Awa Pangɔ Kwa 14 - Fana Ngbangɔ 1987

Polo na Barnabasi asi ka Ikɔniɔmɛ

¹ Polo na Barnabasi ĩ si ka kɔdɔrɔ ti Ikɔniɔmɛ ko, ala li nga ka ya da sambela tɛ Ayuda. Na lo ti tɛnɛ mɛ ndo ala tɛnɛ la Ayuda gba, na azi sĩni mɛ ta Ayuda ma aye lo tɛ Yezo.

² Kanda Ayuda mɛ ndo akɛ̃ yengɔ lo tɛ Yezo, awa azi mɛ ta Ayuda ma, Ĩa ala du na siɔ dangɔ bɛ na ndo Polo na Barnabasi.

³ Polo na Barnabasi ala ndo so Ikɔniɔmɛ bi gba. Ala ndopa ndo tɛnɛ tɛ Gbia Yezo na kpengba bɛ, ko ala ndokpã ndo nga bɛ la ndo lo sĩ. Gbia Yezo afa ndo na azi ya, tɛnɛ mɛ Polo na Barnabasi ndotɛnɛ na lo ti nzɔ̃ bɛ tɛ ni ko, adu biani. Lo fa ndo ni na ngoi mɛ lo hɛ̃ la nguru, la ala li na akukuna ye, nga na aye ti kpɛnɛ.

⁴ Popo tɛ azi ti kɔdɔrɔ ko akangbi sɛ: ambanga aye lo tɛ Ayuda, ambanga mɛ ndɛ̃ aye lo tɛ Polo na Barnabasi.

⁵ Ayuda na azi mɛ ta Ayuda ma, nga na agbia tɛ la alɛkɛ ndo tɛrɛ la ya, ani sɔ Polo na Barnabasi, ani boroka la na tɛ́nɛ, ko ani ho la.

⁶ Polo na Barnabasi ĩ hũ so ko, ala kpɛlɛ agwe ka kɔdɔrɔ ti Listrɛ na ti Dɛrbɛ. Akɔdɔrɔ ni ko zu sɛ ndodu ka sese ti Likaonia. Ala gwe ka kɔdɔrɔ mɛ na tɔ̃ sese ti Likaonia,

⁷ ala pa nga ndo Nzɔ̃ Pa kai.

Polo na Barnabasi asi ka Listrɛ

⁸ Ka kɔdɔrɔ ti Listrɛ ndo ko, mbanga kɔli kɔi da, gɛrɛ lo zu sɛ azɛ̃. Lo zɛ̃ na ngoi mɛ ndo adú na lo, ko ta lo ndodɔ ndo nɔ fani kɔi ma.

⁹ Lo ndoma ndo tɛnɛ mɛ Polo ndotɛnɛ. Polo aba lo toka toka, ko Polo ahũ ya, kɔli ko akpa bɛ lo ndo ni ya, ni sara lo.

¹⁰ La Polo apa hɛ̃ lo na kɔngɔ ya: “Lo ndozu na gɛrɛ mɔ!” Kɔli ko adɔ alo, ahulu azunda, ato nda dɔngɔ nɔ.

¹¹ Azi ko hingo hingo ĩ hũ ye mɛ Polo ali ko, ala dɛrɛ kɔngɔ na yanga tɛ la ti Likaonia ya: “Ae, anzapa amu tɛrɛ azi, azu ge tɛ e!”

¹² Ala ndoili ndo Barnabasi ya Zeusi, ko ala ndoili ndo Polo ya Ɛrmɛsi, na lo mɛ ya, Polo ndo la ndopa tɛnɛ hɛ̃ azi.

¹³ Nganga nzapa mɛ andoili lo ya Zeusi, lo na da tɔrɔ tɛ lo ka nyɔ kɔdɔrɔ, lo gbɔ̃nɔ ndo ato bagara mɛ asa abilo ti kasa pandara na gɔ̃ la, lo ga na la ka nyɔ kɔdɔrɔ. Lo na azi mɛ agbe so ndo ko hingo hingo aye ndo ya, ani lu abagara ni na Barnabasi na Polo.

¹⁴ Ko ngoi mɛ Barnabasi na Polo ĩ hũ so ko, ala suru bɔngɔ tɛ la nvɛni, so fangɔ na azi ko ya, ta ani ye lo ti ye mɛ ala separa lungɔ na ani ma, la ala nɔ hiɔ, ali ka popo tɛ azi ko, adɛrɛ kɔngɔ ya:

¹⁵ “Akwa, nda mɛ ĩ li nga so nɛ? E du azi nga ma ĩ. E ga so pangɔ Nzɔ̃ Pa hɛ̃ ĩ ya, e wa ĩ na nzɔ̃ wangɔ, wa ĩ zia vɔrɔngɔ agɛgɛrɛ angbilondo, ko ĩ gbinya bɛ ĩ, ĩ ti azi tɛ Nzapa mɛ le lo ngɛ̃. Lo la lo li yayu, na sese, na ngu, nga na aye kwɛ zu.

