3 Yoanɛ 1 - Fana Ngbangɔ 1987

Balangɔ

¹ Mbi mɛ kangba ti Eklezia la mbi su mbɛti olo hɛ̃ mɔ Gayusi, mɔ kwa mbi mɛ mbi ye mɔ bɛ mbi kɔi. Mbi bala mɔ.

² Kwa mbi ti kpɔ̃ bɛ mbi, mbi ndovɔrɔ Nzapa ya, ye zu tɛ mɔ adɔ nɔ na seni. Mbi ye ya gbe tɛrɛ mɔ adu nzɔ̃ni, nga ma se mɛ tɔrɔ tɛrɛ mɔ ndodɔ nɔ na seni ka gbɛlɛ Nzapa.

³ Azi ti Eklezia mɛ ndoga ge ndopa hɛ̃ mbi ya, mɔ ndodɔ nɔ ngoi zu bɛ mɔ kɔi na bɛta lege tɛ Nzapa, ko bɛ mbi ade sĩ nvɛni na lo ni. Biani, se li ye tɛ mɔ la.

⁴ Ngoi zu mɛ mbi ndoma ya, aya mbi ndodɔ nga nɔ na bɛta lege tɛ Nzapa ko, bɛ mbi ndode aɔ ndo aye mɛ ndɛ̃ zu.

Se li ye tɛ Gayusi

⁵ Gayusi, kwa mbi ti kpɔ̃ bɛ mbi, mɔ ndoli ye na seni, mɔ ndoza awa Kristo, bɛ nga awa Kristo mɛ awa fɔnɔ ko, mɔ ndoza nga la.

⁶ Awa Kristo mɛ ndo mɔ za la ko, ala ga agonda mɔ na gbɛlɛ azi ti Eklezia mɛ ge. Mbi gbɔ̃ gɛrɛ mɔ ya, mɔ za bo la nga ma se ko la Nzapa aye, ko ala gwe fɔnɔ tɛ la ngbĩi, akɔ nda ni.

⁷ Fɔnɔ ko la ala gwe ko, ala nɔ so lingɔ kwa tɛ Yezo Kristo, ko ta ala ndoye ya, apaganɔ aza ani ma.

⁸ Ale e awa Kristo e za gi tɛrɛ azi ko, wa e na la e bombi e li kwa na lo ti bɛta lo tɛ Nzapa.

Lo tɛ Diotrɛfɛ na Demetriusi

⁹ Mbi su ndo nyi mbɛti mbi to hɛ̃ azi ti Eklezia tɛ mɔ. Ko Diotrɛfɛ akɛ̃ ya, ta ni ma nyɔ mbi ma, na lo mɛ ya, lo ye ya ni du gbia ti ndo azi ti Eklezia.

¹⁰ Ngoi mɛ gbanda mbi si kai ko, mbi suru nda lo na lo ti asiɔ ye mɛ lo li, na lo ti asiɔ tɛnɛ, nga na lo ti nvɛnɛ mɛ lo ndopa na ili e. Ta kɔtɛ siɔ ye mɛ lo ndoli la ma: awa Kristo mɛ ndogwe fɔnɔ, ndosi nga ka tɛ lo ko, lo ndokɛ̃ yambangɔ la. Lo ndogbanzi afɔ̃ lo mɛ ndɛ̃ mɛ aye yambangɔ awa fɔnɔ, lo ndogi nga kɔdɛ ya, ni toma afɔ̃ ni ko ka ya Eklezia.

¹¹ Kwa mbi ti kpɔ̃ bɛ mbi, ta mɔ mu se li ye tɛ zo ko ndoli siɔ lo ma, mu se li ye tɛ wa lingɔ nzɔ̃ lo. Zo ko ndoli nzɔ̃ lo ko, zo tɛ Nzapa la, kanda zo ko ndoli siɔ lo ko, ta lo hĩnga Nzapa ma.

¹² Azi zu ndogonda Demetriusi na lo nzɔ̃ ye mɛ lo ndoli, ko dɔngɔ nɔ tɛ lo na bɛta lege tɛ Nzapa ndofa nga ni. E nvɛni e pa nga ya, lo ndoli nzɔ̃ni, ko mɔ hĩnga ya, tɛnɛ ko e tɛnɛ ko adu biani.

Ndangba tɛnɛ

¹³ Mbi na tɛnɛ ma wo ma ya, mbi tɛnɛ hɛ̃ mɔ, kanda ta mbi ye ya, mbi su ni na mbɛti ma.

¹⁴ Mbi da bɛ mbi ya, na pɛ ngoi yakere ko, mbi na gangɔ kai so bangɔ mɔ, ko e na mɔ nvɛni e tɛnɛ tɛnɛ.

¹⁵ Nzapa ali bɛ ya, bɛ mɔ adu pii ma ke! Afɔ̃ mɔ mɛ ge abala mɔ. Bala afɔ̃ e mɛ kai kɔi kɔi zu hɛ̃ e.