Awa Pangɔ Kwa 1 - Fana Ngbangɔ 1987

Yezo apa lo ti tongɔ Tɔrɔ Santo hɛ awa pango kwa tɛ lo

¹ Teofilɛ, na ya kɔzo buku tɛ mbi ko, mbi tɔndɔ nda ye kwɛ mɛ ndo Yezo ali, nga na ye kwɛ mɛ ndo lo ha na azi, na ngoi mɛ ndo lo to nda kwa tɛ lo, ngbĩi

² asi na ngoi mɛ Nzapa aya lo ya, lo ma ka yayu. Yezo asara ndo ambanga azi akpa ya, ala du awa pangɔ kwa tɛ ni. Uzu ti lo mangɔ ka yayu ko, lo pa ndo hɛ̃ la na nguru tɛ Tɔrɔ Santo, ye mɛ ale ala li na pɛ lo.

³ Na pɛ songɔ kwá tɛ lo ko, lo fa ndo tɛrɛ lo na la fani sĩni ya, ni de lɛ ni ngɛ̃. Na ya bi sui siɔ ko, lo si na gbɛlɛ la, lo tɛnɛ tɛnɛ hɛ̃ la na ndo lo Lɛngɔ Gbia tɛ Nzapa.

⁴ Mbanga lá kɔi mɛ ndo lo na ava lo so ndotɛ ye ko, lo hɛ̃ la nyɔ ya: “Ale ĩ ngba ge Yeruzalɛmɛ, ĩ ku ye mɛ To mbi ako kapa ni hɛ̃ ĩ. Ye ni ko adu ye mɛ ndo mbi pia mbi pa lo ni hɛ̃ ĩ uzu.

⁵ Ta sanga ma, Yoanɛ ayɔrɔ ndo azi na ya ngu so hɛ̃ngɔ la batisimɔ, kanda na pɛ bi yakere ko, mbi na sangɔ Tɔrɔ Santo na tɛrɛ ĩ so hɛ̃ngɔ ĩ batisimɔ.”

Yezo ama ka yayu

⁶ Awa pangɔ kwa tɛ Yezo mɛ ndo abombi tɛrɛ la so tɔ̃nda lo, ahũnda lo ya: “Gbia, mɔ na lingɔ ya, e lua lipandasi ti sese tɛ e awa Izrayɛlɛ na ngoi olo mɛ?”

⁷ La Yezo agbinya hɛ̃ la ya: “Adu lo ti ngoi mɛ aye na singɔ na ni ko, ta aba ĩ ma, na lo mɛ ya, To mbi akpã ngoi ti ye zu na nguru tɛ lo nvɛni.

⁸ Kanda ngoi mɛ Tɔrɔ Santo na zungɔ ndo ĩ ko, ĩ na luangɔ nguru. Ĩ na dungɔ atemwɛ ti pangɔ tɛnɛ tɛ mbi so Yeruzalɛmɛ, ka lɛ sese ti Yudea zu, na ti Samaria zu, nga ka nda sese gbɔ.”

⁹ Na pɛ tɛnɛ ni ko, Yezo alo so lɛ la, ama ka yayu, ko da baba avi lo, ta se kɔdɛ mɛ ya, ala ti hũ lo da ma.

¹⁰ Ala dɛ ndo so bangɔ lɛ ndozu, na ngoi mɛ Yezo so ndomina ko, akɔli sɛ mɛ ayu bɔngɔ ti mbufuni pa pa pa, asi bo na ngoi ni ko so gbɛlɛ la,

¹¹ apa hɛ̃ la ya: “Ĩ azi ti Galilea, nda mɛ ĩ ngbã na bangɔ lɛ ndozu nɛ? Yezo mɛ Nzapa aya lo na popo tɛ ĩ ya, lo ma ka yayu ko, lo diri gbanda lo ga, bo nga ma se mɛ ĩ hũ na lo, lo ma na ni ka yayu.”

Akpã zo kɔi na se lɛ Yudasi

¹² Awa pangɔ kwa tɛ Yezo alo ka ndo hɔtɔ mɛ ili ni la Olivie, so diringɔ ka Yeruzalɛmɛ. Hɔtɔ ni ko ndo ndũ na Yeruzalɛmɛ. Eongɔ Yeruzalɛmɛ singɔ ka tɛrɛ hɔtɔ ni ko adu nga ma kilomɛtrɛ kɔi.

