Awa Pangɔ Kwa 13 - Fana Ngbangɔ 1987

Ato Barnabasi na Polo na kwa

¹ Ka ya Eklezia ti Antiɔsɛ ko, awa pangɔ nyɔ Nzapa, na awa hangɔ azi na lo ndo da. Ala lo mɛ: Barnabasi, na Simeona (mɛ andoili lo ya, Vukɔ Zo), na Lusiusi wa Sirɛnɛ, na Manaɛna (mɛ ndo akã lo na Erodɛ mɛ gbia ndoni kɔi), nga na Saulo.

² Mbanga lá kɔi, ngoi mɛ ndo ala bombi tɛrɛ la so ndosambela, ala kɛ̃ nga tɛ so vɔrɔngɔ Nzapa ko, Tɔrɔ Santo apa hɛ̃ la ya: “Ale ĩ hã Barnabasi na Saulo na li nɔ tɛ ĩ, ĩ kpã katɛ, ko ala li kwa mɛ mbi ili la na lo ni.”

³ Ala kɛ̃ tɛngɔ ye, ala sambela sambela, so pɛni, ala kpã ti la ndo Barnabasi na Saulo ya, Nzapa asunu la. La ala zi lege hɛ̃ Barnabasi na Saulo, ala gwe.

Barnabasi na Saulo asi ka Siprɛ

⁴ Tɔrɔ Santo ĩ to ndo Barnabasi na Saulo na kwa ko, ala gwe ka kɔdɔrɔ mɛ ili ni la Seleusia. Ala lo so ndo ko, ako ya masua, agwe ka ya zúa mɛ ili ni la Siprɛ.

⁵ Ala ĩ si ka kɔdɔrɔ ti Salaminɛ ko, ala to nda pangɔ tɛnɛ tɛ Nzapa ka ya da sambela ndɛ̃ ndɛ̃ ndɛ̃. Adu ndo ada sambela tɛ Ayuda. Ala nɔ ndo na Yoanɛ Marko ya, lo za ani na kwa.

⁶ Ala ĩ fangbi ya zúa ti Siprɛ zu, ĩ si ka kɔdɔrɔ mɛ ili ni la Pafɔsi ko, ala tã wa hãngɔ biando mɛ andoili lo ya Barɛ Yezo, lo ndo wa Yuda, ko lo ndomu ndo tɛrɛ lo ya, ni wa pangɔ nyɔ Nzapa.

⁷ Lo ndodu ndo ka tɛ Sɛrgiusi Paulusi mɛ gbia tɛ leta ti ya zúa ni ko. Sɛrgiusi Paulusi ndo wa kɔdɛ, ko lo hɛ̃ ndo nyɔ, aili Barnabasi na Saulo, ta sanga ma, Segiusi Paulusi asepara ndo mangɔ tɛnɛ tɛ Nzapa mɛ ala ndopa.

⁸ Mbanga ili wa biando ni ko la Elimasi. Ko ta Elimasi ni aye ndo lo tɛ la ma. (Elimasi adu se mɛ andoili na ili lo na yanga tɛ azi ti Grɛsɛ la.) Ko lo ndogi ndo kɔdɛ ya, ta gbia tɛ leta aye lo tɛ Yezo ma.

⁹ La Tɔrɔ Santo asa nguru tɛrɛ Saulo mɛ andoili lo ya Polo. Polo aba Elimasi toka toka,

¹⁰ apa hɛ̃ lo ya: “Wa poroso, wa sana, zo tɛ Satana, wa kɛ̃ngɔ anzɔ̃ lo! Mɔ zia gbanda gbɛ̃ngɔ aye mɛ bɛ Gbia Nzapa aye lá wa?

¹¹ Na olo ko, ma la! Gbia na hɛ̃ngɔ mɔ pɛnɔ, mɔ na tingɔ wa ziba, ko na pɛ nyi ngoi ko, ta mɔ na hũngɔ lá mɛ ndosũ ma.” Bo na ngoi ni ko, lɛ Elimasi avũ mbingo kpi kpi kpi, lo sana tɛrɛ lo, lo tatara ndo so gingɔ zo ya, agbɔ̃ ti ni, aɔ na ni.

