2 Kɔrinto 9 - Fana Ngbangɔ 1987

Zangɔ ayata e awa Kristo

¹ Ta mbi lengbi ti sungɔ mbɛti hɛ̃ ĩ sungɔ, wa ĩ to faranga hɛ̃ awa Kristo mɛ ka sese ti Yudea ma.

² Ta sanga ma, mbi hĩnga ya, ĩ ndoye zangɔ la sĩ. Ko mbi gonda ndo tɛrɛ mbi hɛ̃ azi ti sese ti Masedoanɛ na lo tɛ ĩ ya: “Buru mɛ biri aɔ ko, ayata e awa Kristo mɛ ka sese ti Grɛsɛ alɛkɛ tɛrɛ la ya, ani za awa Kristo mɛ ka Yudea.” Azi ti Masedoanɛ ĩ ma so ko, nguru asa tɛrɛ azi gba na popo tɛ la na lo ti tɛrɛ ĩ mɛ ĩ hɛ̃ so zangɔ awa Kristo mɛ ka Yudea.

³ La mbi to ayata e awa Kristo olo ka tɛ ĩ ya, ĩ pia ĩ sɔrɔ faranga ni, nga ma se mɛ mbi pa na ni hɛ̃ azi ti Masedoanɛ. Ta so ma ko, gondangɔ mɛ ndo e gonda na ĩ na lo ti zangɔ awa Kristo mɛ ka Yudea adu gɛgɛrɛ.

⁴ Ta so ma, se mbi na azi ti Masedoanɛ e bombi e ga, wa se ta ala tã ĩ, ĩ lɛkɛ tɛrɛ ĩ, ĩ sɔrɔ faranga ma ko, kamɛnɛ na gbɔ̃ngɔ mbi sĩ, na lo mɛ ya, mbi hĩnga biani ya, ĩ sɔrɔ faranga ni wɛ. Ko kamɛnɛ nga na gbɔ̃ngɔ ĩ na gbɛlɛ e na la.

⁵ Mbi hũ ge lɛ mbi nzɔ̃ni, la mbi gbɔ̃ gɛrɛ ayata e awa Kristo olo mɛ mbi ye tongɔ la hɛ̃ ĩ ya, ala nɔ ka tɛ ĩ uzu tɛ mbi. Mbi ye ya, ĩ na la ĩ sɔrɔ faranga mɛ ndo ĩ pia ĩ ko kapa ni, wadila na ngoi mɛ se mbi si ka tɛ ĩ ko, mbi tã ĩ pia ĩ sɔrɔ faranga ni wɛ. Ko oko na fangɔ ya, ĩ hɛ̃ ni na nzɔ̃ bɛ, kanda ta adu na lo mɛ ya, agbɔ̃ ĩ gbɔ̃ngɔ la ĩ hɛ̃ ni ma.

⁶ Ĩ hĩnga ya, zo ko la akĩ ale tɛ yakere ko, lo kɔ nga yakere. Wa zo ko la akĩ ale tɛ ma wo ma ko, lo kɔ nga ma wo ma.

⁷ Ale zo kɔi kɔi ahɛ̃ ye nga ma se mɛ bɛ lo aye. Kanda ale ta zo ahɛ̃ ye bɛ lo se sɛ, bere agbɔ̃ lo gbɔ̃ngɔ, wa lo hɛ̃ ye ni ma. Ta sanga ma, bɛ Nzapa ndoye zo ko la ndohɛ̃ ye na dengɔ bɛ.

⁸ Nzapa alengbi ti hɛ̃ngɔ ĩ lɛ aye ndɛ̃ ndɛ̃ ndɛ̃ sĩ nvɛni ya, ngoi zu ko, ĩ du na ye zu mɛ ĩ na gwɛ̃ ni, ko ĩ ti ĩ ngbã na ye gba, ya ĩ li na anzɔ̃ ye zu,

⁹ nga ma se mɛ Buku tɛ Nzapa apa na ni ya: “Nzɔ̃ zo ndoka kaye hɛ̃ awa yɛlɛ na nzɔ̃ bɛ, Ko nzɔ̃ bɛ tɛ lo ndongbã ngoi zu.”

¹⁰ Nzapa mɛ ndohɛ̃ azi ale tɛ ya ala kĩ, lo mɛ nga lo ndohɛ̃ la tɛ ya ala tɛ ko, lo na hɛ̃ngɔ ĩ aye zu mɛ ĩ na gwɛ̃ ni, lo nga na lingɔ ya, aye ni ko ati ma ya ma. Lo na lingɔ so ya, ĩ ka kaye ma ya ma hɛ̃ azi.

¹¹ Lo na hɛ̃ngɔ ĩ ye ngoi zu na se kɔdɛ ndɛ̃ ndɛ̃ ndɛ̃ ya, ĩ ka kaye sĩ na nzɔ̃ bɛ hɛ̃ afɔ̃ ĩ, wa ala hɛ̃ sia kɔli hɛ̃ Nzapa na lo ti aye tɛ ĩ mɛ e na nɔngɔ na ni hɛ̃ la.

¹² Ta sanga ma, ta faranga mɛ ĩ na hɛ̃ngɔ, na zangɔ bo awa Kristo ma, kanda na lo ti faranga ni ko, azi gba na hɛ̃ngɔ sia kɔli hɛ̃ Nzapa.

¹³ Faranga ni na fangɔ ya, ĩ na nzɔ̃ bɛ. Na lo ni ko, azi ma ya ma na gondangɔ Nzapa, na lo mɛ ya, ĩ ye lo Nzɔ̃ Pa tɛ Kristo, ĩ ma nga nyɔ lo. Ala nga na gondangɔ lo, na lo mɛ ya, ĩ mu faranga tɛ ĩ na nzɔ̃ bɛ, ĩ hɛ̃ la, ĩ hɛ̃ nga hɛ̃ awa Kristo mɛ ndɛ̃ zu.

¹⁴ Ala na sambelangɔ Nzapa na lo tɛ ĩ, ko bɛ la nga na yengɔ ĩ sĩ nvɛni, na lo ko la Nzapa ali kota nzɔ̃ bɛ hɛ̃ ĩ.

¹⁵ E gonda Nzapa na lo ko la kaye mɛ lo ka hɛ̃ e ko, aɔ aye zu!