2 Kɔrinto 6 - Fana Ngbangɔ 1987

Polo afa ya ni wa kwa tɛ Nzapa

¹ Ko e mɛ e ndoli kwa ndoni kɔi na Nzapa ko, e gbɔ̃ gɛrɛ ĩ ya, ta ĩ zia nzɔ̃ bɛ mɛ ndo Nzapa ali hɛ̃ ĩ ati gɛgɛrɛ ma.

² Ta sanga ma, Nzapa apa ka ya Buku tɛ lo ya: “Lá mɛ ndo ngoi ti mbi fangɔ nzɔ̃ bɛ hɛ̃ azi, nga ti songɔ la ĩ lengbi ko, mbi ma ndo sambela tɛ mɔ, mbi za ndo nga mɔ.” Wa na olo ko, ngoi tɛ Nzapa ti fangɔ nzɔ̃ bɛ hɛ azi lo mɛ. Na lá olo ko, ngoi tɛ lo nga ti songɔ la lo mɛ.

³ E ndosepara ya, ta azi atɛnɛ siɔ tɛnɛ na ndo kwa mɛ e ndoli ma. Nda mɛ e ndogi kɔdɛ ya, na ya alo zu ko, ta e gbanzi azi na yengɔ lo tɛ Nzapa ma la.

⁴ Kanda na ya alo zu ko, e ndofa ya, e awa kwa tɛ Nzapa. Na ya apɛnɔ ndɛ̃ ndɛ̃ ndɛ̃ mɛ azi ndohɛ̃ e, nga na ya giangɔ bɛ mɛ azi ndogia na bɛ e ko, e ndogbe bɛ e sĩ.

⁵ Asɔ̃nɔ e, asa e bɔlɔkɔ, atɔmbɔkɔ tɛrɛ e, e li kpengba kwa. Fani sĩni ko, ta e lua ngoi ti langɔ langɔ ma, ta e lua nga tɛ ti tɛngɔ ma.

⁶ Ye mɛ afa ya, e awa kwa tɛ Nzapa lo mɛ: bɛ e vuruni, e hĩnga bɛta lo tɛ Nzapa, e na yɔngɔrɔ bɛ, e na nzɔ̃ bɛ, e na Tɔrɔ Santo ya tɛrɛ e, e ndoye afɔ̃ e na bɛ e kɔi,

⁷ e ndopa bɛta tɛnɛ tɛ Nzapa, e na nguru tɛ Nzapa. E ndoli ye na seni, ko ye mɛ e ndoli na seni adu nga ma e na ye ti tiringɔ na to, adu nga ma ye ti batangɔ na tɛrɛ e.

⁸ Ambanga azi ndotɔndɔ e, ambanga mɛ ndɛ̃ ndosa kamɛnɛ lɛ e. Ambanga ndotɛnɛ tɛnɛ nzɔ̃ni na ili e, ko ambanga mɛ ndɛ ndotɛnɛ tɛnɛ siɔni na ili e. Azi ndomu e ka lɛ la nga ma e awa nvɛnɛ, kanda e ndopa bɛta tɛnɛ.

⁹ Azi ndomu e ka lɛ la nga ma ta ala hĩnga e ma, kanda azi zu ahĩnga e. Azi ndohũ e nga ma e na kpilingɔ, kanda e dɛ bo lɛ e ngɛ̃, nga ma se mɛ ĩ ndohũ na e. Andohɛ̃ e etumbu, kanda ta andoho e ma.

¹⁰ Andohɛ̃ e vundu, kanda e bo ngoi zu na dengɔ bɛ. Andohũ e nga ma e awa yɛlɛ, kanda e li azi ma ya ma ati awa nwa ka lɛ Nzapa. Andohũ e nga ma ta e na ye ma, kanda ti biani ko, e na ye kwɛ zu.

¹¹ Akwa e ti Kɔrinto, e tɛnɛ hɛ̃ ĩ tɛnɛ ni yango, ta e hɔndɛ ĩ na tɛnɛ mɛ ge ya bɛ e ma!

¹² E ye ĩ, kanda ĩ Ia ta ĩ ye e ma.

¹³ Mbi na tɛnɛngɔ tɛnɛ hɛ̃ ĩ ma bere ĩ aya mbi. Tɛnɛ ni lo mɛ: ale ĩ fa hɛ̃ e ya, ĩ ye e.

Ĩ du na kpengba lɛ na ndo apaganɔ

¹⁴ Azi ko la ta ala awa Kristo ma ko, ta ĩ na la ĩ bombi ĩ li ye ndoni kɔi ma. Ta ala du azi mɛ alengbi na ĩ ma. Ta abɛta azi na asiɔ azi alengbi ti dungɔ ndoni kɔi ma! Ta azi mɛ na ya vuru ndo na ala mɛ na ya mbingo alengbi ti dungɔ ndoni kɔi ma!

¹⁵ Ta Yezo Kristo na Satana alengbi ti dungɔ na mangbingɔ ma! Bere ta wa Kristo na paganɔ alengbi ti dungɔ na mangbingɔ ma!

¹⁶ Ta alengbi ti kpãngɔ angbilondo ka ya da Nzapa ma! Ko e du nga ma da tɛ Nzapa mɛ lɛ lo ngɛ̃, nga ma se mɛ Nzapa nvɛni apa na lo tɛ azi tɛ lo ya: “Mbi na dungɔ na popo tɛ la, Mbi na dungɔ Nzapa tɛ la, Ko ala na dungɔ azi tɛ mbi.”

^17-18 Na lo ni la Nzapa apa hɛ̃ la ya: “Ale ĩ dɔ azi mɛ ta aye lo tɛ mbi ma ĩ zia, Ala du na bɛ la, ko ĩ du nga na bɛ ĩ. Ta ĩ li siɔ ye ma, Wadila mbi yamba ĩ. Mbi na dungɔ To ĩ, Ko ĩ nga na dungɔ aya mbi ti kɔli na ti wali, Mbi Gbia Nzapa mɛ lombe la mbi pa so.”