2 Petro 3 - Fana Ngbangɔ 1987

Kapa ti gangɔ tɛ Gbia Yezo Kristo

¹ Aya bua, ĩ́ ba mbɛti ti sɛ mɛ mbi su, mbi to hɛ̃ ĩ lo mɛ. Na ya mbɛti ko ndo ti uzu, nga na ya omɛ ti sɛ ko, mbi diri na ndo aye mɛ ĩ hĩnga we. Mbi li so ya, ĩ da bɛ ĩ na ni, wadila ĩ li ni na seni.

² Mbi separa ya, ĩ da bɛ ĩ na atɛnɛ mɛ ndo abɛta awa pangɔ nyɔ Nzapa apia apa. Mbi separa ya, ĩ da nga bɛ ĩ na ndia mɛ ndo Gbia tɛ e Yezo Kristo mɛ Wa songɔ e alu, la awa pangɔ kwa tɛ lo aha na ĩ.

³ Ale ĩ hĩnga uzu ya, na ngoi mɛ gbanda sese adoli ti wɛngɔ ko, ambanga azi mɛ ndoli ye na se gwɛ̃ ti tɛrɛ la asi gbanda. Ala e gbanda ĩ,

⁴ ala hũnda gbanda ĩ ya: “Yezo ako ndo kapa ya, ni na diringɔ gangɔ, wa ta lo ti diri lo ga ma ya nɛ?” Ala pa nga gbanda ya: “Akotara e akpili ndo we, ko aye zu adɛ bo na se ko ndo Nzapa ali na ni, ka ndo lo li na sese!”

⁵ Azi ni ko ndokɛ̃ na sana ya, ta ani hĩnga ya, ndo gã ko, Nzapa ali ndo ndozu na sese na tɛnɛ ti nyɔ lo ma. Se ko la Nzapa aha sese ka ya ngu asi na ni ko, se mɛ nga lo ndoka sese na ngu la.

⁶ Adu nga bo na lo ti ngu mɛ ndo ani amu le sese zu la Nzapa akpɔ azi zu.

⁷ Nga bo tɛnɛ ti nyɔ Nzapa la adɛ abata ndozu na sese mɛ e ndohũ na olo mɛ so kungɔ lá ti fangɔ ngbanga. Adu lá mɛ gbanda lo bi na wá da, lo zɔ, ko lo fa nga ngbanga tɛ asiɔ azi, lo sa la ka lifɛlo la.

⁸ Aya bua, ĩ ma tɛnɛ kɔi mɛ ale ta bɛ ĩ ali na ni ma lo mɛ: tɛ Gbia Nzapa ko, bi kɔi na buru koto kɔi ka lɛ lo bo kwɛ kɔi.

⁹ Ambanga azi ndoda bɛ la ya, Gbia ndondanga tɛrɛ lo na lingɔ aye mɛ ndo lo ko kapa ni. Ipɔ, ta seni la ma! Lo na lingɔ aye mɛ ndo lo ko kapa ni. Kanda lo na yɔngɔrɔ bɛ na ndo ĩ, na lo mɛ ya, ta lo ye ya, zo kɔi ayu ndo ma. Kanda lo ye tɛ lo ya, azi zu agbinya bɛ la.

¹⁰ Lá ti gangɔ tɛ Gbia abuta gbanda azi nga ma se tɛ wa nzĩ mɛ ta zo kɔi ndohĩnga gangɔ tɛ lo ma. Na lá ko gbanda ko, ndozu amina gbanda, ko azi ama kota gigi ni. Wá agbiri gbanda aye mɛ ka lɛ ndozu, ko sese nvɛni na aye zu mɛ so lɛ ni amina nga.

¹¹ Oko la aye zu na minangɔ nga so ko, ale ĩ du na kpengba lɛ na ya du tɛ ĩ. Ale se li ye tɛ ĩ adu bɛtani, ko ĩ li nga ye mɛ ndode bɛ Nzapa.

¹² Ale ĩ ndoku bi ti gangɔ tɛ Nzapa, ko í li nga kpengbani ya, bi ni ko alengbi hiɔ. Na lá ko gbanda ko, wá agbiri gbanda ndozu, aye mɛ ka lɛ ndozu azongana gbanda zu na lo ti baba ti menga wá mɛ gbanda aza lau lau.

¹³ Nzapa ako ndo kapa ya, ni na lingɔ fana ndozu na fana sese. Ko bo aye mɛ nzɔ̃ni, nga na azi mɛ ndoli ye na seni gbanda la adu ka da. Ĩ ba ye mɛ e ndoku la.

¹⁴ Aya bua, nda mɛ na ngoi ko la ĩ ndoku la ti gangɔ tɛ Gbia ko, ale ĩ li kpengbani ya, í du na vuru bɛ la. Wa na ngoi ko la lo diri lo ga ko, ta lo bela ĩ na lo siɔ ye kɔi ma, ko ĩ du nga na bɛ ĩ pii ka gbɛlɛ lo.

¹⁵ Ĩ hĩnga ya, Gbia tɛ e na yɔngɔrɔ bɛ, ko lo ye ya, ĩ lua ngoi, ĩ gbinya bɛ ĩ, wa ni so ĩ. Tɛnɛ olo mbi ndotɛnɛ hɛ̃ ĩ ko, Polo mɛ nyita e ti kpɔ̃ bɛ e asu nga ndo ni hɛ̃ ĩ na ndara mɛ Nzapa ahɛ̃ lo.

¹⁶ Ngoi zu mɛ lo ndosu mbɛti na lo ti diringɔ tɛ Gbia ko, lo ndotɛnɛ bo ngi lɛ tɛnɛ ko kɔi. Na ya mbɛti tɛ Polo ko, ambanga tɛnɛ da mɛ mangɔ nda ni akpengba sĩ. Ko azi mɛ ta na ndara ma, bɛ la nga woni ndogbinya atɛnɛ ni ati ndɛ̃, nga ma se mɛ ala ndogbinya na ambanga tɛnɛ mɛ ndɛ̃ ti ya Buku tɛ Nzapa, ati ndɛ̃. Ye ko ala ndoli ko, afa ya, ala ndogi ya Nzapa afa ngbanga abi li ani.

¹⁷ Aya bua, na olo ko, mbi tisa ĩ wɛ. Wa ĩ du na kpengba lɛ ya, ta asiɔ azi ahanda ĩ ma, so ĩ mu lege tɛ la ti lingɔ siɔ ye, ko ĩ dɔ nga lege tɛ Nzapa mɛ ndo ĩ kpengba da í zia.

¹⁸ Kanda ale ĩ ngbã bo na maingɔ na ya lo yengɔ tɛ ĩ, wadila Gbia tɛ e Yezo Kristo mɛ Wa songɔ e andoli nzɔ̃ bɛ hɛ̃ ĩ, ko ĩ hĩnga nga lo nzɔ̃ni. É gonda Gbia tɛ e na olo, é gonda nga lo buru na buru zu! Seni la.