2 Timɔte 4 - Fana Ngbangɔ 1987

¹ Mbi gbɔ̃ gɛrɛ mɔ na ili Nzapa, nga na ili Yezo Kristo mɛ gbanda afa ngbanga tɛ azi mɛ lɛ la ngɛ̃, nga na tɛ awa kwáni. Na ili Yezo mɛ gbanda aga so lɛngɔ gbia ko, mbi gbɔ̃ gɛrɛ mɔ ya,

² abɛ na nzɔ̃ ngoi, bere na siɔ ngoi ko, pa bo tɛnɛ tɛ Nzapa, ko mɔ pa ni mɔ diri ndo ni. Azi ko la ali siɔ ye ko, fa la na siɔ ye tɛ la, bela la na lo siɔ ye mɛ ala li, ko mɔ sa nguru bɛ la ya, ala li nzɔ̃ ye. Du na yɔngɔrɔ bɛ sĩ nvɛni na ngoi mɛ mɔ ndoha azi na tɛnɛ tɛ Nzapa.

³ Ta sanga ma, na mbanga ngoi gbanda ko, ta azi ti ye gbanda mangɔ bɛta, lo tɛ Nzapa mɛ andoha ma. Ala li tɛ la gbanda ye mɛ bɛ la nvɛni asepara. Na lo ni ko, ala bombi gbanda awa hangɔ ye so gunda la gba ya, ala ha ani na ye mɛ ani ye mangɔ.

⁴ Ala kɛ̃ gbanda mangɔ bɛta lo tɛ Nzapa. Ala dɔ gbanda bɛta lo azia, ko ala zi ma la zu so mangɔ agɛgɛrɛ tɛnɛ ti mbaye.

⁵ Kanda tɛ mɔ ko, li ye zu na nyɔ kpɔ̃ ni, gbe bɛ mɔ na ya apɛnɔ, li kwa tɛ mɔ ti pangɔ Nzɔ̃ Pa hɛ̃ azi. Kwa mɛ Nzapa ahɛ̃ mɔ ko, li kwa ni, mɔ kɔ nda ni kpɛkɛlɛ.

⁶ Wa tɛ mbi ko, ngoi ti lungɔ tɛrɛ mbi na Nzapa alengbi we, ngoi ti kwá tɛ mbi alengbi nga we.

⁷ Mbi tiri nzɔ̃ to na lo kwa tɛ Nzapa we. Ko adu nga ma kpɛ la mbi kpɛ ngbĩi mbi si ka nda ni gbɔ. Ta mbi dɔ lo yengɔ lo tɛ Yezo Kristo mbi zia ma.

⁸ Ko na olo ko, Gbia Nzapa abata mbana gɛrɛ mbi ka yayu so kungɔ na mbi. Lo mɛ wa fangɔ ngbanga na seni ko, lo hɛ̃ mbi gbanda mbana gɛrɛ mbi na lá ti fangɔ ngbanga, na lo mɛ ya, lo mu mbi ka lɛ lo ya, mbi bɛta zo. Ta bo mbi kɔi gbanda la lo hɛ̃ mbi mbana gɛrɛ mbi ma. Kanda azi zu mɛ aye ya, lo na diringɔ gangɔ, ko ala ndoku lo ko, lo hɛ̃ nga la gbanda mbana gɛrɛ la.

Polo angba na kunɛ lo

⁹ Li kpengbani mɔ ga hiɔ mɔ tã mbi,

¹⁰ ta sanga ma, Demasi adɔ mbi azia, agwe ka Tɛsalɔnikɛ, na lo mɛ ya, bɛ lo aye alo ti ngoi olo sĩ nvɛni. Krɛsana agwe ka Galatia, Tito agwe tɛ lo ka Dalmatia.

¹¹ Bo Luka kɔi la e na lo e ngbã ge. Mu Marko mɔ ga na lo, ta sanga ma, lo lengbi ti zangɔ mbi na ya kwa tɛ mbi.

¹² Mbi to Tisikɛ ka Efɛzɛ.

¹³ Na gangɔ tɛ mɔ ko, mu bɔngɔ ti de tɛ mbi mɛ ndo mbi zia ka tɛ Karpusi ka Troasi, mɔ ga na ni hɛ̃ mbi. Ga nga na abuku, mai bo abuku mɛ alɛkɛ na pɔrɔ sa.

¹⁴ Alɛkizandrɛ mɛ wa turu ali ndo asiɔ ye tɛrɛ mbi ma wo ma, ko Gbia Nzapa afuta gbanda lo alengbi na siɔ ye tɛ lo mɛ lo li.

¹⁵ Bata li mɔ na Alɛkizandrɛ, na lo mɛ ya, alo zu mɛ e ndopa ko, lo kɛ̃ ndo ni kpengbani nvɛni.

¹⁶ Ngoi mɛ ndo mbi kambisa na nyɔ mbi ti kɔzoni ka gbɛlɛ awa fangɔ ngbanga ko, ta zo kɔi agbɔ̃ ndo koko ndo mbi ma, azi zu adɔ ndo mbi azia. Wa Nzapa azia bɛ kpãngɔ bɛ lo ndo siɔ ye tɛ la ma ke!

¹⁷ Abɛ so ko, Gbia Yezo Kristo alo ndo so gunda mbi, ahɛ̃ nga mbi nguru. Na lo ni ndo la mbi pa tɛnɛ tɛ lo zu hɛ̃ azi zu mɛ ta Ayuda ma. Adu nga ma Gbia ahã ndo mbi na yanga abamara.

¹⁸ Ko mbi hĩnga ya, lo hã nga gbanda mbi na ya asiɔ ye zu. Lo bata gbanda mbi nzɔ̃ni ngbĩi nga ka mbi si ka Kɔdɔrɔ Gbia tɛ lo mɛ ka yayu. É gonda lo buru na buru. Seni la!

Ndangba balangɔ

¹⁹ Pa hɛ̃ Prisiyɛ na ya lo Akilasi ya, mbi bala la. Pa nga hɛ̃ Onezifɔre na azi ti nda se wa tɛ lo ya, mbi bala nga la.

²⁰ Erastɛ angbã ka Kɔrinto, mbi zia Trofimɛ ka Milɛ, na lo mɛ ya, tɛrɛ lo asɔ ndo.

²¹ Li kpengbani mɔ ga uzu ti ngoi ti de. Ebulusi, na Pudɛnsi, na Linusi, na Klodia mɛ zo wali, nga na ayata e awa Kristo mɛ ndɛ̃ zu mɛ ge abala mɔ.

²² Gbia Yezo adu bɛ ndoni kɔi na mɔ ma ke! Nzapa ali bɛ nzɔ̃ bɛ hɛ̃ ĩ awa Kristo ma ke!