Awa Pangɔ Kwa 10 - Fana Ngbangɔ 1987

Petro apa Nzɔ̃ Pa tɛ Yezo hɛ̃ Kɔrnɛyɛ

¹ Mbanga kɔli kɔi ndodu ndo ka kɔdɔrɔ mɛ ili ni la Sezarea, ili lo la Kɔrnɛyɛ. Lo gbia ti ndo mbanga batanyɔ tɛ aturugu ti Roma. Andoili batanyɔ ni ya: “batanyɔ ti Italia.”

² Kɔrnɛyɛ ndohɛ̃ ndo tɛrɛ lo so vɔrɔngɔ Nzapa, ko lo na nda se wa tɛ lo zu ndotɔndɔ ndo Nzapa. Lo ndoka ndo kaye sĩ hɛ̃ Ayuda mɛ awa yɛlɛ, ko ngoi zu, lo ndosambela Nzapa.

³ Mbanga ndɔ kɔi, na nɔ tɛ saa ta ko, lo hũ Suma, ko na ya Suma ni ko, lo hũ angelo tɛ Nzapa yango, so ndonɔ ka tɛ lo, ko angelo ko aili lo ya: “Kɔrnɛyɛ!”

⁴ Lo ĩ ma so ko, lo ya lɛ lo, lo ba angelo na mbɛtɔ, lo hũnda lo ya: “Gbia, ali sia?” Angelo agbinya hɛ̃ lo ya: “Nzapa ama sambela tɛ mɔ, lo ye nga lo ti kaye mɛ ntɔ ndoka hɛ̃ awa yɛlɛ, ko lo da be lo na mɔ.

⁵ Wa na olo ko, to akɔli ka kɔdɔrɔ ti Yope, ko ala ga na mbanga kɔli kɔi mɛ ili lo la Simɔ, mbanga ili lo la Petro.

⁶ Lo ndola ka tɛ wa lɛkɛngɔ pɔrɔ sa mɛ ili lo nga la Simɔ, da tɛ lo ka nyɔ kota ngu.”

⁷ Angelo mɛ fɛrɛ apa tɛnɛ hɛ̃ Kɔrnɛyɛ ĩ diri ko, Kɔrnɛyɛ aili ambanga awa kwa tɛ lo sɛ, na mbanga turugu kɔi mɛ wa batangɔ lo. Turugu ko ndohɛ̃ ndo nga tɛrɛ lo so vɔrɔngɔ Nzapa.

⁸ Lo pa hɛ̃ la ye zu mɛ fɛrɛ ali lo, la lo to la ya, ala gwe ka Yope.

⁹ Ĩ la bu ndã ĩ de, na ngoi mɛ ndo ala so lege, ala ĩ doli na Yope ko, Petro ama ka ndo da so vɔrɔngɔ Nzapa, na ge tɛ be kɔmbitɛ.

¹⁰ Gwɛ̃ agbɔ̃ ndo lo, ko lo ye ndo tɛngɔ ye. Ngoi mɛ ndo andoto ye hɛ̃ lo ko, lo hũ suma.

¹¹ Na ya Suma ni ko, lo hũ lɛ yayu azi mbue! Ko ye kɔi alo kai so ndozu. Ye ni ko akpa kota ma bɔngɔ mɛ agbɔ̃ ni na ndangɔrɔ siɔ, ko so ndozu ge tise.

¹² Lɛ asa ndɛ̃ ndɛ̃ ndɛ̃ zu mɛ ndodɔ nɔ na gɛrɛ la siɔ, na ala mɛ ndoara na ya la, nga na lɛ ahũ ndɛ̃ ndɛ̃ ndɛ̃ zu ndo na ya kota ma bɔngɔ ni.

¹³ Lo ma legɔ̃ Gbia apa hɛ̃ lo ya: “Petro, lo ndozu, mɔ̃ kpɔ asa olo mɔ tɛ!”

¹⁴ La Petro agbinya hɛ̃ lo ya: “Ipɔ, Gbia, mbi kɛ̃, ta sanga ma, ta mbi dɛ mbi tɛ ye mɛ bi tɛrɛ ni fani kɔi ma.”

¹⁵ Lo ti ma legɔ̃ Gbia apa hɛ̃ lo ya: “Ye mɛ mbi Gbia, mbi pa ya vuruni ko, ta mɔ mu ni ya, bi tɛrɛ ni ma.”

¹⁶ Ye ni ko asi ngbĩi fani ta, ko bo so pɛni hiɔ ko, ye ni ko adiri ama ka lɛ ndozu.

