2 Kɔrinto 8 - Fana Ngbangɔ 1987

Faranga mɛ ato hɛ awa Kristo ti Yudea na nzɔ̃ bɛ

¹ Aya bua, e separa ya, ĩ hĩnga se mɛ ndo Nzapa afa na nzɔ̃ bɛ tɛ lo hɛ̃ azi ti Eklezia ti sese ti Masedoanɛ.

² Ala hũ ndo pɛnɔ sĩ nvɛni, ko abɛ nga ala ndo na yɛlɛ tɛrɛ la sĩ ko, ala ndo nga na dengɔ bɛ sĩ, ko ala hɛ̃ ndo faranga na kota nzɔ̃ bɛ ya, ali na kwa Nzapa.

³ Mbi pa hɛ̃ ĩ ya, ala hã ndo nyɔ faranga tɛ la alengbi na se faranga mɛ ala na ni, ahɛ̃ ya, ali na kwa Nzapa. Mbi lengbi nga ti pangɔ ya, ala hɛ̃ ndo faranga ni aɔ maka.

⁴ Ala vɔrɔ ndo tɛrɛ la hɛ̃ e sĩ na se bɛ la nvɛni ya, e hɛ̃ ani lege, ani to nga faranga ti zangɔ na awa Kristo mɛ ka sese ti Yudea.

⁵ Ye mɛ ndo ala li ko, aɔ dangɔ bɛ tɛ e: ala hɛ̃ ndo tɛrɛ la zu hɛ̃ Gbia Yezo, so pɛni ala hɛ̃ nga tɛrɛ la hɛ̃ e, nga ma se mɛ Nzapa aye na ni.

⁶ Nda mɛ ndo e gbɔ̃ gɛrɛ Tito ya, lo nɔ ka tɛ ĩ, lo kɔ nda nzɔ̃ kwa mɛ ndo lo to nda ni kai la.

⁷ Ĩ lua ye kwɛ zu: ĩ ndoye lo tɛ Yezo sĩ, ĩ na nguru ti pangɔ lo tɛ lo sĩ, ĩ ndohĩnga bɛta tɛnɛ tɛ Nzapa sĩ, ĩ ndohɛ̃ tɛrɛ ĩ hɛ̃ Nzapa sĩ, ĩ ndoye nga e sĩ nvɛni. Na lo ni ko, e ndosepara ya, ĩ li nga nzɔ̃ kwa ni ko na bɛ ĩ kɔi.

⁸ Lo ti faranga ko la mbi pa hɛ̃ ĩ ko, ta adu nyɔ la mbi hɛ̃ ĩ ma. Kanda mbi ye pangɔ hɛ̃ ĩ ya, ambanga awa Kristo mɛ ndɛ̃ ndohɛ̃ tɛrɛ la so sɔrɔngɔ faranga sĩ ya, ani hɛ̃ afɔ̃ ani. Mbi tɛnɛ so ya, mbi ba, bere ĩ ndoye nga afɔ̃ ĩ biani.

⁹ Ti biani, ĩ hĩnga nzɔ̃ bɛ mɛ Gbia tɛ e Yezo Kristo ndoli hɛ̃ e. Lo mɛ ndo na nwa ka yayu sĩ ko, lo ti ndo wa yɛlɛ so zangɔ ĩ. Lo li ndo so ya, na lege ti yɛlɛ tɛ ni ko, ĩ ti awa nwa ka lɛ Nzapa.

¹⁰ Lo ti faranga ko la mbi pa hɛ̃ ĩ ko, ta adu nyɔ la mbi hɛ̃ ĩ ma. Kanda mbi ye panga hɛ̃ ĩ dangɔ bɛ mɛ mbi na ni. Dangɔ bɛ ni lo mɛ: buru mɛ biri aɔ ko, ĩ ndo la ĩ ye uzu ya, ĩ sɔrɔ faranga, ko ĩ ndo nga la ĩ to nda sɔrɔngɔ faranga ni uzu.

¹¹ Wa na olo ko, ale ĩ ɔ bo na nyɔ kwa ni, ko ĩ kɔ nga nda ni kpɛkɛlɛ. Ko nga ma se ko ndo la ĩ ye sĩ ya, ĩ sɔrɔ faranga ni ko, ale ĩ ye nga sĩ ya, ĩ kɔ nda kwa ti sɔrɔngɔ faranga ni.

