Awa Pangɔ Kwa 12 - Fana Ngbangɔ 1987

Abi Petro bɔlɔkɔ

¹ Na ngoi ko ndo ko, gbia Erodɛ ato nda hɛ̃ngɔ pɛnɔ hɛ̃ ambanga azi ti Eklezia.

² Lo hɛ̃ nyɔ, amu zabe, aho na Zaki mɛ nyita Yoanɛ.

³ Erodɛ ĩ hũ ya, bɛ Ayuda ade na lo ti ye ko ni li kɔ, lo hɛ̃ nga nyɔ, agbɔ̃ Petro. (Adu ndo ngoi ti yenga ti tɛngɔ mapa mɛ ta yɔrɔ ti susungɔ na ni da ma.)

⁴ Ngoi mɛ agbɔ̃ Petro wɛ ko, Erodɛ ahɛ̃ nyɔ, abi lo bɔlɔkɔ. Ko Erodɛ aha ndo aturugu sui kɔi ndoni mana, lo kangbi ya la siɔ siɔ ya, ala bata Petro li pɔ na li nɔ. Lo separa ndo ya, na pɛ yenga ti Lipandasi tɛ Ayuda ko, ni fa ngbanga tɛ lo na gbɛlɛ azi.

⁵ Nda mɛ ndo abata Petro ka ya da bɔlɔkɔ la, ko azi ti Eklezia ndosambela ndo Nzapa sĩ na lo tɛ lo.

Azi Petro ka bɔlɔkɔ

⁶ Adɛindo ya, se ndã ade ko, Erodɛ afa ngbanga tɛ Petro na gbɛlɛ azi Na bi ni ko, Petro ala ndo langɔ na popo tɛ aturugu sɛ. Amu ndo ngo nwa sɛ, agbe na lo, ko aturugu ndobata nyɔ da bɔlɔkɔ.

⁷ Bo ngoi kɔi, angelo tɛ Gbia asi vaaa. Ko ye kɔi asũ nga ma lá na ya nyi da mɛ ka ya da bɔlɔkɔ. Angelo andũ Petro na katɛ lo, Petro azingɔ, la angelo apa hɛ̃ lo ya: “Lo ndozu hiɔ!” La ango nwa ko na ti Petro ahãna asa tise.

⁸ So pɛni, angelo apa hɛ̃ lo ya: “Gbe gba tɛ mɔ na gu ya mɔ, mɔ yu nga pɔrɔ tɛ mɔ.” Petro ali na se nyɔ angelo, la angelo apa hɛ̃ lo ya: “Yu kota bɔngɔ tɛ mɔ, ko mɔ ga pɛko mbi.”

⁹ Petro alo ka ya da bɔlɔkɔ asi, anɔ ndali angelo. Ta lo hĩnga ndo ya, ye ko angelo ali tɛrɛ ni ko, adu biani ma. Lo ndoda ndo bɛ lo ya, ni hũ suma.

¹⁰ Ala lo ka ya da bɔlɔkɔ, aga, aɔ kɔzo ndo mɛ awa batangɔ da bɔlɔkɔ ndodu da. So pɛni, ala ɔ ndo ti se, la ala si na nyɔ ngise ti nwa mɛ andoba lege ti kɔdɔrɔ. Nyɔ ngise ko azi na bɛ lo nvɛni so gbɛlɛ la, la ala si. Ngoi mɛ ala so lege so ndogwe ko, bo ngoi kɔi, angelo adɔ Petro azia, agwe.

¹¹ La Petro ahĩnga ye mɛ fɛrɛ ali lo, ko lo pa ya: “Na olo ko, mbi hũ ya, ye olo adu biani. Gbia ato angelo tɛ lo hɛ̃ mbi, lo hã mbi na yamba ti Erodɛ lo zi, so mbi hũ pɛnɔ zu mɛ ndo Ayuda asepara hɛ̃ngɔ mbi.”

¹² Ngoi mɛ lo ĩ binga be lo, lo ĩ hĩnga nda ye mɛ fɛrɛ ali lo ko, lo hã nɔ, lo nɔ ka tɛ Maria mɛ ta Yoanɛ, mbanga ili Yoanɛ nga la Marko. Azi ma wo ma abombi tɛrɛ la so ndo ko, ko ala ndosambela Nzapa.

