2 Timɔte 1 - Fana Ngbangɔ 1987

Balangɔ

^1-2 Mbi Polo mɛ ndo Nzapa asara mbi na se bɛ lo nvɛni akpa ya, mbi du wa pangɔ kwa tɛ Yezo Kristo la mbi to mbɛti olo hɛ̃ mɔ Timɔte mɛ nyi mbi ti kpɔ̃ bɛ mbi. Mbi bala mɔ. Nzapa ahɛ̃ mbi kwa ya, mbi pa hɛ̃ azi lo ti bɛta du mɛ ndo lo ko kapa ni hɛ̃ azi mɛ ala na Yezo ati bo kɔi. To e Nzapa na Gbia tɛ e Yezo Kristo ali bɛ nzɔ̃ bɛ hɛ̃ mɔ, ama bɛ vundu tɛ mɔ, ali bɛ nga ya, bɛ mɔ adu pii ma ke!

Polo ahɛ sia kɔli hɛ̃ Nzapa

³ Mbi ndohɛ̃ sia kɔli hɛ̃ Nzapa mɛ mbi ndoli kwa hɛ̃ lo na vuru bɛ, nga ma se ko ndo akotara mbi ali nga na kwa hɛ̃ lo. Ngoi zu mɛ mbi ndovɔrɔ Nzapa ko, mbi ndoda bɛ mbi na mɔ bi na lá.

⁴ Mbi ndoda bɛ mbi na to mɛ ndo mɔ to, na ngoi mɛ ndo mbi zia mɔ mbi ɔ, ko mbi ndosepara ma wo ma ya, mbi ti hũ mɔ, wadila mbi du na kota dengɔ be.

⁵ Mbi ndoda bɛ mbi na mɔ na lo tɛ Yezo mɛ ndo mɔ ye bɛ mɔ kɔi. Lo tɛ Yezo mɛ ndo tara mɔ Loisi mɛ wa dúngɔ ta mɔ, nga na Enisɛ mɛ ta mɔ aye uzu tɛ mɔ. Ko mbi hĩnga biani ya, mɔ ye nga lo tɛ Yezo.

⁶ Na lo ni la mbi da bɛ mɔ na nguru kwa mɛ ndo Nzapa ahɛ̃ mɔ, na ngoi mɛ ndo mbi kpa na ti mbi ndo mɔ, ko ale ta mɔ zia nguru ni agɔgɔtɔ ma.

⁷ Ta sanga ma, Tɔrɔ Santo mɛ Nzapa ahɛ̃ e ko, ta adu Tɔrɔ mɛ ndosa mbɛtɔ bɛ e ma, kanda adu Tɔrɔ mɛ ndohɛ̃ e nguru na ndara, Tɔrɔ mɛ ndoli ya, e ndoyengbi.

⁸ Wa ale ta kamɛnɛ agbɔ̃ mɔ na ngoi mɛ mɔ ndopa lo tɛ Gbia tɛ e Yezo ma, ta kamɛnɛ agbɔ̃ nga mɔ na lo tɛ mbi mɛ mbi li bɔlɔkɔ na lo tɛ lo ma. Kanda ale mɔ hũ pɛnɔ na lo ti Nzɔ̃ Pa nga ma mbi, ko mɔ gbe bɛ mɔ na nguru mɛ Nzapa ahɛ̃ mɔ.

⁹ Lo la lo so e, lo nga la lo ili e ya, e du azi tɛ ni. Ko ta lo so e, lo ili nga e na lo ti anzɔ̃ kwa mɛ e li ma, kanda lo li ndo so na se bɛ lo nvɛni, nga na nzɔ̃ bɛ tɛ lo. Uzu ti lo lingɔ sese ko, lo hɛ̃ ndo nyɔ lo ya, ni na lingɔ nzɔ̃ bɛ hɛ̃ e ti ndo Yezo Kristo.

¹⁰ Ko lo fa nzɔ̃ bɛ ni na olo, na ngoi mɛ Wa songɔ e Yezo Kristo aga. Yezo Kristo abi ndo nda nguru tɛ kwá, ko na lo ti Nzɔ̃ Pa, lo fa ndo e na lege ti luangɔ du ti kaka.

¹¹ Nzapa akpã mbi wa pangɔ kwa tɛ Yezo ya, mbi pa Nzɔ̃ Pa olo hɛ̃ azi, ko mbi ha nga la na ni.

¹² Ko na lo ni la mbi ndohũ apenɔ olo mɛ. Kanda mbi ndodu bo na kpengba bɛ, ta sanga ma, mbi hĩnga zo mɛ mbi ndokpã bɛ mbi ndo lo. Mbi hĩnga nga nzɔ̃ni ya, lo na nguru ti batangɔ Nzɔ̃ Pa mɛ ndo lo zia na ti mbi, ngbĩi nga ka ngoi mɛ gbanda lá ti fangɔ ngbanga alengbi.

¹³ Abɛta tɛnɛ mɛ ndo mbi pa hɛ̃ mɔ ko, mu bo ni, mɔ pa hɛ̃ azi. Ye lo tɛ Yezo bɛ mɔ kɔi, ko mɔ ye nga azi na nguru mɛ e na ni, na lo mɛ ya, e na Yezo Kristo e ti bo kɔi.

¹⁴ Nzɔ̃ Pa mɛ ndo Nzapa azia na yamba ti mɔ ko, bata ni na nguru tɛ Tɔrɔ Santo ko la na ya tɛrɛ e na mɔ.

¹⁵ Mɔ hĩnga ya, awa Kristo zu ti sese ti Azia adɔ mbi azia, ko Eizɛlɛ na Hɛrmɔzɛnɛ nga na li nɔ tɛ la.

¹⁶ Nzapa ama bɛ vundu tɛ Onezifɔre, nga na nda se wa tɛ lo ma ke! Ta sanga ma, Onezifɔre azu na bɛ mbi fani sĩni. Ta kamɛnɛ agbɔ̃ lo na lo bɔlɔkɔ mɛ mbi li ma.

¹⁷ Ngoi mɛ ndo lo si ge Roma ko, lo hɛ̃ ndo tɛrɛ lo, lo gi mbi ngbĩi, lo lua mbi.

¹⁸ Gbia Nzapa ama bɛ gbanda vundu tɛ lo na lá ti fangɔ ngbanga ma ke! Akwa zu mɛ ndo Onezifɔre ali hɛ̃ mbi ka Efɛzɛ ko, mɔ hĩnga nga ni nzɔ̃ni sĩ.