2 Kɔrinto 7 - Fana Ngbangɔ 1987

¹ Aya bua, Nzapa ako akapa ni ko zu hɛ̃ e. Na lo ni ko, ale ta e mu tɛrɛ e, e li na siɔ ye bɛ kɔi ma, ale ta e ye nga ya, e du na siɔ ye kɔi ge ya bɛ e bɛ kɔi ma. Ale e kpɛ Nzapa, na lo ni ko, ale sé du tɛ e adu nga nzɔ̃ni buai.

Dengɔ bɛ tɛ Polo

² Ale ĩ ndofa na e ya, ĩ ndoye e. Ta e li siɔ ye tɛrɛ zo kɔi ma, ta e gbɛ̃ ndo zo kɔi ma, ta e handa ndo nga zo kɔi, e mu ye tɛ lo ti lo ma.

³ Ta mbi tɛnɛ so ya, mbi fa ngbanga mbi bi li ĩ ma, nga ma se mɛ fɛrɛ mbi pia mbi pa ya, e ndoye ĩ sĩ nvɛni. Ko bɛ se e kpili, bɛ se e du lɛ e ngɛ̃ ko, e ndoye bo ĩ, ta ye mɛ alengbi ti gbanzingɔ e na yengɔ ĩ da ma.

⁴ Mbi ndokpã bɛ mbi ndo ĩ sĩ nvɛni, mbi ndogonda nga tɛrɛ mbi na lo tɛ ĩ sĩ. Na ya apɛnɔ mɛ e ndohũ ko, ta mbi ndonzɛ̃ bɛ yakere ma, ko bɛ mbi ndode nga sĩ nvɛni.

⁵ Abɛ na ngoi mɛ ndo e si ka sese ti Masedoanɛ ko, ta e wɔ ndo tɛrɛ e bɛ kɔi ma. E hũ ndo apɛnɔ ngoi zu. Apɛnɔ ni lo mɛ: azi ndotɔmbɔkɔ ndo tɛrɛ e, mbɛtɔ ndogbɔ̃ ndo nga e.

⁶ Ko Nzapa mɛ ndosa nguru bɛ azi mɛ anzɛ̃ ko, lo sa ndo nguru bɛ e, bo na lo mɛ ya, Tito aga ndo atã e.

⁷ Ta adu ya, Nzapa asa ndo nguru bɛ e bo na lo ti gangɔ tɛ Tito ka tɛ e ma. Kanda lo sa ndo nga nguru bɛ e na lo tɛnɛ mɛ Tito apa hɛ̃ e. Tito apa ndo se mɛ ĩ sa na nguru bɛ lo nvɛni. Lo pa hɛ̃ e ya, ĩ ndosepara sĩ ya, ĩ hũ mbi fani mɛ ndɛ̃. Lo pa nga ya, ló ko ndo asi ka popo tɛ ĩ ko, vundu agbɔ̃ ndo ĩ sĩ na lo ni. Lo nɛ nga ya, ĩ ye kambisangɔ nyɔ mbi. Nda mɛ mbi ti mbi du na dengɔ bɛ na olo aɔ maka la.

⁸ Mbi hĩnga ya, mbɛti ko ndo mbi to hɛ̃ ĩ ko, asa ndo vundu bɛ ĩ. Ko ta mbi na wangɔ bɛ mbi na lo ni na olo mɛ ma. Mbi wa ndo bɛ mbi na ngoi mɛ ndo mbi hũ ya, mbɛti ni asa ndo vundu bɛ ĩ na pɛ nyi ngoi.

⁹ Kanda na olo ko, mbi ndosaba. Ko ta adu ya, mbi ndosaba na lo mɛ ya, mbi sa ndo vundu bɛ ĩ ma. Kanda mbi ndosaba, na lo mɛ ya, vundu mɛ ndo agbɔ̃ ĩ, ahɛ̃ ĩ lege, la ĩ gbinya bɛ ĩ. Na lo ti vundu mɛ ndo agbɔ̃ ĩ ko, ĩ da bɛ ĩ na Nzapa. Na lo ni ko, ta adu ya, e li ndo ĩ siɔni ma.

¹⁰ Ta sanga ma, ngoi mɛ zo ada bɛ lo na Nzapa na lo ti vundu mɛ agbɔ̃ lo ko, vundu ni agbinya bɛ lo, ko Nzapa aso lo. Ko ta zo alengbi ti wangɔ bɛ lo na lo ni ma. Kanda se ta zo ada bɛ lo na Nzapa na ngoi mɛ zo ni ko na vundu ma ko, vundu ni ato lo na ya kwa.

¹¹ Ĩ da bɛ ĩ na Nzapa na lo ti vundu mɛ ndo agbɔ̃ ĩ, ko na olo ko, ĩ ba se mɛ Nzapa agbinya na bɛ ĩ hĩ! Ĩ ba se mɛ ĩ li kpengbani, ko na lo ni ĩ ndodu na nzɔ̃ dangɔ bɛ na ló ni hĩ. Ĩ ye fangɔ ya, ĩ kɛ̃ siɔ ye! Ngɔnzɔ na mbɛtɔ agbɔ̃ ĩ sĩ na ló ni. Ĩ separa sĩ ya, ĩ ba mbi fani mɛ ndɛ̃. Ĩ hɛ̃ tɛrɛ ĩ sĩ ya, ĩ li ye mɛ bɛ Nzapa aye. Ĩ ye nga sĩ ya, ĩ hɛ̃ etumbu hɛ̃ zo ko la ali siɔ ye. Ĩ fa na se kɔdɛ zu ya, ta ĩ na ya lo ni ko ma.

¹² Mbɛti ko ndo mbi su hɛ̃ ĩ ko, ta adu ya, mbi su ndo ni na lo tɛ zo ko la ali siɔ ye ma. Ta mbi su ndo nga ni na lo tɛ zo mɛ ndo zo ni ko ali siɔ ye ni ko tɛrɛ lo ma. Kanda mbi su ndo ni ya, ĩ hĩnga nzɔ̃ni na gbɛlɛ Nzapa ya, ĩ hɛ̃ tɛrɛ ĩ hɛ̃ e.

¹³ Nda mɛ bɛ e azu la. Ta bo e la bɛ e azu ma, kanda ngoi mɛ ndo e hũ ya, bɛ Tito ade, na lo mɛ ya, ĩ zu ĩ sa ndo nguru bɛ lo ko, be e ati ade ndo sĩ nvɛni.

¹⁴ Mbi gonda ndo tɛrɛ mbi hɛ̃ lo yakere na lo tɛ ĩ, ko ta ĩ sa ndo kamɛnɛ lɛ mbi ma. Kanda nga ma se ko ndo e ndopa bɛta tɛnɛ hɛ̃ ĩ ngoi zu ko, se mɛ nga gondangɔ mɛ e gonda na ĩ ka tɛ Tito adu nga biani la.

¹⁵ Ko ngoi mɛ lo da bɛ lo na se mɛ ndo ĩ zu ĩ ma na nyɔ lo, nga na se mɛ ndo ĩ yamba na lo na mbɛtɔ sĩ ko, lo ti ndoye ĩ sĩ nvɛni.

¹⁶ Bɛ mbi ndode sĩ, na lo mɛ ya, na ya alo zu ko, mbi lengbi ti kpãngɔ bɛ mbi ndo ĩ.