2 Tɛsalɔnikɛ 1 - Fana Ngbangɔ 1987

Balangɔ

¹ Mbi Polo, na Silasi, nga na Timɔte la e to mbɛti olo hɛ̃ ĩ azi ti Eklezia mɛ ka kɔdɔrɔ ti Tɛsalɔnikɛ, ĩ azi tɛ To e Nzapa, nga na tɛ Gbia Yezo Kristo. E bala ĩ.

² To e Nzapa na Gbia Yezo Kristo ali bɛ nzɔ̃ bɛ hɛ̃ ĩ, ali bɛ nga ya, bɛ ĩ adu pii ma ke!

Ngbanga mɛ gbanda Nzapa afa na lá ti gangɔ tɛ Yezo

³ Aya bua, ale e ndohɛ̃ sia kɔli hɛ̃ Nzapa ngoi zu na lo tɛ ĩ. Adu nzɔ̃ni ya, e li so, ta sanga ma, ĩ ndoye lo tɛ Yezo Kristo aɔ ndo ti uzu, ko yengbingɔ tɛ ĩ andomai bo maingɔ.

⁴ Na lo ni la, ngoi mɛ e ndodu na popo tɛ azi ti Eklezia tɛ Nzapa ko, e ndotɛnɛ tɛnɛ tɛ ĩ na dengɔ bɛ. Ta sanga ma, na ya apɛnɔ zu mɛ azi ndohɛ̃ ĩ, nga na ya giangɔ bɛ zu mɛ azi ndogia na ĩ ko, ĩ ndogbe bo bɛ ĩ, ko ĩ ndongbã bo na yengɔ lo tɛ Yezo Kristo.

⁵ Aye ko zu ndofa yango ya, Nzapa afa gbanda ngbanga tɛ azi na seni. Ta sanga ma, na lo ti gbengɔ bɛ zu mɛ ĩ ndogbe ko, ĩ na tingɔ azi mɛ ĩ lengbi ti singɔ ka Kɔdɔrɔ Gbia tɛ Nzapa, kɔdɔrɔ mɛ ĩ ndohũ pɛnɔ na lo ni.

⁶ Biani, Nzapa afa gbanda ngbanga na seni: azi ko ndohɛ̃ ĩ pɛnɔ ko, lo diri nga gbanda na pɛnɔ ni hɛ̃ la.

^7-8 Ĩ azi ko la ĩ ndohũ pɛnɔ na olo ko, lo hã gbanda pɛnɔ ni lo zi, ko lo hã nga gbanda pɛnɔ tɛ e lo zi, na ngoi mɛ gbanda Gbia Yezo adiri aga na ya menga wa mɛ ndoza lau lau. Lo na akpengba aangelo tɛ lo alo gbanda ka yayu azu na ngoi ni ko. Lo ga gbanda so hɛ̃ngɔ etumbu hɛ̃ azi mɛ ta ahĩnga Nzapa ma, nga na azi mɛ akɛ̃ yengɔ lo Nzɔ̃ Pa tɛ Gbia tɛ e Yezo.

⁹ Se mɛ gbanda Nzapa ahɛ̃ la etumbu lo mɛ: lo hɛ̃ la gbanda pɛnɔ ti kaka buai, alengbi ya, Nzapa na gbanzingɔ la ya, ta ala ga ka tɛ Gbia Yezo ma, ta ala hũ nga kota ndima tɛ lo ma.

¹⁰ Ala na tongɔ nda hũngɔ pɛnɔ ni na lá mɛ gbanda Gbia Yezo adiri aga na ni. Lo ga gbanda na lá ni ko ya, azi tɛ ni zu mɛ awa yengɔ lo tɛ ni agonda ni, atɔndɔ nga ni. Ĩ nga na tɔndɔngɔ lo, ta sanga ma, ĩ ye ndo tɛnɛ tɛ lo mɛ ndo e pa hɛ̃ ĩ.

¹¹ Ĩ ba nda mɛ e ndosambela Nzapa ngoi zu na lo tɛ ĩ la. E ndohũnda lo ya, lo li ya, ĩ ti azi mɛ ĩ lengbi ti dungɔ nzɔ̃ du mɛ ndo lo ili ĩ na lo ni. E ndohũnda nga lo ya, lo za ĩ na nguru tɛ lo, ko ĩ li anzɔ̃ kwa zu mɛ ĩ ye lingɔ ni, na lo mɛ ya, ĩ ye lo tɛ lo.

¹² Wa se mɛ azi na gondangɔ na Gbia tɛ e Yezo Kristo na lo tɛ ĩ la. Ko na lo tɛ Yezo Kristo nga ko, azi na gondangɔ ĩ. Nzapa tɛ e, na Gbia tɛ e Yezo Kristo na lingɔ so, na lo ti nzɔ̃ bɛ tɛ la.