2 Tɛsalɔnikɛ 2 - Fana Ngbangɔ 1987

Siɔ Zo

^1-2 Aya bua, na olo ko, mbi na pangɔ hɛ̃ ĩ tɛnɛ na lo ti lá mɛ gbanda Gbia tɛ e Yezo Kristo adiri aga na ni, ko e bombi gbanda tɛrɛ e ya e na lo e tengbi. Ambanga azi ndopa ya, lá ti gangɔ tɛ Gbia Yezo alengbi we, ko e gbɔ̃ gɛrɛ ĩ ya, ta li ĩ akpɛ hiɔ, bere mbɛtɔ agbɔ̃ nga ĩ na lo ti tɛnɛ ni ko ma. Bɛ se adu ya, azi mɛ ndopa nyɔ Nzapa apa hɛ̃ ĩ nga so, bɛ se ĩ ma ni na nyɔ azi mɛ ndopa tɛnɛ tɛ Nzapa, bere se apa hɛ̃ ĩ ya, mbi su ndo ni ka ya mbɛti ko, ta ĩ ye lo ni ma.

³ Se zo ahanda ĩ na se kɔdɛ mɛ ndɛ̃ ko, ta ĩ ye ma. Ta sanga ma, uzu ti lá ni lengbingɔ ko, ale azi gba asaba tɛrɛ Nzapa hĩ, ale Siɔ Zo mɛ gbanda Nzapa abi lo ka lifɛlo, aga nga kwɛ hĩ, wadila lá ni ko alengbi.

⁴ Siɔ Zo ni akɛ̃ gbanda lo ti aye zu mɛ azi ndomu ni nga ma anzapa, lo kɛ̃ nga gbanda lo ti aye zu mɛ azi ndovɔrɔ. Lo pa gbanda ya, ni ɔ aye ko zu. Lo kɛ̃ gbanda kia, lo li ya kota da Nzapa, lo ko lo du, lo pa ya, ni Nzapa.

⁵ Mbi pia ndo mbi pa ni hɛ̃ ĩ, na ngoi mɛ ndo mbi dɛ ka tɛ ĩ. Ko bɛ ĩ ali na ni?

⁶ Kanda na olo ko, ye kɔi agbanzi ya, ta aye ko asi hĩ ma, ko ĩ hĩnga nga ye mɛ agbanzi ni. Siɔ Zo ni aga gbanda bo na bi mɛ ndo Nzapa ako.

⁷ Nguru tɛ Siɔ Zo ni ato nda lingɔ kwa na gbe mbingo we, ko azi gba ato nda lingɔ siɔ ye wɛ. Mbanga zo kɔi ade agbanzi ya, ta Siɔ Zo ni ko asi hĩ ma. Kanda lo si gbanda bo na ngoi mɛ wa gbanzingɔ lo abɛ tɛrɛ lo katɛ.

^8-10 Siɔ Zo ni ko aga gbanda na nguru tɛ Satana. Ko lo li gbanda aye ti kpɛnɛ ndɛ̃ ndɛ̃ ndɛ̃, nga na aye ti ndima mɛ adu aye ti nvɛnɛ. Lo li gbanda asiɔ ye na se kɔdɛ ndɛ̃ ndɛ̃ ndɛ̃ so handangɔ azi mɛ gbanda Nzapa asa la ka lifɛlo. Nzapa asa la gbanda kai, na lo mɛ ya, ala ndokɛ̃ yengɔ lo bɛta lo tɛ lo. Se adu ya, ala ye ni ko, ale Nzapa aso la. Siɔ Zo ni ali gbanda aye ko zu, ko na ngoi mɛ gbanda Gbia Yezo adiri aga na ndima tɛ lo ko, lo ulu gbanda mbo tɛrɛ Siɔ Zo ni, ko mbo ni aho lo.

¹¹ Nga ma la ala kɛ̃ Nzapa ko, Nzapa na lingɔ ya, dangɔ bɛ tɛ la adu yenge yenge, wa ala ye lo ti tɛnɛ ti nvɛnɛ.

¹² Na lo ni ko, azi zu mɛ akɛ̃ yengɔ lo bɛta lo tɛ Nzapa, ala ye tɛ la lingɔ siɔ ye ko, Nzapa afa gbanda ngbanga abi li la.

Nzapa asara ndo ĩ ya ni so ĩ

¹³ Aya bua, ĩ mɛ Gbia Nzapa ndoye ĩ ko, ale e ndohɛ̃ sia kɔli hɛ̃ lo ngoi zu na lo tɛ ĩ. Ta sanga ma, ngoi mɛ ndo ta lo de lo li sese ma ko, lo sara ndo ĩ lo kpã ya, ni so ĩ na nguru tɛ Tɔrɔ Santo. Tɔrɔ Santo ni ali ya, ĩ ti azi tɛ ni Nzapa, ko ni so nga ĩ, na lo mɛ ya, ĩ ye lo bɛta lo tɛ ni.

¹⁴ Adu na lo ti songɔ ĩ ndo la lo ili ĩ, na lege ti Nzɔ̃ Pa mɛ ndo e pa hɛ̃ ĩ. Lo ili ĩ ya, ĩ lua nga ndima ka tɛ Gbia tɛ e Yezo Kristo.

¹⁵ Aya bua, na lo ni ko, ale ĩ ngbã bo na yengɔ lo tɛ Yezo Kristo kpɔ. Atɛnɛ mɛ ndo e pa hɛ̃ ĩ na nyɔ e, bere omɛ e su ni hɛ̃ ĩ na ya mbɛti ko, ĩ bata ni ka bɛ ĩ.

^16-17 E ndohũnda Gbia tɛ e Yezo Kristo nvɛni nga na To e Nzapa na lo tɛ ĩ. Nzapa ndoye e, ko na lo ti nzɔ̃ bɛ tɛ lo ko, lo ndosa nguru ti kaka bɛ e, lo ndoza nga e ya, e lɛndɛrɛ nzɔ̃ ye mɛ gbanda lo li hɛ̃ e. Ko e hũnda lo na Gbia tɛ e Yezo Kristo ya, ala sa bɛ nguru ka bɛ ĩ, ala hɛ̃ bɛ ĩ nguru ti lingɔ anzɔ̃ ye ngoi zu, nga na ti tɛnɛngɔ anzɔ̃ tɛnɛ ngoi zu ma ke!