¹² Gbia tɛ leta ĩ hũ so ko, lo ye lo tɛ Yezo. Ndima agbɔ̃ ndo lo sĩ, na lo ti lo tɛ Gbia mɛ Polo aha na lo.

Polo na Barnabasi asi ka Antiɔsɛ ka sese ti Pizidia

¹³ Polo na afɔ̃ lo ako ka ya masua ka kɔdɔrɔ ti Pafɔsi. Ala lo so ndo ko, agwe ka kɔdɔrɔ ti Pɛrgɛ ka sese ti Pamfilia, la Yoanɛ Marko adɔ la so ndo ko, azia, adiri ka Yeruzalɛmɛ.

¹⁴ Ala lo ka Pɛrgɛ, ahã nɔ agwe, asi ka kɔdɔrɔ ti Antiɔsɛ, ka sese ti Pizidia. Ĩ da na lá ti wɔngɔ tɛrɛ ko, ala li ka ya da sambela, adunga tise.

¹⁵ Ngoi mɛ ĩ kɔ nda dingɔ tɛnɛ ti ya buku ti ndia, nga na tɛnɛ ti ya buku mɛ ndo awa pangɔ nyɔ Nzapa asu ko, agbia ti ya da sambela ato kwa hɛ̃ Barnabasi na Polo ya: “Aya bua, se ĩ du na tɛnɛ ti tɛnɛngɔ hɛ̃ azi ya, ĩ sa nguru bɛ la ko, ĩ tɛnɛ na olo buai!”

¹⁶ Polo alo ndozu, apɛpɛ ti lo hɛ̃ la, apa ya: “Ĩ awa Izrayɛlɛ, na ĩ mɛ ta ĩ Ayuda ma, la ĩ ndovɔrɔ Nzapa ko, ĩ ma la!

¹⁷ Nzapa mɛ e awa Izrayɛlɛ e ndovɔrɔ lo, asara ndo akotara e akpã ya, ala du azi tɛ ni. Ngoi mɛ ndo ala ndodu ka sese ti Egipito ko, lo li ndo ya, ala su kpaya kpaya. So pɛni, lo hã ndo la kai na nguru tɛ lo, lo si na la.

¹⁸ Ngoi mɛ ndo ala ka bɛ ndo, na pɛ buru sui siɔ ko, lo ndogbe ndo bɛ lo na lo tɛ la.

¹⁹ Lo kpɔ ndo azi ti li kɔdɔrɔ mbara mbara ka sese ti Kanana, ko lo mu ndo sese tɛ la ni, lo hɛ̃ akotara e ya, ati tɛ la.

²⁰ Akotara e adu ndo kɔdɔrɔ so ndo ko, na pɛ buru nga ma ngbangbo siɔ ndoni sui kɔ̃. “So pɛni, Nzapa akpa ndo awa fangɔ ngbanga hɛ̃ akotara e, ngbĩi asi na ngoi tɛ Samuɛlɛ mɛ wa pangɔ nyɔ lo.

²¹ So pɛni, ala hũnda Nzapa ya, lo hɛ̃ ani gbia kɔi, la Nzapa ahɛ̃ la Saulo mɛ nyi Kisi, lo nga ale tɛ Benzami. Ko Saulo ale ndo gbia buru sui siɔ.

²² Nzapa ĩ kɛ̃ Saulo ko, lo hɛ̃ la Davidi ya, Davidi adu gbia tɛ la. Nzapa apa ndo lo tɛ Davidi ya: ‘Mbi lua Davidi mɛ nyi Izai. Bɛ mbi ndode na lo tɛ lo, ko lo na lingɔ ye kwɛ mɛ mbi ye ya lo li.’

²³ Mbanga tara Davidi kɔi ndo la Yezo, Nzapa akpã ndo lo Wa songɔ awa Izrayɛlɛ, ko adu se mɛ ndo Nzapa ako na kapa hɛ̃ la la.

²⁴ Uzu ti Yezo gangɔ ko, Yoanɛ aili ndo awa Izrayɛlɛ zu, apa hɛ̃ la ya, ala gbinya bɛ la, ko ala mu batisimɔ.