¹³ Petro agɔngɔ nyɔ ngise ko ko ko! Wa kwa ti wali mɛ ili lo la Rodɛ ĩ ma so ko, lo i tɛrɛ lo ka nyɔ ngise ya, ni zi ni.

¹⁴ Petro aili ila, wa kwa ti wali ĩ ma legɔ̃ Petro ko, lo hĩnga ni, ko bɛ lo ade sĩ. Lo zia zingɔ nyɔ ngise, lo su kpɛ, lo diri ka ya da, lo pa hɛ̃ azi mɛ ka ya da ya, Petro la ka gegi.

¹⁵ Ala pa hɛ̃ lo ya: “Nyingɔ ya li mɔ!” Lo pa hɛ̃ la ya, adu bɛta tɛnɛ. La ala pa hɛ̃ lo ya: “Angelo mɛ ndobata lo la!”

¹⁶ Kanda na ngoi ni ko, Petro so ndogɔngɔ bo nyɔ ngise gɔngɔ. Ala ĩ ga ĩ zi nyɔ ngise ko, ala hũ lo, ko ala bema.

¹⁷ Lo pɛpɛ ti lo hɛ̃ la ya, ala du kpɔ, la lo pa hɛ̃ la se mɛ ndo Gbia amu na lo ka ya da bɔlɔkɔ asi na ni. Lo pa nga hɛ̃ la ya: “Ĩ pa tɛnɛ olo hɛ̃ Zaki, na ayata e mɛ ndɛ̃ mɛ awa Kristo.” So pɛni, lo si, lo gwe ka ndo mɛ ndɛ̃.

¹⁸ Ĩ la bu ndã ĩ de ko, aturugu atɔmbɔkɔ, ala so ndohũndangbi ya, Petro agwe wa?

¹⁹ Erodɛ ahɛ̃ nyɔ ya ati gi lo, ko ta alua ndo lo ma. Erodɛ apa ya, ahũnda awa batangɔ da bɔlɔkɔ. Ĩ hũnda la ko, ala gbinya ya, ta ani hĩnga ndo mɛ Petro da ma, la Erodɛ ahɛ̃ nyɔ ya, akpɔ la. So pɛni, Erodɛ alo so Yudea, agwe ka Sezarea. Lo ĩ si kai ko, lo la bi yakere.

Erodɛ akpi

²⁰ Ngɔnzɔ ndogbɔ̃ ndo Erodɛ gati gati hɛ̃ azi ti kɔdɔrɔ ti Tirɛ na ti Sidona. La azi ti Tirɛ na ti Sidona amangbi ya, ani si ka gbɛlɛ lo. Ala hũnda Blastusi mɛ wa kwa ti ya da tɛ Erodɛ ya, lo lɛ kongba tɛ ani ka tɛ Erodɛ, ko Blastusi aye da. La ala nɔ ahũnda Erodɛ ya, se lo ye ko, ani na lo, ani du na mangbingɔ. Ala li ndo so, ta sanga ma, atɛ tɛ la ndolo ndo ka sese tɛ Erodɛ.

²¹ Ĩ da na ngoi ti kapa ni ko, Erodɛ ayu bɔngɔ tɛ lo ti gbia, ako adu ndo ngɛndɛ tɛ lo, atɛnɛ tɛnɛ hɛ̃ la na gbɛlɛ azi zu.

²² Ala ĩ ma so ko, ala dɛrɛ kɔngɔ ya: “Omɛ ta adu zo ma, adu mbanga nzapa la ndotɛnɛ tɛnɛ olo!”

²³ Kanda bo na ngoi ni ko, angelo tɛ Gbia abi nga tɛrɛ Erodɛ, na lo mɛ ya, ta lo hɛ̃ ndo ndima hɛ̃ Nzapa ma. La ambua atɛtɛrɛkɛ vĩ lo, la lo kpi.

²⁴ Ko tɛnɛ tɛ Nzapa ndomai ndo bo maingɔ.

²⁵ Barnabasi na Saulo ĩ onzi kwa tɛ la ka Yeruzalɛmɛ ko, ala lo kai adiri, amu Yoanɛ Marko aɔ na ni.