2 Timɔte 2 - Fana Ngbangɔ 1987

Da bɛ mɔ na Yezo Kristo

¹ Wa mɔ nyi mbi, kpengba na lege ti nzɔ̃ bɛ mɛ Yezo Kristo ndoli hɛ̃ mɔ.

² Tɛnɛ mɛ ndo mbi tɛnɛ hɛ̃ azi ma wo ma, ala aye lo ni ko, mu bo tɛnɛ ni ko, mɔ ha na abɛta azi mɛ ala lengbi ti hangɔ na azi mɛ ndɛ̃.

³ Ale mɔ hũ pɛnɔ nga ma mbi, na lo ko la mɔ du bɛta turugu tɛ Yezo Kristo.

⁴ Zo ko la ndoli kwa ti turugu, se lo ye ya, ni li ye ti dengɔ na be gbia tɛ ni ko, ta lo lengbi ti lingɔ na ya alo tɛ azi mɛ ndɛ̃ ma. Ko mbi ye ya, mɔ du nga so.

⁵ Zo ko nga la ndokpe kpɛ so luangɔ mbana gɛrɛ lo, se ta lo kpɛ kpɛ ni na seni ma ko, ta lo lua nga mbana gɛrɛ lo ma.

⁶ Wa sɛ̃ngɔ yaka ko la ndoli kwa kpengbani ko, lo la lo ndolua ye ti yaka uzu.

⁷ Tɛnɛ mɛ mbi tɛnɛ hɛ̃ mɔ ko, binga bɛ mɔ na ndo ni, ta sanga ma, Gbia Yezo na sangɔ kɔdɛ bɛ mɔ, wa mɔ hĩnga nda atɛnɛ ni ko zu.

⁸ Da bɛ mɔ na Yezo Kristo mɛ ndo tara gbia Davidi. Lo kpi ndo, Nzapa aso lo na pɛ kwá, ko Nzɔ̃ Pa mɛ mbi ndopa hɛ̃ azi anɛ nga so.

⁹ Na lo ti Nzɔ̃ Pa ni la agbe mbi na nzingiri, mbi ndohũ pɛnɔ ma bere mbi wa lingɔ siɔ ye. Mbi la agbe mbi, kanda ta agbe tɛnɛ tɛ Nzapa ma.

¹⁰ Na lo ni la mbi ndogbe bɛ mbi na ya alo zu, na lo tɛ azi mɛ ndo Nzapa asara la akpã ya, ala du azi tɛ ni. Mbi li so ya, Nzapa aso la ti ndo Yezo Kristo, ko ala lua nga ndima ti kaka.

¹¹ Atɛnɛ olo adu abɛta tɛnɛ. Atɛnɛ ni lo mɛ: “Se e na lo e kpili kɔi ko, gbanda ko e na lo e du nga lɛ e ngɛ̃ kɔi.

¹² Se e gbe bɛ e ko, gbanda ko e na lo e lɛ nga gbia kɔi. Se e kɛ̃ lo ko, gbanda ko lo kɛ̃ nga e.

¹³ Kanda se e du awa wezangɔ ló ko, ta lo ndoweza tɛ lo ló ma. Ta sanga ma, ta lo lengbi ti tɛnɛngɔ tɛnɛ nyɔ lo sɛ sɛ ma.”

Li kwa mɛ ndode bɛ Nzapa

¹⁴ Ale mɔ ndoda bɛ awa Kristo na atɛnɛ mɛ mbi tɛnɛ hɛ̃ mɔ. Gbɔ̃ gɛrɛ la na ili Nzapa ya, ta ala pa pa na lo ti abuba tɛnɛ ma. Ta pangɔ pa ndoza zo bɛ yakere ma, pangɔ pa ndogbɛ̃ tɛ lo bɛ azi mɛ ndoma ni.

¹⁵ Li kpengbani, mɔ ti zo mɛ Nzapa alengbi ti gondangɔ lo, ko mɔ du wa kwa mɛ ta kamɛnɛ ti kwa tɛ lo ndogbɔ̃ lo ma. Ale mɔ pa hɛ̃ azi tɛnɛ mɛ aba bɛta lo tɛ Nzapa na seni.