²⁵ Yoanɛ ĩ ndoda ndũ ti kpingɔ ko, lo pa ya: ‘Ĩ da bɛ ĩ ya, mbi na? Ta mbi zo mɛ ĩ ndoku lo ma. Wa ĩ ma la! Zo ni ko na gangɔ pɛko mbi, ko ta mbi lengbi bɛ ti hãngɔ pɔrɔ tɛ lo na gɛrɛ lo ma.’

²⁶ “Aya bua, ĩ mɛ atara Abrahama, na ĩ mɛ ta ĩ Ayuda ma, la ĩ ndovɔrɔ Nzapa ko, Nzapa ato ndo hɛ̃ e zu kwa mɛ e lengbi ti songɔ na lo ni.

²⁷ Kanda ta awa Yeruzalɛmɛ, na agbia tɛ la ahĩnga ndo ya, Yezo adu Mɛsia ma, ta ala ma ndo nga nda tɛnɛ mɛ ndo awa pangɔ nyɔ Nzapa asu, la andodi ni na lá ti wɔngɔ tɛrɛ kɔi kɔi ma. Kanda ngoi mɛ ndo ala fa ngbanga ya, aho Yezo ko, tɛnɛ mɛ ndo awa pangɔ nyɔ Nzapa atɛnɛ ati na seni.

²⁸ Ta ala lua ndo lo na siɔ ye kɔi mɛ alengbi ti hongɔ lo na lo ni ma, abɛ nga so ko, ala hũnda ndo Pilato ya, aho lo, la aho lo.

²⁹ “Ala ĩ onzi lingɔ ye kwɛ mɛ asu ka ya Buku tɛ Nzapa na lo tɛ lo ko, ala hã lo ka ndo krusi, azu na ni, ahɔ lo.

³⁰ Kanda Nzapa aso ndo lo na pɛ kwa.

³¹ Na pɛ bi gba ko, Yezo afa ndo tɛrɛ lo na azi mɛ ndo lo na la ndoɔ ndoni kɔi, na ngoi mɛ ndo ala lo ka Galilea so gwengɔ ka Yeruzalɛmɛ. Na olo ko, azi ni adu atemwɛ ti pangɔ lo tɛ lo hɛ̃ awa Izrayɛlɛ.

³² E nvɛni, e pa hɛ̃ ĩ Nzɔ̃ Pa olo: kapa mɛ ndo Nzapa ako hɛ̃ akotara e ko,

³³ na olo lo li ni na seni hɛ̃ e atara la, na lo mɛ ya, lo so Yezo na pɛ kwá, nga ma se mɛ asu na ni ka ya Bia ti se ya: ‘Mɔ Nyi mbi, na lá olo ko, mbi pa ya, mbi To mɔ!’

³⁴ Nzapa apa ndo ya, ni na songɔ lo na pɛ kwá ya, ta tɛrɛ lo ti zɔ̃ ma. Se mɛ ndo Nzapa atɛnɛ na ni lo mɛ: ‘Mbi na sunungɔ ĩ, ko mbi na hɛ̃ngɔ ĩ anzɔ̃ ye Mɛ ndo mbi ko kapa ni hɛ̃ Davidi. Biani, mbi na lingɔ ni.’

³⁵ Nda mɛ apa nga ka ya mbɛti mɛ ndɛ̃ ya: ‘Ta mɔ ye gbanda ya, tɛrɛ zo tɛ mɔ azɔ̃ ma’ la.

³⁶ Ngoi mɛ ndo Davidi ade lɛ lo ngɛ̃ ko, lo li ndo ye mɛ bɛ Nzapa aye. So pɛni, lo kpi, ahɔ lo na tɔ̃ sende tɛ akotara lo, ko tɛrɛ lo azɔ̃.

³⁷ Kanda zo mɛ ndo Nzapa aso lo na pɛ kwá ko, ta tɛrɛ lo azɔ̃ ndo ma.

³⁸ “Aya bua, ale ĩ hĩnga ya, Nzapa apa ti ndo Yezo hɛ̃ ĩ ya, ni na kangɔ lɛ ni ndo siɔ ye tɛ ĩ.

³⁹ Azi zu mɛ aye lo tɛ Yezo ko, Nzapa na hãngɔ siɔ ye tɛ la zu mɛ ta ndia tɛ Mɔizɛ alengbi ti hãngɔ ni ma.

