Awa Pangɔ Kwa 11 - Fana Ngbangɔ 1987

Petro apa tɛnɛ ka gbrlɛ azi ti Eklezia ti Yeruzalɛmɛ

¹ Awa pangɔ kwa tɛ Yezo, na awa yengɔ lo tɛ lo mɛ ka Yudea ama ndo ya, azi mɛ ta Ayuda ma aye nga tɛnɛ tɛ Nzapa.

² Ngoi mɛ Petro ĩ diri ka Yeruzalɛmɛ ko, awa yengɔ lo tɛ Yezo mɛ Ayuda abela lo ya:

³ “Mɔ nɔ ndo ka tɛ awa popo, ko ĩ na la ĩ tɛ ye ndoni kɔi ya nɛ?”

⁴ La Petro akambisa hɛ̃ la ye kɔi kɔi zu mɛ ndo asi na seni. Lo pa hɛ̃ la ya:

⁵ “Mbi ndo ka kɔdɔrɔ mɛ ili ni la Yope. Ngoi mɛ mbi so ndovɔrɔ Nzapa ko, mbi hũ suma. Na ya suma ni ko, mbi hũ ye kɔi alo ka ndozu so ndozu. Ye ni ko akpa kota ma bɔngɔ mɛ agbɔ̃ ni na ndangɔrɔ siɔ, ko azu, ada ndũ na mbi.

⁶ Mbi ba ya ni toka toka, ko mbi hũ asa mɛ andodɔ nɔ na gɛrɛ la siɔ, na asa ti ya ndo, na ala mɛ ndoara na ya la, nga na ahũ.

⁷ Ko mbi ma legɔ̃ Gbia so ndopa hɛ̃ mbi ya: ‘Petro, lo ndozu, mɔ̃ kpɔ asa olo, mɔ tɛ!’

⁸ La mbi gbinya ya: Tpɔ, Gbia, mbi kɛ̃, ta sanga ma, ta mbi dɛ mbi tɛ ye mɛ bi tɛrɛ ni fani kɔi ma.’

⁹ Ko mbi ma legɔ̃ Gbia adu ka ndozu apa hɛ̃ mbi ya: ‘Ye mɛ mbi Gbia, mbi pa ya, vuruni ko, ta mɔ mu ni ya, bi tɛrɛ ni ma.’

¹⁰ Ye ni ko asi fani ta, so pɛni, adiri zu, ama ka ndozu.

¹¹ Bo na ngoi ni ko, akɔli ta asi so gbe nyɔ da mɛ fɛrɛ mbi da. Ala ndo ka Sezarea la ato la hɛ̃ mbi.

¹² Tɔrɔ Santo apa hɛ̃ mbi ya, ta mbi ndanga tɛrɛ mbi ma, mbi lo, ko e na la e gwe lege kɔi. Mbi na awa Yope mana mɛ awa yengɔ lo tɛ Yezo la e gwe ka Sezarea, ko e zu e li ndo ka ya da tɛ kɔli mɛ ili lo la Kɔrnɛyɛ.

¹³ Kɔrnɛyɛ akambisa hɛ̃ e se mɛ ndo lo hũ na angelo asi na ni gbɛlɛ lo ka ya da tɛ lo. Ko angelo ko apa hɛ̃ lo ya: ‘To akɔli ka Yope, ko ala ga na Simɔ mɛ mbanga ili lo la Petro.

¹⁴ Lo na pangɔ hɛ̃ mɔ tɛnɛ mɛ mɔ na azi ti nda se wa tɛ mɔ zu ĩ lengbi ti songɔ na lo ni.’

¹⁵ Ngoi mɛ mbi to nda tɛnɛngɔ tɛnɛ ko, Tɔrɔ Santo azu ndo la, bo nga ma se mɛ ndo lo zu na ni ndo e uzu.

¹⁶ La bɛ mbi ada na tɛnɛ mɛ ndo Gbia Yezo apa ya: ‘Yoanɛ ayɔrɔ ndo ĩ na ya ngu so hɛ̃ngɔ ĩ batisimɔ, kanda mbi Yezo, mbi na sangɔ Tɔrɔ Santo na tɛrɛ ĩ so hɛ̃ngɔ ĩ batisimɔ.’