¹⁶ Ndo gã ko, lo zia ndo azi ti lɛ sese zu ya, ala vɔrɔ anzapa nga ma se mɛ bɛ la aye.

¹⁷ Kanda lo ndofa ndo tɛrɛ lo ngoi zu hɛ̃ azi na lege ti anzɔ̃ ye mɛ lo ndoli. Lo ndohɛ̃ ĩ ngu ti ndozu, lo ndoli ya, ĩ lua tɛ ka yaka na ngoi mɛ alengbi. Lo ndohɛ̃ ĩ tɛ ti tɛngɔ, lo ndosa nga dengɔ bɛ na bɛ ĩ.”

¹⁸ Kanda Polo na Barnabasi atɛnɛ ndo tɛnɛ tɛrɛ la asɔ, la azi azia lungɔ la na abagara ni.

¹⁹ Ayuda alo ka kɔdɔrɔ ti Ikɔniɔmɛ, na ti Antiɔsɛ mɛ ka sese ti Pizidia aga. Ala tɛnɛ tɛnɛ siɔni na ili Polo hɛ̃ azi, ko azi ayeka, la Ayuda aboroka Polo na tɛnɛ ya, ani ho lo. So pɛni, ala giɔ Polo kpururu so ya kɔdɔrɔ asi na ni, ta sanga ma, ala ndoda ndo bɛ la ya, lo kpi we.

²⁰ Kanda ngoi mɛ awa Kristo ĩ bombi tɛrɛ la so tɔ̃nda lo ko, lo lo ndozu, lo diri ka ya kɔdɔrɔ. Ĩ la bu nda ĩ de ko, lo na Barnabasi ahã nɔ, agwe ka kɔdɔrɔ ti Dɛrbɛ.

Polo na Barnabasi adiri ka Antiɔsɛ mɛ ka sese ti Siria

²¹ Polo na Barnabasi apa ndo Nzɔ̃ Pa ka kɔdɔrɔ ti Dɛrbɛ, ndo mɛ ndo azi sĩni aye na lo tɛ Yezo da la. So pɛni, ala diri ka kɔdɔrɔ ti Listrɛ, na ti Ikɔniɔmɛ, nga na ti Antiɔsɛ mɛ ka sese ti Pizidia.

²² Ala sa ndo nguru bɛ awa Kristo, awa la ya, ala kpã bɛ la ngoi zu ndo Yezo. Polo na Barnabasi apa ndo hɛ̃ la ya: “Ale e hũ pɛnɔ sĩ, wa e si ka Kɔdɔrɔ Gbia tɛ Nzapa.”

²³ Na ya Eklezia kɔi kɔi ko, Polo na Barnabasi asara ndo akangba akpã la ya, ala bata azi ti Eklezia. Ala ĩ kɛ̃ tɛ so vɔrɔngɔ Nzapa, ala ĩ sambela Nzapa wɛ ko, ala zia akangba ni na yamba ti Gbia Yezo mɛ ndo ala ye lo tɛ lo, ya lo bata la nzɔ̃ni.

²⁴ So pɛni, ala fangbi ti sese ti Pizidia, la ala si ka sese ti Pamfilia.

²⁵ Ala pa ndo tɛnɛ tɛ Nzapa ka kɔdɔrɔ ti Pɛrgɛ, so pɛni, ala gwe ka kɔdɔrɔ ti Atalia.

²⁶ Ala lo so ndo ko, agwe na masua ka Antiɔsɛ, kɔdɔrɔ mɛ ndo awa Kristo ahũnda Nzapa da ya, lo li nzɔ̃ bɛ hɛ̃ Polo na Barnabasi, na ya kwa mɛ ala na lingɔ ni. Ko na olo ko, ala li kwa ni ko wɛ.

²⁷ Ala ĩ si ka Antiɔsɛ ko, ala bombi azi ti Eklezia, apa hɛ̃ la alo zu mɛ Nzapa ali ti ndo la, apa nga hɛ̃ la se mɛ ndo Nzapa azi na lege hɛ̃ azi mɛ ta Ayuda ma ya, ala ye nga lo tɛ Yezo.

²⁸ Ala na awa Kristo ala ndo so ndo ko bi gba.