⁴⁰ Wa ĩ du na kpengba lɛ, so lo mɛ ndo awa pangɔ nyɔ Nzapa apa ali ĩ. Ala pa ndo ya:

⁴¹ ‘Ĩ awa mumanangɔ Nzapa, ĩ ba hĩ! Ĩ bema, í bɛ tɛrɛ ĩ katɛ! Ta sanga ma, na ngoi tɛ ĩ ko, Mbi na lingɔ ye kɔi mɛ bɛ se zo apa ni hɛ̃ ĩ ko, Ta ĩ na yengɔ lo ni ma.’ ”

⁴² Polo na Barnabasi ĩ lo ka ya da sambela ĩ si ko, azi ahũnda la ya, se ada na lá ti wɔngɔ tɛrɛ ti pɛni ko, ala ga apa gi tɛnɛ ko hɛ̃ azi.

⁴³ Nda lingo ĩ kɔ ko, ambanga Ayuda sĩni, na ambanga azi gba mɛ ta Ayuda ma, la agbinya bɛ la, aye lo tɛ Nzapa tɛ Ayuda ko, ala gwe pɛko Polo na Barnabasi. Polo na Barnabasi atɛnɛ tɛnɛ hɛ̃ la, asa nguru bɛ la ya, ala ngbã na kpãngɔ bɛ la ngoi zu na ndo nzɔ̃ bɛ tɛ Nzapa.

⁴⁴ Ĩ da na lá ti wɔngɔ tɛrɛ ti pɛni ko, azi ti kɔdɔrɔ ma wo ma abombi tɛrɛ la so mangɔ tɛnɛ tɛ Gbia Yezo mɛ Polo ndotɛnɛ.

⁴⁵ Ambanga Ayuda ĩ hũ azi ko hingo hingo ko, ala li sɔbɛrɛ hɛ̃ Polo na Barnabasi sĩ. Ala kɛ̃ tɛnɛ mɛ Polo atɛnɛ, ala guru lo.

⁴⁶ La Polo na Barnabasi apa hɛ̃ la na kpengba bɛ ya: “Adu ya, ale e pa tɛnɛ tɛ Nzapa hɛ̃ ĩ uzu. Wa nga ma la ĩ kɛ̃ ni ĩ nvɛni, ĩ fa ngbanga ti tɛrɛ ĩ ya, ta ĩ lengbi ti luangɔ du ti kaka na lo ni ma ko, e na nɔngɔ ka tɛ azi mɛ ta Ayuda ma ya, e pa tɛnɛ ni hɛ̃ la.

⁴⁷ Ta sanga ma, Gbia Nzapa ahɛ̃ nyɔ hɛ̃ e ya: ‘Mbi kpã mɔ wa vurungɔ na ndo na lo tɛ azi ti lɛ sese ya, Mɔ nɔ ngbĩi, mɔ si ka nda sese gbɔ, Mɔ pa hɛ̃ la se mɛ ala lengbi ti songɔ na ni.’ ”

⁴⁸ Azi mɛ ta Ayuda ma ĩ ma so ko, ala saba, ko ala gonda tɛnɛ tɛ Gbia Nzapa. Azi zu mɛ ndo Nzapa apia asara la ya, gbanda ala lua du ti kaka ko, ala ye ndo lo tɛ Yezo.

⁴⁹ Tɛnɛ tɛ Gbia afɔnɔ alengbi na lɛ sese ko zu.

⁵⁰ Kanda Ayuda awa akota azi ti kɔdɔrɔ, na awe ti ndima mɛ ndovɔrɔ Nzapa, la ala zu ato nda hɛ̃ngɔ pɛnɔ hɛ̃ Polo na Barnabasi, atoma la so ya kɔdɔrɔ tɛ la.

⁵¹ Ko Polo na Barnabasi agoro sese ti pɔrɔ tɛ la hɛ̃ la, so fangɔ hɛ̃ la ya, siɔ ye tɛ la angbã na li la nvɛni, la ala hã nɔ, agwe ka kɔdɔrɔ ti Ikɔniɔmɛ.

⁵² Ka kɔdɔrɔ ti Antiɔsɛ mɛ ndo ala lo ka da ko, bɛ awa Kristo ade ndo sĩ, ko Tɔrɔ Santo asa ndo nguru bɛ la.