¹⁷ Nzapa ahɛ̃ la Tɔrɔ Santo nga ma se mɛ ndo lo hɛ̃ na ni hɛ̃ e, na ngoi mɛ ndo e ye na lo tɛ Gbia Yezo Kristo. Ta mbi lengbi ndo ti kɛ̃ngɔ nyɔ Nzapa ma!”

¹⁸ Ala ĩ ma tɛnɛ ni wɛ ko, bɛ la azu, la ala gonda Nzapa ya: “Biani, Nzapa ahɛ̃ nga lege hɛ̃ azi mɛ ta Ayuda ma ya, ala gbinya bɛ la, wa ala lua bɛta du.”

Azi ti Eklezia ti Antiɔsɛ

¹⁹ Awa yengɔ lo tɛ Yezo agundu tuuu na lo ti pɛnɔ mɛ azi ahũ na ngoi mɛ ndo aho na Etieni. Ambanga agwe ngbĩi asi ka sese ti Fenisia, ambanga agwe ka ya zúa ti Siprɛ, ambanga mɛ ndɛ̃ agwe ka kɔdɔrɔ ti Antiɔsɛ. Ta ala ndopa ndo tɛnɛ tɛ Nzapa hɛ̃ azi zu ma, kanda ala ndopa ndo ni bo hɛ̃ Ayuda kɔi.

²⁰ Ko ambanga awa yengɔ lo tɛ Yezo mɛ awa Siprɛ na ala mɛ awa Sirɛnɛ agwe ndo nga ka Antiɔsɛ, ala tɛnɛ nga tɛnɛ hɛ̃ azi mɛ ta Ayuda ma, ala pa ndo nga Nzɔ̃ Pa tɛ Gbia Yezo hɛ̃ la.

²¹ Gbia ahɛ̃ ndo la nguru, ko azi gba agbinya ndo bɛ la, aye lo tɛ lo.

²² Azi ti Eklezia ti Yeruzalɛmɛ ĩ ma pa ni ko, ala to Barnabasi ka Antiɔsɛ.

²³ Ngoi mɛ lo ĩ si kai, lo ĩ hũ se mɛ ndo Nzapa ali na nzɔ̃ bɛ hɛ̃ awa yengɔ lo tɛ Gbia Yezo ko, lo saba, lo sa nga nguru bɛ la zu ya, ala ngbã na kpãngɔ be la kpa na ndo Gbia.

²⁴ Barnabasi ndo nzɔ̃ zo, Tɔrɔ Santo asa ndo nguru tɛrɛ lo, lo ye ndo nga lo tɛ Yezo Kristo na bɛ lo kɔi ko, azi gba ati ndo azi tɛ Gbia na lo tɛ lo.

²⁵ So pɛni, Barnabasi agwe ka kɔdɔrɔ ti Tarsi so gingɔ Saulo.

²⁶ Lo ĩ tã Saulo ko, lo mu lo, lo gwe na lo ka Antiɔsɛ. Ala zu se ali ndo buru kɔi zu ka tɛ azi ti Eklezia mɛ kai, ko ala ha ndo azi gba na tɛnɛ tɛ Yezo. Ka Antiɔsɛ ndo la ato nda ilingɔ awa yengɔ lo tɛ Yezo ya, awa Kristo.

²⁷ Na ngoi ko ndo ko, awa pangɔ nyɔ Nzapa alo ka Yeruzalɛmɛ agwe ka Antiɔsɛ.

²⁸ Mbanga zo kɔi na popo tɛ la, ili lo la Agabusi, lo lo ndozu. Tɔrɔ Santo ĩ zi kɔdɛ li lo ko, lo pa ya, angbã yakere kota gwɛ̃ aya na le sese zu. (Kota gwɛ̃ ni aya nga ndo biani na ngoi mɛ Klodɛ kota gbia ti Roma.)

²⁹ Awa Kristo akangbi ndo ya, zo kɔi kɔi na popo tɛ ani ahɛ̃ faranga na se mɛ lo lengbi ti hɛ̃ngɔ ni, wa ani to hɛ̃ afɔ̃ ani mɛ ndodu ka sese ti Yudea.

³⁰ Ala li nga bo ma se mɛ ala mangbi na ni. La ala faranga ni ato na Barnabasi na Saulo hɛ̃ akangba ti Eklezia niɛ ka Yudea.