¹⁶ Gɛgɛrɛ tɛnɛ, na tɛnɛ mɛ ta ndode nga bɛ Nzapa ma ko, ta mɔ yɔrɔ nyɔ mɔ da ma. Ta sanga ma, azi ko la ndotɛnɛ gi tɛrɛ atɛnɛ ni ko, ala ndoyu lege tɛ Nzapa, agwe yɔngɔrɔni.

¹⁷ Tɛnɛ mɛ ala ndotɛnɛ ndogbɛ̃ zo nga ma se mɛ kã mɛ aɛnɛ ndotɛ mi tɛrɛ zo. Imeneo na Filɛtɛ nga na li nɔ tɛ azi ni ko.

¹⁸ Ala dɔ lege ti beta lo azia, ala ndopa ya, e so na pɛ kwá wɛ, ko na lo tɛ la la azi ma wo ma azia yengɔ lo tɛ Yezo.

¹⁹ Kanda Eklezia tɛ Nzapa adu nga ma da mɛ akpã gu gɛrɛ ni kpengbani. Asu tɛnɛ ka tɛrɛ gu gɛrɛ da ni ko ya: “Gbia ahĩnga azi tɛ lo.” Asu nga ya: “Zo ko la ndopa ya, ni zo tɛ Gbia ko, ale lo zia lege ti lingɔ siɔ ye.”

²⁰ Ka ya da tɛ kota zo ko, lɛ aye ti tɛngɔ na tɛ ndodu ndɛ̃ ndɛ̃ ndɛ̃. Ambanga mɛ alɛkɛ na wɔrɔ bere na nwa da, ambanga mɛ ndɛ̃ mɛ alɛkɛ na kɛkɛ, bere asɔ̃ na kpondo nga da. Wa ta nvɛ̃ ni ndomu ni zu ngoi kɔi ali na kwa ma. Aye ko la alɛkɛ na wɔrɔ bere na nwa adu bo na lo ti lá ti kota yenga, wa atanga ni adu na lo ti lingɔ na kwa ti lá kɔi kɔi.

²¹ Ko se tɛ e nga la. Se zo akɛ̃ lingɔ siɔ ye zu mɛ mbi pa lo ni ko, lo ti nga ma nzɔ̃ ye ti tɛngɔ na tɛ mɛ andobata na lo ti lá ti kota yenga. To gbia lo na batangɔ lo na lo tɛ lo nvɛni ya, lo za ni, lo li nga anzɔ̃ kwa zu hɛ̃ ni.

²² Timɔte, ta mɔ li ye na se gwɛ̃ ti tɛrɛ nga ma tɛ ambanga apandara ma. Li kpengbani mɔ li ye mɛ mbiri mbiri, mɔ ye lo tɛ Yezo na bɛ mɔ kɔi, mɔ ye azi, mɔ du na mangbingɔ na popo tɛ mɔ na azi mɛ bɛ la vuruni, azi mɛ ndoili Gbia Nzapa ya, lo za ani.

²³ Zia bimbingɔ agɛgɛrɛ tɛnɛ nga na atɛnɛ ti buba, na lo mɛ ya, azi mɛ ndobimbi gi tɛrɛ atɛnɛ ni ko, ala ndokɔ nda bimbingɔ tɛnɛ tɛ la na pangɔ pa.

²⁴ Kanda ale ta wa kwa tɛ Gbia Yezo apa pa ma, ale lo ndoli tɛ lo nzɔ̃ ye hɛ̃ azi zu, lo hĩnga hangɔ lo tɛ Nzapa, lo du nga na yɔngɔrɔ bɛ.

²⁵ Azi ko ndokɛ̃ tɛnɛ tɛ lo ko, ale lo ha la na lo tɛ Nzapa na dede bɛ. Ale lo ha na la, wa bere na mbanga lá kɔi gbanda, se Nzapa azi lege hɛ̃ la, wadila ala gbinya bɛ la, aye bɛta lo tɛ Nzapa.

²⁶ Na lo ni, bɛ se ala za ndo sɔ̃ mɛ Satana apeta ya, ala ndoli ye mɛ bɛ ni Satana aye ko, ala na luangɔ kɔdɛ, wa ala lo ka ya sɔ̃ ni asi.