasi ĩ si kai ko, ala sɔrɔ awa Kristo kwɛ zu, abombi la ndoni kɔi, amu mbɛti ni, ahɛ̃ la.

³¹ Awa Kristo ĩ di mbɛti ni, ĩ ma tɛnɛ mɛ asu ka ya ni ko, bɛ la ade sĩ, la nguru agbɔ̃ nga la.

³² Yudɛ na Silasi mɛ nga awa pangɔ nyɔ Nzapa, atɛnɛ ndo tɛnɛ ma wo ma hɛ̃ awa Kristo ya, ani sa nguru bɛ la, ko ani kpengba nga na la.

³³ Yudɛ na Silasi alá ndo kai bi gba. Na ngoi ti diringɔ tɛ la ko, awa Kristo azei la ya, ala diri nzɔ̃ni. La ala hɛ̃ lege hɛ̃ Yudɛ na Silasi ya, ala diri ka tɛ awa tongɔ la na kwa. [

³⁴ Kanda Silasi aye tɛ lo ndo ya, ni ngbã ka Antiɔsɛ.]

³⁵ Ngoi mɛ ndo Polo na Barnabasi adɛ ka Antiɔsɛ ko, ala na ambanga azi ma wo ma apa ndo lo tɛ Gbia hɛ̃ azi, ala ha nga ndo la na tɛnɛ tɛ lo.

Popo tɛ Polo na Barnabasi akangbi

³⁶ Ĩ la so pɛni yakere ko, Polo apa hɛ̃ Barnabasi ya: “É diri na ya kɔdɔrɔ kɔi kɔi mɛ ndo e pa na tɛnɛ tɛ Gbia da, é ba awa Kristo, é ba nga se mɛ ala ndoli na kwa tɛ la.”

³⁷ Barnabasi aye ya, ni na Polo, nga na Yoanɛ mɛ mbanga ili lo la Marko, ani gwe kwɛ zu ndoni kɔi.

³⁸ Ko Polo akɛ̃ ya, oko Marko adɔ ndo ani ka Pamfilia azia, ta ani na lo ĩ kɔ nda kwa ma ko, ta ani na lo ĩ gwe ndoni kɔi ma.

³⁹ Ala bimbi ndo tɛnɛ kpengbani, na lo ni la popo tɛ la akangbi. La Barnabasi amu Marko, ala fa ngu, asi ka ya zúa ti Siprɛ.

⁴⁰ Kanda Polo aye tɛ lo ndo ya, adu Silasi wa ni na lo ani ɔ ndoni kɔi. Awa Kristo asambela Gbia Nzapa ya, lo li nzɔ̃ bɛ hɛ̃ la. Sambela ni ĩ wɛ, la Polo na Silasi aha nɔ agwe.

⁴¹ Ala fangbi ti lɛ sese mɛ ili ni la Siria, nga na ti Silisia. Ngoi mɛ ala so ndogwe ko, ala so ndopa tɛnɛ tɛ Gbia hɛ̃ azi ti Eklezia ya, nguru agbɔ̃ la.