2 Kɔrinto 3 - Fana Ngbangɔ 1987

Awa pangɔ tɛnɛ ti fana ngbanga

¹ Tɛnɛ ko la mbi su ko, ta adu ya, e separa gondangɔ tɛrɛ e fani mɛ ndɛ̃ ma! Ta e na gwɛ̃ tɛ zo ya lo su hɛ̃ e mbɛti mɛ afa ya, e abɛta awa pangɔ kwa tɛ Yezo Kristo, wa e nɔ na ni hɛ̃ ĩ ma. Ta e nga na gwɛ̃ ti hũndangɔ ĩ ya, ĩ su hɛ̃ e mbɛti ni ma. Oko adu se tɛ azi mɛ ndɛ̃ la, kanda ta se tɛ e ti lo la ma.

² Ĩ nvɛni ĩ du nga ma mbɛti tɛ e mɛ Kristo asu ka ya bɛ e, ko zo zu alengbi ti hĩngangɔ ni, alengbi nga ti dingɔ ni.

³ Biani, adu yango ya, ĩ du nga ma mbɛti mɛ Yezo Kristo asu, akpã na yamba ti e ya, e nɔ na ni ka tɛ azi. Ta lo do ngu mbɛti la lo su na mbɛti ni ma, kanda lo su ni na Tɔrɔ Santo tɛ Nzapa, Nzapa mɛ lɛ lo ngɛ̃. Ta lo su nga mbɛti ni na lɛ tɛ́nɛ ma, kanda lo su ni na ya bɛ azi.

⁴ E tɛnɛ so, na lo mɛ ya, na lo tɛ Yezo Kristo la e hĩnga ya, Nzapa la ato e.

⁵ E hĩnga nzɔ̃ni ya, ta e lengbi ti lingɔ kwa ni ko na nguru tɛ e nvɛni ma, kanda e lengbi ti lingɔ kwa ni na nguru tɛ Nzapa.

⁶ Lo la lo hɛ̃ e nguru ya, e du awa kwa ti pangɔ tɛnɛ ti fana ngbangɔ hɛ̃ azi. Ta fana ngbangɔ ni adu ndia mɛ ndo asu sungɔ ma, kanda fana ngbangɔ ni alo ka tɛ Tɔrɔ Santo. Ndia mɛ ndo asu, andoto zo ka ya kwá, kanda Tɔrɔ Santo ndohɛ̃ tɛ lo bɛta du hɛ̃ zo.

⁷ Asu ndo ndia na lɛ tɛ́nɛ, ko na ngoi ni ndo ko, azi ahũ ndo ndima tɛ Nzapa. Yangba lɛ Mɔizɛ asũ ndo sĩ. Na lo ni ko, ta awa Izrayɛlɛ alengbi ndo ti bangɔ yangba lɛ lo toka toka ma. Kanda so pɛni ko, yangba lɛ Mɔizɛ mɛ ndo asũ ko, awe ndo. Ndia mɛ ndoto zo ka ya kwá afa ndo ndima tɛ Nzapa sĩ nvɛni. Ko singa na ni,

⁸ o singa na kwa mɛ Tɔrɔ Santo ali ma! Ngoi mɛ Tɔrɔ Santo ali kwa ko, ndima tɛ Nzapa na ɔngɔ ndoni.

⁹ Na lo ti ndia ko, Nzapa afa ngbanga abi li azi. Ndia mɛ ndofa ngbanga abi li azi ko, afa ndo azi na ndima tɛ Nzapa. Ko singa na ni, o singa na fana ngbangɔ mɛ ndoli ya, azi ati abɛta azi ka lɛ Nzapa ma! Fana ngbangɔ ni na fangɔ azi na ndima tɛ Nzapa ɔngɔ ndoni!

¹⁰ Ko e lengbi nga ti pangɔ ya, ndima mɛ ndo asũ uzu ko, ta adoli bɛ na ndima ti ngoi olo mɛ ma, na lo mɛ ya, ndima ti ngoi olo aɔ ndima ti uzu yɔngɔrɔni nvɛni.

¹¹ Ta ngbina ngbangɔ aninga ndo sĩ ma, ko adu ndo na ndima sĩ. Ko singa na ni, o singa na fana ngbangɔ mɛ na ngbãngɔ buai ma! Fana ngbangɔ na dungɔ tɛ lo na ndima ɔngɔ ndo ngbina ngbangɔ.

¹² E ndotɛnɛ tɛnɛ na kpengba bɛ, na lo mɛ ya, e ndokpã bɛ e na ndo alo ni.

¹³ Ndima tɛ Nzapa ndowɛ ndo yɛkɛ yɛkɛ ka lɛ Mɔizɛ, la Mɔizɛ amu bɔngɔ avĩ na lɛ lo, so gbanzingɔ ya, ta awa Izrayɛlɛ ahu wɛngɔ ti ndima ni ma. Ko ta e nga ma se tɛ Mɔizɛ ma.

¹⁴ Ta awa Izrayɛlɛ alengbi ndo ti mangɔ nda tɛnɛ tɛ Mɔizɛ ma. Ko anɔ ngbĩi asi na lá olo, na ngoi mɛ ala ndodi buku ti ngbina ngbangɔ ko, ta ala ndoma nga nda ni ma. Adu nga ma ala vĩ lɛ la bo na bɔngɔ mɛ ndo Mɔizɛ avĩ na lɛ lo. Bɔngɔ ni ndoha bo na lɛ zo ko la ana Yezo Kristo ati bo kɔi.

¹⁵ Abɛ nga na lá olo, ngoi mɛ ala di buku tɛ Mɔizɛ ko, ta ala ndoma nda ni ma, na lo mɛ ya, adu nga ma bɔngɔ ni avĩ lɛ la.

¹⁶ Kanda nga ma se mɛ asu ka ya Buku tɛ Nzapa ya: “Ngoi mɛ se zo agbinya bɛ lo hɛ̃ Gbia ko, bɔngɔ ni aha ka lɛ lo ati.”

¹⁷ Gbia mɛ Buku tɛ Nzapa ndopa lo tɛ lo adu Tɔrɔ tɛ Nzapa. Wa zo ko la na Tɔrɔ tɛ Nzapa na ya tɛrɛ lo ko, lo du bɔrɔ.

¹⁸ E zu ko la bɔngɔ ni ahã lɛ e ati ko, azi ndohũ ndima tɛ Gbia Yezo Kristo ge yangba lɛ e. Ko ndima ni ndogbinya e ya, e ti nga ma Yezo Kristo. Ndima tɛ e ndomai bo maingɔ. Ko adu ye mɛ Tɔrɔ tɛ Gbia Nzapa ndoli la.