2 Tɛsalɔnikɛ 3 - Fana Ngbangɔ 1987

Ĩ sambela Nzapa na lo tɛ e

¹ Aya bua, ti kɔngɔ nda ni ko, e gbɔ̃ gɛrɛ ĩ ya, ĩ sambela Nzapa na lo tɛ e, wadila tɛnɛ tɛ Gbia Yezo afɔnɔ na le sese hiɔ hiɔ, ko azi atɔndɔ nga ni, nga ma se mɛ ĩ ndotɔndɔ na ni.

² Ĩ sambela nga lo na lo tɛ e ya, lo gbanzi ya, ta asiɔ azi ali e siɔni ma. Ta sanga ma, ta azi zu la aye lo ti tɛnɛ tɛ lo mɛ e ndopa ma.

³ Ta Gbia ndoweza kapa tɛ lo ma. Lo na kpengbangɔ na bɛ ĩ, lo nga na batangɔ ĩ ya, ta Satana ali ĩ siɔni ma.

⁴ Ko na lo tɛ Gbia ko, e ndokpã bɛ e ndo ĩ: e hĩnga ya, ĩ ndoli tɛnɛ mɛ e ndopa hɛ̃ ĩ na seni, ko ĩ nga na lingɔ ni ngoi zu na seni.

⁵ Gbia Nzapa aza bɛ ĩ ya, ĩ hĩnga ya, lo ndoye e sĩ ma ke! Lo za bɛ nga ĩ ya, ĩ gbe be ĩ na ya apɛnɔ mɛ ĩ ndohũ, nga ma se mɛ ndo Yezo Kristo agbe na bɛ lo ma ke!

Ale zo zu ali kwa

⁶ Aya bua, awa Kristo zu ko la ndokɛ̃ lingɔ kwa, ndokɛ̃ nga lo mɛ ndo e ha na la ko, e gbɔ̃ gɛrɛ ĩ na ili Gbia Yezo Kristo ya, ta ĩ na la ĩ du ndoni kɔi ma.

⁷ E fa ndo ĩ na nzɔ̃ le lo, ko ĩ nvɛni ĩ hĩnga se mɛ ale ĩ ndomanda nga na lingɔ nzɔ̃ lɛ lo ni nzɔ̃ni. Ta sanga ma, ngoi mɛ ndo e de ka tɛ ĩ ko, ta e kɛ̃ ndo lingɔ kwa ma.

⁸ Ta e ndotɛ ndo tɛ tɛ zo gɛgɛrɛ ma, e ndoli ndo kwa, ko e ndonzɛ̃ ndo nga yombe! E li ndo kwa bi na lá ya, ta zo kɔi na popo tɛ ĩ ahũ pɛnɔ ti hɛ̃ngɔ e tɛ ma.

⁹ Biani, e lengbi ndo ti yɔngɔ tɛ na ti ĩ ya, ĩ hẽ e, e tɛ. Kanda ta e yɔ ndo ni ma, na lo mɛ ya, e ye ndo fangɔ ĩ na nzɔ̃ lɛ lo ya, ĩ manda ni.

¹⁰ Ngoi mɛ ndo e de ka tɛ ĩ ko, e pa ndo hɛ̃ ĩ ya: “Zo ko ndokɛ̃ lingɔ kwa ko, ale ta lo ndotɛ nga ye ma.”

¹¹ E pa so, na lo mɛ ya, e ndoma ya, ambanga azi na popo tɛ ĩ ndokɛ̃ lingɔ kwa, ko kwa tɛ la bo la yɔrɔngɔ nyɔ la na ya tɛnɛ tɛ afɔ̃ la.

¹² Na ili Gbia Yezo Kristo, e gbɔ̃ gɛrɛ azi ni ko, e wa nga la ya, ala li kwa ngoi zu, wadila ala nvɛni akã tɛrɛ la.

¹³ Aya bua, tɛ ĩ ko, ta ĩ nzɛ̃ na lingɔ nzɔ̃ ye ma.

¹⁴ Se zo akɛ̃ tɔndɔngɔ alo mɛ e su na ya mbɛti olo ko, ĩ kpã lo na lɛ ĩ, ko ta ĩ na lo ĩ du ndoni kɔi ma, wadila kamɛnɛ agbɔ̃ lo.

¹⁵ Ko ta ĩ mu lo nga ma bere lo wa kɛ̃ngɔ ĩ ma, kanda ĩ tisa bo lo na se mɛ alengbi, na lo mɛ ya, lo bo nyita ĩ wa Kristo.

Polo abala awa Kristo ti Tɛsalɔnikɛ

¹⁶ Gbia Yezo nvɛni mɛ ndoli ya, bɛ azi adu pii ko, lo li bɛ ya, bɛ ĩ adu ngoi zu pii ma ke! Ko lo li bɛ nga ya, bɛ ĩ adu pii na se kɔdɛ zu ma ke! Gbia Yezo adu bɛ ndoni kɔi na ĩ zu ma ke!

¹⁷ Mbi bala ĩ. Na ndo olo mɛ ti balangɔ ĩ ko, mbi Polo la mbi su tɛnɛ ni na ti mbi nvɛni. Ĩ ba se mɛ mbi ndosu na ili mbi na gbe mbɛti tɛ mbi zu la. Ĩ ba nga se mɛ mbi ndosu na ni la.

¹⁸ Gbia tɛ e Yezo Kristo ali bɛ nzɔ̃ bɛ hɛ̃ ĩ zu ma ke!