¹² Ta sanga ma, se zo aha nyɔ ye tɛ lo, alengbi na se ye mɛ lo na ni, ahɛ̃ Nzapa na nzɔ̃ bɛ ko, Nzapa aye ye ni ko. Wa se ta zo adu nga na ye na ti lo ma ko, ta Nzapa ahũnda nga lo ya, lo hɛ̃ ni ye ma.

¹³ Ta adu ya, mbi ye ya, ĩ́ za azi mɛ ndɛ̃ ngbĩi nga ka ye awe ti ĩ ma. Kanda mbi ye ya, zo zu adu na ye kwɛ kɔi.

¹⁴ Na olo ko, ĩ na ye sĩ nvɛni, ko adu nzɔ̃ni ya, ĩ za azi mɛ ta na ye kɔi ma, wa na mbanga lá kɔi gbanda, se ta ĩ du na ye kɔi ma, ko se ala du na ye sĩ nvɛni ko, ala za nga ĩ, wadila ĩ zu ĩ ti na ye kwɛ kɔi.

¹⁵ Nga ma se mɛ Buku tɛ Nzapa apa ya: “Zo ko ndo alɔ tɛ sĩ ko, ta lo ndo na tɛ aɔ maka ma. Ko zo ko ndo alɔ tɛ yakere ko, ta lo zanga ndo tɛ kɔi ma.”

Polo aye tongɔ Tito na afɔ̃ Tito ka Kɔrinto

¹⁶ E gonda Nzapa mɛ asa nguru bɛ Tito ya, lo hɛ̃ tɛrɛ lo so zangɔ ĩ nga ma se tɛ e!

¹⁷ E gbɔ̃ gɛrɛ Tito ya, lo nɔ ka tɛ ĩ, ko lo ye. Ta lo ye bo nɔngɔ ka tɛ ĩ ma, kanda lo pia lo ye na se bɛ lo ya, ni nɔ ka tɛ ĩ, na lo mɛ ya, lo ye hɛ̃ngɔ tɛrɛ lo sĩ so zangɔ ĩ.

¹⁸ E na tongɔ lo ana mbanga nyita e wa Kristo kɔi. Azi ti Eklezia zu ndogonda nyita e wa Kristo ni ko sĩ, na lo mɛ ya, lo ndopa Nzɔ̃ Pa nzɔ̃ni sĩ.

¹⁹ Ko azi ti Eklezia mɛ ge asara nga lo akpã ya, e na lo e gwe fɔnɔ kɔi, so lingɔ nzɔ̃ kwa ti sɔrɔngɔ faranga, nɔngɔ na ni ka tɛ ayata e awa Kristo. E ndoli nzɔ̃ kwa ni so gondangɔ Gbia, nga so fangɔ ya, e separa zangɔ azi mɛ ndɛ̃.

²⁰ E na lingɔ ya, ta azi adi e na lo ti kota faranga mɛ e ndosɔrɔ ma.

²¹ Ta e separa ya, e li nzɔ̃ ye bo na le Nzapa kɔi ma, kanda e separa nga ya, e li ni na lɛ azi.

²² E na tongɔ la ndoni kɔi na mbanga nyita e wa Kristo mɛ ndɛ̃. E tara ndo bɛ nyita e wa Kristo ni ko fani sĩni, ko e hũ ya, ngoi zu ko, lo ndoli kwa hɛ̃ Nzapa na bɛ lo kɔi. Ko na olo ko, lo ye ya, ni za ĩ aɔ ndoni, na lo mɛ ya, ni ndokpã bɛ ni ndo ĩ.

²³ Adu tɛ Tito ko, lo fɔ̃ mbi ti kwa, ko e na lo e ndoli kwa kɔi so zangɔ ĩ. Wa tɛ ayata e awa Kristo osɛ mɛ ala na Tito na gangɔ ka tɛ ĩ ko, azi ti Eklezia mɛ ge la ato la, ko ala ndoli kwa ya, azi agonda Yezo Kristo.

²⁴ Na lo ni ko, ĩ fa na la ya, ĩ ndoye la biani nvɛni, wadila azi ti Eklezia ahĩnga ni nzɔ̃ni, ko ahĩnga nga ya, gondangɔ ko la e gonda na ĩ ko, nda ni da.