2 Timɔte 3 - Fana Ngbangɔ 1987

Ndangba ngoi

¹ Timɔte, ale mɔ hĩnga nzɔ̃ni ya, na ngoi ko gbanda sese adoli ti wɛngɔ ko, mbanga ngoi adu gbanda ngoi ti pɛnɔ.

² Na ngoi ko gbanda ko, azi adu gbanda awa kinya, awa gwɛ̃ faranga, awa gwalo, awa yakɛ. Ala guru gbanda Nzapa, ala kɛ̃ gbanda nyɔ awa dúngɔ la. Ta ala hĩnga gbanda nzɔ̃ lo mɛ Nzapa ali tɛrɛ la ma. Ta ala tɔndɔ nga gbanda ye mɛ santo ma.

³ Ala du gbanda awa zaga, azi mɛ ta ndoma vundu tɛ zo ma, awa dingɔ azi, awa karangɔ ló, azi mɛ ta ndofɔ̃ bɛ la ma, awa tɔmbɔkɔ, awa kɛ̃ngɔ nzɔ̃ lo.

⁴ Ala du gbanda awa tɛngɔ gbe kuni afɔ̃ la, azi mɛ ndoli ye na ndo li la, azi mɛ ndoyakɛ tɛrɛ la sĩ. Ala kɛ̃ gbanda Nzapa, ko ala ye tɛ la alo mɛ ndode bɛ zo.

⁵ Ala ye tɛ la gbanda lo Nzapa ni bo na pɔrɔ nyɔ la, ala kɛ̃ nga gbanda bɛta nguru ti lo Nzapa. Azi ko nga so ko, ta mɔ li na popo tɛ la ma.

⁶ Ambanga azi na popo tɛ la ndoli ya da tɛ azi, ahanda awe mɛ bɛ la woni, ko awe ni aye lo tɛ la. Awe ni ko adu awe mɛ asiɔ ye ako ndo la, awe mɛ ndodu na gwɛ̃ ti asiɔ ye ndɛ̃ ndɛ̃ ndɛ̃,

⁷ awe mɛ ndogi ngoi zu ya, ani hĩnga ye, kanda ta ala lengbi ti hĩngangɔ bɛta lo tɛ Nzapa bɛ gbɔ ma.

⁸ Se ko ndo la Yanɛsi na Yambrɛsi akɛ̃ na nyɔ Mɔizɛ ko, se mɛ nga azi ni ko ndokɛ̃ na bɛta lo tɛ Nzapa la. Azi ni ko adu azi mɛ kɔdɛ tɛ la agbɛ̃, lo yengɔ tɛ la adu nga gɛgɛrɛ.

⁹ Kanda ta ala na gwengɔ yɔngɔrɔni ma, ta sanga ma, azi zu ahĩnga gbanda ya, ala du awa buba, nga ma se ko ndo azi ahĩnga ya, Yanɛsi na Yambrɛsi adu awa buba.

Andangba wangɔ

¹⁰ Wa tɛ mɔ ko, mɔ hĩnga ye mɛ mbi ndoha na azi, mɔ hĩnga nga se li ye tɛ mbi. Mɔ hĩnga nda kwa mɛ mbi ndoli, mɔ hĩnga se mɛ mbi ye na lo tɛ Yezo bɛ mbi kɔi. Mɔ hĩnga yɔngɔrɔ bɛ tɛ mbi, mɔ hĩnga yengɔ mɛ mbi ye na azi, mɔ hĩnga nga gbengɔ bɛ tɛ mbi.

¹¹ Mɔ hĩnga giangɔ mɛ ndo azi agia na mbi, nga na apɛnɔ mɛ ndo mbi hũ. Mɔ hĩnga alo zu mɛ ndo asi na mbi ka Antiɔsɛ, ka Ikɔniɔmɛ nga ka Listrɛ, mɔ hĩnga nga ya, agia ndo mbi sĩ. Ko Gbia aso ndo mbi na ya apɛnɔ ko zu.

¹² Ti biani, azi zu ko la ndoye lingɔ ye mɛ ndode bɛ Nzapa, na lo mɛ ya, ala na Yezo ati bo kɔi ko, azi na giangɔ la.

¹³ Wa tɛ asiɔ azi, nga na awa handangɔ azi ko, ala ndogwe bo uzu uzu na lingɔ siɔ ye. Ala ndohanda afɔ̃ la, ko ahanda nga gbanda la nvɛni.

¹⁴ Wa tɛ mɔ ko, alo mɛ ndo aha na mɔ, nga na alo mɛ ndo mɔ ye lo ni na bɛ mɔ kɔi ko, gbɔ̃ ni ka ka ka. Mɔ hĩnga ya, azi ko ndo aha mɔ na alo ni ko ko, ala du abɛta azi.

¹⁵ Ato na ngoi ko ndo mɔ dɛ nyingambi, anɔ ngbĩi asi na lá olo ko, mɔ hĩnga atɛnɛ ti ya Buku tɛ Nzapa. Atɛnɛ ni ko alengbi ti sangɔ ndara bɛ mɔ ya, mɔ ye lo tɛ Yezo Kristo, wa Nzapa aso mɔ.

¹⁶ Atɛnɛ tɛ Nzapa zu mɛ asu na ya Buku ko, adu atɛnɛ mɛ alo ka nyɔ lo. Ko atɛnɛ ni ndoza zo na hangɔ bɛta lo tɛ Nzapa, fangɔ zo na siɔ ye mɛ lo li, lonzingɔ zo, nga na fangɔ zo na lege ti lingɔ ye na seni,

¹⁷ wadila zo tɛ Nzapa ati zo mɛ alua aye zu mɛ lo lengbi ti lingɔ na nzɔ̃ kwa.