2 Kɔrinto 5 - Fana Ngbangɔ 1987

¹ Tɛrɛ e mɛ e na ni ge lɛ sese adu nga ma da. Ko e hĩnga ya, se da ni agbɛ̃ ko, Nzapa ahɛ̃ e gbanda da mɛ ndɛ̃ ka yayu. Adu da mɛ lo nvɛni lo wa na ti lo, ko da ni angbã gbanda kaka buai.

² Na olo ko, e ndodema tɛrɛ e, ta sanga ma, e ndosepara sĩ ya, Nzapa ahɛ̃ e fana tɛrɛ ka yayu.

³ Ngoi mɛ gbanda e lua fana tɛrɛ ni ko, ta tɔrɔ tɛrɛ e ati azanga gbanda tɛrɛ ma.

⁴ Biani, ngoi mɛ e dɛ lɛ e ngɛ̃ na tɛrɛ e ti lɛ sese ko, e ndodema tɛrɛ e, nga ma e yɔ kumba mɛ ndonɛ ndororo. Ta adu ya, e ye ya, Nzapa aha tɛrɛ e azi ma, kanda e separa ya, lo hɛ̃ e fana tɛrɛ, wadila tɛrɛ e mɛ ndokpi agbinyangbi ati tɛrɛ mɛ ndongbã kaka buai.

⁵ Nzapa nvɛni gbanda la ali ya, tɛrɛ e agbinyangbi ati fanani. Lo hɛ̃ e Tɔrɔ Santo ya, adu nga ma nzango so fangɔ ya, ni li gbanda anzɔ̃ lo hɛ̃ e.

⁶ Na lo ni ko, e ndodu bo ngoi zu na kpengba bɛ sĩ. E hĩnga ya, ngoi mɛ e dɛ na tɛrɛ e ti lɛ sese ko, ta e dɛ e si ka tɔ̃nda Gbia Yezo ma.

⁷ Alengbi ya, e mu lege ti nɔngɔ ka tɛ lo, na lo mɛ ya, e ye lo tɛ lo, ko ta adu ya, e hũ lo na lɛ e wɛ ma.

⁸ E na kpengba bɛ sĩ, ko e ye ya, nzɔ̃ni ale e zia tɛrɛ e olo, ko e nɔ e ngbã ka tɔ̃nda lo.

⁹ Bɛ se ta e dɛ e si ka tɔ̃nda lo ma, bɛ se e si ka tɔ̃nda lo ko, e separa bo ya, e li ye mɛ ndode bɛ lo.

¹⁰ Ta sanga ma, ale e zu e si gbanda gbɛlɛ Yezo Kristo ya, lo fa ngbanga tɛ e. Lo fa gbanda ngbanga tɛ e alengbi na ye mɛ ndo zo kɔi kɔi ali, na ngoi mɛ ndo lo dɛ na tɛrɛ lo ti lɛ sese. Se adu ya, e li ndo nzɔ̃ ye ko, gbanda ko, lo hɛ̃ e mbana gɛrɛ e. Wa se adu ya, e li ndo siɔ ye ko, gbanda ko, lo hɛ̃ e etumbu.

Nzapa atongbi songo na popo tɛ e na lo

¹¹ Na lo ni ko, e hĩnga nda mɛ e ndokpɛ Gbia Yezo, ko e ndogi kɔdɛ ya, e pa hɛ̃ azi ya, ala ye lo tɛ lo. Nzapa ahĩnga e nzɔ̃ni sĩ, ko mbi da bɛ mbi ya, ka ya bɛ ĩ nvɛni ko, ĩ hĩnga nga e nzɔ̃ni.

¹² Ta adu ya, e separa gondangɔ tɛrɛ e hɛ̃ ĩ fani mɛ ndɛ̃ ma. Kanda e separa ya, e zi hɛ̃ ĩ lege, ko ĩ gonda tɛrɛ ĩ na lo tɛ e, wadila se azi adi e ko, ĩ hĩnga gbinyangɔ tɛnɛ na seni hɛ̃ la. Azi ni ko adu azi mɛ ahĩnga tɛ la bo yakɛngɔ tɛrɛ la na lo ti ye mɛ andohũ na lɛ, kanda ta ala ndohĩnga ye mɛ ka ya bɛ zo ma.

¹³ Azi ndomu e ka lɛ la ya, e awa nyingɔ, wa se adu biani ya, e awa nyingɔ ko, adu so lingɔ kwa Nzapa. Kanda e na nzɔ̃ kɔdɛ, ya e za ĩ.

¹⁴ Ta sanga ma, yengɔ mɛ Kristo aye na e ndoyuru e ya e li kwa hɛ̃ lo. E hĩnga biani ya, lo kpi ndo so azi zu. Ko oko afa ya, ka lɛ Nzapa ko, azi zu akpili nga la.

¹⁵ Lo kpi ndo so azi zu ya, azi mɛ ndodu lɛ la ngɛ̃ ko, ta ala du lɛ la ngɛ̃ na lo tɛ la nvɛni ma. Kanda ale ala du lɛ la ngɛ̃ na lo tɛ Kristo mɛ ndo akpi so la, aso nga so la.

¹⁶ Na lo ni, ato na olo ko, ta e ti ndohĩnga zo na lege ti sé du tɛ lo mɛ e ndohũ na lɛ e ma. Ndo uzu ko, se mɛ ndo e ndohũ na Kristo la, kanda na olo ko, ta se mɛ e ndohũ na lo la ma.

¹⁷ Zo ko la ana Yezo Kristo ati bo kɔi ko, zo ni ko ati fana zo. Ngbina sé du tɛ lo awe, lo lua fana sé du.

¹⁸ Nzapa la ndoli alo ni ko zu. Lo tongbi songo na popo tɛ e na lo nvɛni, na lo ye ko la Kristo ali tɛrɛ e. Ko Nzapa ahɛ̃ nga e kwa ya, e ili azi mɛ ndɛ̃, wa ni tongbi nga songo na popo tɛ ni na la.

¹⁹ Ta sanga ma, Nzapa ato ndo Yezo Kristo ya, ni Nzapa ni tongbi songo na popo tɛ ni na azi, na lo ye ko la Kristo ali tɛrɛ la, ko ta ni kpã bɛ ni na ndo siɔ ye tɛ la ma. Lo to nga e ya, e pa hɛ̃ azi ya, ni ye tongbingɔ songo na popo tɛ ni na la.

²⁰ Na lo ni ko, e du azi mɛ Kristo ato e na kwa. Adu ma bere Nzapa nvɛni aili ĩ ti ndo e. E gbɔ̃ gɛrɛ ĩ na ili Kristo ya, ale ĩ ye ya Nzapa atongbi songo na popo tɛ ĩ na lo.

²¹ Ta Kristo ali ndo siɔ ye bɛ kɔi ma, ko Nzapa aminya ndo siɔ ye tɛ e na li lo. Nzapa ali ndo so ya, nga ma la e na Kristo e ti bo kɔi ko, ni mu e ka lɛ ni ya, e abɛta azi.