¹⁷ Petro so ndotɛnɛ ndo ka ya be lo ya, nda suma mɛ ni hũ nɛ? Ko bo na ngoi ni ko, akɔli mɛ ndo Kɔrnɛyɛ ato la, ahũnda ndo mɛ da tɛ Simɔ da, la afa na la. Ala ĩ si na nyɔ da ni ko,

¹⁸ ala ili azi, ahũnda la ya: “Simɔ mɛ mbanga ili lo la Petro ndola so ndo mɛ?”

¹⁹ Petro adɛ ndo bo so bingangɔ be lo na ndo nda suma mɛ fɛrɛ lo hũ, ko Tɔrɔ Santo apa hɛ̃ lo ya: “Ba akɔli ota ndogi mɔ.

²⁰ Lo ndozu, mɔ zu, ĩ na la ĩ gwe. Ta mɔ ndanga tɛrɛ mɔ ma, ta sanga ma, mbi la mbi to la.”

²¹ La Petro azu, apa hɛ̃ akɔli ko ya: “Zo mɛ ĩ ndogi lo ko, adu mbi, ko ĩ ga na lo ti nɛ?”

²² Ala gbinya hɛ̃ lo ya: “Kɔrnɛyɛ mɛ gbia tɛ aturugu la ato e. Lo nzɔ̃ zo mɛ ndotɔndɔ Nzapa, ko Ayuda zu ndogonda lo. Angelo tɛ Nzapa atisa lo ya, lo ili mɔ, mɔ ga ka tɛ lo, wa tɛnɛ mɛ mɔ na ni ko, mɔ pa hɛ̃ lo, lo ma.”

²³ Petro ĩ ma so ko, lo mu la, lo li na la ka ya da, lo hɛ̃ la ndo ti langɔ, ala langana. Ĩ la bu ndã ĩ de ko, Petro na la ahã nɔ agwe. Ambanga awa yengɔ lo tɛ Yezo mɛ ka Yope ana Petro aɔ ndoni kɔi.

²⁴ Ĩ la so pɛni bi sɛ ko, ala si ka kɔdɔrɔ ti Sezarea. Kɔrnɛyɛ aili ndo asongo lo, na akwa lo ti kpɔ̃ bɛ lo, ko ala ndoku ndo la so ndo ko.

²⁵ Ngoi mɛ Petro aga so lingɔ ka tɛ Kɔrnɛyɛ ko, Kɔrnɛyɛ aga angoro lo, akuku so gbɛlɛ lo, awo tɛrɛ lo tise lɛbɛ lɛbɛ!

²⁶ Petro ĩ hũ so ko, agbɔ̃ lo, aya lo ndozu, apa hɛ̃ lo ya: “Lo ndozu, ta sanga ma, mbi nga zo ma se tɛ mɔ.”

²⁷ La lo na Kɔrnɛyɛ ali ka ya da na tɛnɛngɔ tɛnɛ buai. Petro ĩ li ka ya da ko, lo hũ azi ma wo ma abombi tɛrɛ la ndoni kɔi.

²⁸ Lo pa hɛ̃ la ya: “Ĩ hĩnga ya, ndia tɛ e Ayuda akɛ̃ ya, ta wa Yuda kɔi adu songo ana zo mɛ ta lo wa Yuda ma. Ndia ni akɛ̃ nga ya, ta wa Yuda kɔi ali ka ya tɛ zo mɛ ta lo wa Yuda ma. Kanda Nzapa apa biri hɛ̃ mbi ya, ta mbi mu zo kɔi ya, bi tɛr-ɛ lo ma.

²⁹ Nda mɛ mbi ga na lo ti ila mɛ ĩ ili na mbi, ko ta mbi kɛ̃ ma la. Wa mbi ye hĩngangɔ nda mɛ ĩ ili na mbi.”

³⁰ La Kɔrnɛyɛ agbinya hɛ̃ lo ya: “Aɔ na olo bi ta, bo na gi tɛrɛ ngoi olo ko, mbi ndo tɛrɛ sambela mɛ ndodu na saa ta ti ndɔ. Ko bo ngoi kɔi, kɔli kɔi mɛ ayu bɔngɔ mɛ ndoza kɛni kɛni, asi gbɛlɛ mbi,

³¹ apa hɛ̃ mbi ya: ‘Kɔrnɛyɛ, Nzapa ama sambela tɛ mɔ, ko lo da nga bɛ lo na kaye mɛ mɔ ndoka hɛ̃ awa yɛlɛ.

³² Wa to akɔli ka kɔdɔrɔ ti Yope, ala ga na Simɔ mɛ mbanga ili lo la Petro. Petro ni ndola ka tɛ kɔli mɛ ili lo nga la Simɔ mɛ wa lɛkɛngɔ pɔrɔ sa, ko lo ndodu ka nyɔ kota ngu.’