¹³ Ala ĩ si ka Yeruzalɛmɛ, na se li ye tɛ la ko, ala ma ka ya da kɔi mɛ ka ndozu. Ili awa pangɔ kwa ni ko ndo lo mɛ: Petro, na Yoanɛ, na Zaki, na Andre, na Filipo, na Toma, na Bartelemi, na Matie, na Zaki mɛ nyi Alfe, na Simɔ wa gingɔ lipandasi, nga na Yudɛ mɛ nyi Zaki.

¹⁴ Ala na ambanga awe, na Maria mɛ ta Yezo, nga na ayata Yezo ndobombi ndo tɛrɛ la ndoni kɔi fani sĩni, ko nyɔ la ndose ndo kɔi na ngoi mɛ ala ndovɔrɔ Nzapa.

¹⁵ Mbanga lá kɔi, awa yengɔ lo tɛ Yezo abombi tɛrɛ la ndoni kɔi. Ala ndo kwɛ zu nga ma ngbangbo kɔi ndoni sui sɛ. La Petro alo ndozu so popo tɛ la, apa hɛ̃ la ya:

¹⁶ “Aya bua, ye mɛ ndo Tɔrɔ Santo apia apa lo ni ka ya Buku tɛ Nzapa ko, ale ye ni ko ali nga biani. Davidi la apa ndo lo ye ni ko na nguru tɛ Tɔrɔ Santo. Lo pia ndo lo pa lo tɛnɛ tɛ Yudasi mɛ ade na li nɔ tɛ azi mɛ ndo agbɔ̃ Yezo.

¹⁷ Yudasi ndo na li nɔ tɛ e, e na lo e ndoli ndo kwa ndoni kɔi.”

¹⁸ (Azi avɔ̃ ndo nyɔ Yudasi na faranga, na lo mɛ ya, lo ka ndo Yezo hɛ̃ la. Ko Yudasi amu faranga ni, avɔ̃ na yaka. Mbanga lá kɔi ko, lo ti ka lɛ yaka ni, lo to li lo na sese uzu, ya lo asumbu, ya tɛrɛ lo akangbi na ndo bɛ ni, la vĩ lo asakpa.

¹⁹ Azi ti Yeruzalɛmɛ zu ama ndo pa ni. Nda mɛ ala ndoili yaka ni ko na yanga tɛ la ya: “Hakɛldama” la. Nda Hakɛldama ni ya: “yaka ti mɛnɛ”.)

²⁰ Petro apa nga ya: “Asu ka ya buku ti Bia ya: ‘Azi zu adɔ bɛ da tɛ lo azia ma ke! Ko ta zo mɛ ndɛ̃ ala bɛ na ya da ni ma ke!’ Asu nga ya: ‘Zo mɛ ndɛ̃ ali bɛ kwa na se lɛ lo ma ke!’

^21-22 “Ale mbanga zo kɔi ali na popo tɛ e, lo du temwɛ ti songɔ tɛ Gbia Yezo na pɛ kwa. Ale zo ni ko adu mbanga zo kɔi na popo tɛ azi mɛ ndo e na la e ndoɔ ndoni kɔi, na ngoi zu mɛ ndo e na Gbia Yezo e ndofɔnɔ na lɛ kɔdɔrɔ, ato na ngoi mɛ Yoanɛ ahɛ̃ Yezo batisimɔ, asi na lá mɛ Nzapa aya lo na popo tɛ e ya, lo ma ka yayu.”

²³ Asara ndo azi se: zo ti kɔi Ia Yozɛfu mɛ andoili nga lo ya Barsabasi, mbanga ili lo mɛ ndɛ̃ la Yustusi, zo ti sɛ la Matiasi.

²⁴ So pɛni, ala kwɛ zu asambela ya: “Gbia, mɔ mɛ mɔ hĩnga bɛ azi zu, na popo tɛ azi olo sɛ ko, fa e na zo mɛ mɔ ye ya,

²⁵ lo li kwa na se lɛ Yudasi, ko lo du wa pangɔ kwa tɛ Yezo. Ta sanga ma, Yudasi azia ndo kwa tɛ lo, ko lo gwe na ndo mɛ alengbi na lo.”

²⁶ Ala ĩ sambela we ko, ala dɛ zeke so gingɔ zo kɔi na popo tɛ azi ko sɛ. Ko zeke afa Matiasi, la lo li na Ii nɔ tɛ awa pangɔ kwa tɛ Yezo mɛ ndo angbã sui kɔi ndoni kɔi.