2 Kɔrinto 4 - Fana Ngbangɔ 1987

Nguru ti lingo kwa alo ka tɛ Nzapa

¹ Kwa mɛ mbi pa lo ni ko, Nzapa ahɛ̃ e na lo ti nzɔ̃ bɛ tɛ lo, nda mɛ ta e ndonzɛ̃ ma la.

² Na ya kwa mɛ e ndoli ko, e kɛ̃ lingɔ aye ti kamɛnɛ nga na aye ti gbe mbingo. Ta e ndoli ye na poroso ma, ta e ndogbinya tɛnɛ tɛ Nzapa ati ndɛ̃ ma. Kanda e ndopa bɛta tɛnɛ tɛ Nzapa yango, ko lo ndohũ e. E ndoli so ya, azi zu ahĩnga ya, e abɛta azi.

³ Ta ambanga azi ndoma nda Nzɔ̃ Pa mɛ e ndopa ma, ko azi ko la adu azi mɛ tɛrɛ yungɔ lege tɛ Nzapa.

⁴ Ta ala ndoye lo ti Nzɔ̃ Pa ni ma, na lo mɛ ya, Satana mɛ gbia tɛ azi ti lɛ sese agbɛ̃ kɔdɛ tɛ la. Lo vĩ nga lɛ la ya, ta ala hũ ndo mɛ avuru ma. Nzɔ̃ Pa ni avuru na ndo, ko adu Nzɔ̃ Pa ni la afa ndima tɛ Yezo Kristo mɛ lo limɔ tɛ Nzapa.

⁵ Nzɔ Pa mɛ e ndopa ko, ta adu na lo tɛ e nvɛni ma, kanda adu na lo tɛ Yezo Kristo. E ndopa ya, lo la Gbia. Wa tɛ e ko, e du awa kwa tɛ ĩ, na lo mɛ ya, e ava Yezo.

⁶ Nzapa mɛ apa ya: “Ale ndo avuru na ya mbingo” ko, nga bo lo la lo li ya, ndo avuru ge ya bɛ e. Lo li so ya, ni fa e na ndima tɛ ni mɛ ndosũ ka yangba lɛ Yezo.

⁷ Nzɔ̃ lo ni ko adu nga ma ngbondo nwa mɛ Nzapa ahɛ̃ e, ko e azi mɛ e lua ngbondo nwa ni, e du nga ma ta mɛ asɔ̃ na kpondo. Adu so, so fangɔ na azi ya, kota nguru mɛ e na ni ti lingɔ na kwa tɛ Nzapa ko, ta nguru ni alo ge tɛ e ma, kanda alo ka tɛ Nzapa.

⁸ E ndohũ lɛ apɛnɔ ndɛ̃ ndɛ̃ ndɛ̃, kanda ta apɛnɔ ni ako ndo e ma. Bɛ e ndongbã talele, kanda ta e zia gbengɔ bɛ e ma.

⁹ Andohɛ̃ e pɛnɔ, kanda ta Nzapa ndozia e ma. Andokinda e, kanda ta andoho e ma.

¹⁰ Ngoi zu ko, azi ndogingisa ya ani ho e, nga ma se mɛ ndo aho na Yezo, kanda e de bo lɛ e ngɛ̃. Ko oko afa ya, Yezo adɛ nga lɛ lo ngɛ̃.

¹¹ E ndodu lɛ e ngɛ̃, kanda e bo ngoi zu na ya kwá na lo tɛ Yezo. Kanda e mɛ woni ko, e dɛ bo lɛ e ngɛ̃. Ko oko afa ya, Yezo adɛ nga lɛ lo ngɛ̃.

¹² Na lo ni ko, e tɛ e bo na ya kwá na lo ti Nzɔ̃ Pa mɛ e ndopa, ko na lo ti Nzɔ̃ Pa ni mɛ e ndopa la ĩ lua bɛta du.

¹³ Asu ka ya Buku tɛ Nzapa ya: “Mbi ye lo tɛ Nzapa, nda mɛ mbi ndopa lo tɛ lo la.” Se mɛ nga e ye na lo tɛ lo, ko e ndopa nga na lo ni hɛ̃ azi la.

¹⁴ E hĩnga ya, Nzapa mɛ ndo aso Gbia Yezo na pɛ kwá ko, lo so nga gbanda e na pɛ kwá ya, e na Yezo Kristo e du ndoni kɔi. Ko Nzapa amu gbanda e na ĩ akpã ka gbɛlɛ lo nvɛni.

¹⁵ Aye ko zu mɛ asi adu na lo tɛ ĩ ya, Nzapa ali nzɔ̃ bɛ hɛ̃ azi gba, wa na lo ni ko, ala hɛ̃ lo sia kɔli, ala gonda nga lo.

Ta Polo ndonzɛ̃ ndo ma

¹⁶ Nda mɛ ta e ndonzɛ̃ bɛ gbɔ ma la. Tɛrɛ e ndogbɛ̃ yɛkɛ yɛkɛ, ko abɛ nga so ko, Nzapa ndohɛ̃ nguru hɛ̃ tɔrɔ tɛrɛ e lá kɔi kɔi.

¹⁷ Pɛnɔ mɛ e ndohũ na olo ko, adu nyi pɛnɔ mɛ ta ndoninga ma. Ko pɛnɔ ni ndolɛkɛ hɛ̃ e kota ndima mɛ ndongbã kaka buai. Ko ndima ni na ɔngɔ maka.

¹⁸ Ta sanga ma, ta e ndokpã bɛ e na ndo ye mɛ e ndohũ na lɛ e ma, na lo mɛ ya, ta ye ni ndoninga ma. Kanda e ndokpã bɛ e na ndo ye mɛ ta e ndohũ na lɛ e ma, na lo mɛ ya, ye ni ndongbã kaka buai.