³³ Bo na ngoi ni ko, mbi to azi pɛ mɔ, ko mɔ li nzɔ̃ni la mɔ ga. Wa na olo ko, e na mɔ zu ge gbɛlɛ Gbia Nzapa so mangɔ tɛnɛ zu mɛ ndo lo kpã na nyɔ mɔ ya, mɔ pa.”

Petro apa tɛnɛ na gbɛlɛ Kɔrnɛyɛ

³⁴ La Petro ato nda tɛnɛngɔ tɛnɛ ya: “Na olo ko, mbi hĩnga biani ya, azi zu ka lɛ Nzapa bo kwɛ kɔi.

³⁵ Kanda azi ti lɛ sese zu mɛ ndotɔndɔ lo, ndoli nga ye na seni ko, lo ndoye la.

³⁶ Ĩ hĩnga kwa mɛ ndo Nzapa ato hɛ̃ awa Izrayɛlɛ. Kwa ni adu Nzɔ̃ Pa ti bɛ pii mɛ zo alengbi ti luangɔ ti ndo Yezo Kristo mɛ Gbia tɛ azi zu.

³⁷ Ĩ hĩnga ye mɛ ndo ali ka lɛ sese ti Yudea zu, ato ka sese ti Galilea, na pɛ ngoi mɛ ndo Yoanɛ ndopa na lo ti mungɔ batisimɔ.

³⁸ Ĩ hĩnga se mɛ Nzapa asa na nguru tɛ Tɔrɔ Santo na tɛrɛ Yezo wa Nazarɛtɛ. Ĩ hĩnga nga se mɛ ndo Yezo afɔnɔ na ni na ndo kɔi kɔi. Lo li ndo anzɔ̃ lo, lo sara nga ndo azi zu mɛ na gbɛ ti Satana, ta sanga ma, Nzapa ndo ndoni kɔi na lo.

³⁹ E hũ aye kwɛ zu mɛ lo li ka sese tɛ Ayuda, nga na aye mɛ lo li ka Yeruzalɛmɛ. Ala gɔngɔ ndo lo ndo krusi, lo kpi.

⁴⁰ Kanda Nzapa aso ndo lo na pɛ bi ta. Nzapa aye ndo ya,

⁴¹ lo fa tɛrɛ lo na e mɛ ndo ni pia, ni sara ni kpã ya, e du atemwɛ tɛ ni, kanda ta lo fa ndo tɛrɛ lo na azi zu ma. Ngoi mɛ Nzapa aso lo na pɛ kwá ko, e na lo e tɛ, e nyɔ nga ndoni kɔi.

⁴² Yezo ahɛ̃ ndo e nyɔ ya, e pa tɛnɛ tɛ ni hɛ̃ azi, e nɛ nga hɛ̃ la ya, ni la Nzapa akpã ni ya, ni fa ngbanga tɛ azi mɛ ade lɛ la ngɛ̃, nga na ala mɛ akpili we.

⁴³ Awa pangɔ nyɔ Nzapa zu apa ndo tɛnɛ tɛ Yezo ya, na lo tɛ Yezo ko, Nzapa na kangɔ lɛ lo ndo siɔ ye tɛ azi zu mɛ aye lo tɛ Yezo.”

Azi mɛ ta Ayuda ma alua nguru tɛ Tɔrɔ Santo

⁴⁴ Ngoi mɛ Petro so ndotɛnɛ tɛnɛ ko, Tɔrɔ Santo azu ndo azi zu mɛ so ndoma tɛnɛ tɛ lo.

⁴⁵ Awa yengɔ lo tɛ Yezo mɛ Ayuda, mɛ ndo aga ndoni kɔi na Petro, abema ndo sĩ, na lo mɛ ya, Nzapa asa nguru tɛ Tɔrɔ Santo tɛrɛ azi mɛ ta Ayuda ma.

⁴⁶ Ta sanga ma, Ayuda ama ndo azi ko so ndotɛnɛ tɛnɛ na yanga mɛ ta ala hĩnga ma, ko ala ndogonda ndo nga ndima tɛ Nzapa. La Petro apa ya:

⁴⁷ “Azi olo mɛ alua Tɔrɔ Santo nga ma se tɛ e ko, ta alengbi ya, agbanzi la na mungɔ batisimɔ ti ngu ma!”

⁴⁸ Lo hɛ̃ nyɔ ya, ala mu batisimɔ na ili Yezo Kristo, la ala mu batisimɔ. Ko ala hũnda lo ya, lo ngbã ndoni kɔi na ani na pɛ bi yakere, la lo ye.