2 Yoanɛ 1 - Fana Ngbangɔ 1987

Balangɔ

¹ Mbi mɛ kangba ti Eklezia la mbi su mbɛti olo hɛ̃ mɔ zo wali mɛ Nzapa asara mɔ akpã mɔ ya, mɔ du zo tɛ ni. Mbi su nga ni hɛ̃ aya mɔ mɛ mbi ye la na bɛ mbi kɔi. Mbi bala ĩ. Ta bo mbi kɔi la mbi ye ĩ ma, kanda azi zu mɛ ahĩnga bɛta lo tɛ Nzapa aye nga ĩ.

² Mbi ye ĩ na lo bɛta lo tɛ Nzapa mɛ e hĩnga, ko bɛta lo ni na ngbãngɔ ge ya bɛ e ti buai.

³ To e Nzapa na Nyi lo Yezo Kristo ali bɛ nzɔ̃ bɛ hɛ̃ e ma ke! Ala ma bɛ vundu tɛ e ma ke! Ala li bɛ nga ya, bɛ e adu pii ma ke! Biani, e mɛ e ye lo bɛta lo tɛ lo, ko e ndoyengbi nga ko, ala na lingɔ ni hɛ̃ e.

Lo yengbingɔ

⁴ Bɛ mbi ade ndo sĩ nvɛni, na ngoi mɛ mbi ma ya, ambanga aya mɔ ndodɔ nɔ na bɛta lege, nga ma se mɛ To e Nzapa apa na ni.

⁵ Ta gbia mbi, na olo ko, ma tɛnɛ mɛ mbi ye tɛnɛngɔ hɛ̃ mɔ lo mɛ: ale e ndoyengbi. Ndia olo mɛ mbi su hɛ̃ mɔ ko, ta adu fana ndia ma, adu ngbina ndia mɛ ndo e ma gã la.

⁶ Se e ye Nzapa ko, ale e ndotɔndɔ nga ndia mɛ lo lu hɛ̃ e. Ko nga ma se ko ndo ĩ ma na ni kɔzoni ko, ndia tɛ Nzapa ndonɛ ya, ale ĩ ndoyengbi.

Lo tɛ awa nvɛnɛ

⁷ Mbi pa tɛnɛ olo hɛ̃ ĩ, na lo mɛ ya, awa nvɛnɛ ma wo ma alengbi na lɛ sese, ko ala ndokɛ̃ ya, ta Yezo Kristo amu ndo tɛrɛ zo, la lo ga ge lɛ sese ma. Zo ko atɛnɛ nga so ko, lo wa nvɛnɛ, lo nga wa kɛ̃ngɔ Yezo Kristo.

⁸ Na lo ni ko, ĩ́ du na kpengba lɛ, so kwa mɛ ĩ li agwe gɛgɛrɛ. Ĩ li kpengbani, wa gbanda ĩ lua mbana gɛrɛ ĩ zu.

⁹ Zo ko la adɔ ye mɛ ndo Kristo aha na e azia, ama tɛnɛ mɛ ndɛ̃ ko, ta zo ni ko ahĩnga Nzapa ma. Wa ye mɛ ndo Yezo Kristo aha, zo ko la abata ni ka bɛ lo ko, zo ni ahĩnga To e Nzapa, lo hĩnga nga Nyi lo Yezo Kristo.

¹⁰ Se zo aga ka tɛ ĩ, wa se ta lo ha ĩ na tɛnɛ olo ma ko, ta ĩ yamba lo ma, ta ĩ bala bɛ nga lo ma.

¹¹ Ta sanga ma, zo ko la abala lo ko, afa ya, zo ni ko aye lo siɔ ye mɛ lo Ĩi.

Ndangba tɛnɛ

¹² Mbi na tɛnɛ ma wo ma ya, mbi tɛnɛ hɛ̃ ĩ. Kanda ta mbi ye ya, mbi su ni na mbɛti ma. Mbi ndosepara ya, mbi ga kai, mbi ba ĩ, mbi nvɛni e na ĩ e tɛnɛ tɛnɛ, wadila bɛ e zu ade.

¹³ Nyita mɔ ti wali mɛ ge, lo mɛ Nzapa asara lo akpã ko, aya lo abala mɔ.