2 Kɔrinto 2 - Fana Ngbangɔ 1987

¹ Na lo ni ko, mbi hɛ̃ nyɔ mbi ya, ta mbi diri mbi nɔ ka tɛ ĩ ma, so mbi sa vundu bɛ ĩ fani mɛ ndɛ̃.

² Ta sanga ma, se mbi sa vundu bɛ ĩ ko, ta zo ti hɛ̃ngɔ mbi dengɔ bɛ da ma, na lo mɛ ya, ĩ zu nga na vundu!

³ Ĩ ba nda mɛ ndo mbi su hɛ̃ ĩ mbɛti mɛ ndɛ̃ na se lɛ gangɔ kai-la. Ĩ du azi mɛ ale ĩ la ĩ lengbi ti dengɔ na bɛ mbi, ko ta mbi ye ya, mbi si ka tɛ ĩ ma, so ĩ sa vundu bɛ mbi. Mbi hĩnga nzɔ̃ni ya, na ngoi ko la mbi du na dengɔ bɛ ko, ĩ zu ĩ du nga na dengɔ bɛ.

⁴ Biani, mbi su hɛ̃ ĩ mbɛti ni na vundu, nga na kota sɔngɔ bɛ sĩ nvɛni. Mbi su nga ni na ngulɛ lɛ mbi. Ko ta mbi su mbɛti ni ya, mbi sa vundu bɛ ĩ ma, kanda mbi su ni so fangɔ na ĩ ya, mbi ndoye ĩ sĩ nvɛni.

Ale e ka lɛ e ndo siɔ ye tɛ zo mɛ ali siɔ ye

⁵ Mbanga zo na popo tɛ ĩ asa vundu bɛ afɔ̃ lo. Ko ta adu ya, lo sa vundu ni bɛ mbi kɔi ma, kanda adu ĩ zu la lo sa vundu ni bɛ ĩ. Oko la mbi nɛ ya, lo sa vundu ni na bɛ ĩ zu ko, afa ya, mbi tɛnɛ tɛnɛ ni aɔ nyɔ kpɔ̃ ni. Kanda mbi separa nɛ pangɔ ya, lo sa vundu bɛ ambanga azi na popo tɛ ĩ.

⁶ Na popo tɛ ĩ ko, azi gba ahɛ̃ ndo zo ni ko etumbu, ko ale etumbu ni awe nga so.

⁷ Nda mɛ na olo ko, ale ĩ ka lɛ ĩ ndo siɔ ye tɛ zo ni ko, ĩ sa nga nguru bɛ lo, so kota vundu ako ndo bɛ lo la.

⁸ Na lo ni ko, mbi gbɔ̃ gɛrɛ ĩ ya, ĩ fa na lo ya, ĩ ndoye lo.

⁹ Wa ĩ ba nda mɛ ndo mbi su hɛ̃ ĩ mbɛti ni ko lo mɛ: mbi separa ndo tarangɔ bɛ ĩ, ya mbi ba bere ĩ ndotɔndɔ atɛnɛ tɛ mbi zu.

¹⁰ Ngoi mɛ se ĩ ka lɛ ĩ ndo siɔ ye tɛ zo ko, mbi ka nga lɛ mbi ndo siɔ ye tɛ zo ni ko. Se adu ya, zo ni ko ali mbi siɔni ko, mbi ka tɛ mbi lɛ mbi ndo siɔ ye tɛ lo wɛ. Mbi ka lɛ mbi ndo ni na lo tɛ ĩ, ko Yezo Kristo la temwɛ tɛ mbi.

¹¹ Mbi ka lɛ mbi ndo ni, so Satana alua lege anwɔ e. Ta sanga ma, ti biani ko, e hĩnga ye mɛ Satana ndosepara lingɔ na e.

Bɛ Polo angbã ngbũ ka kɔdɔrɔ ti Troasi

¹² Ngoi mɛ ndo mbi si ka kɔdɔrɔ ti Troasi so pangɔ Nzɔ̃ Pa tɛ Yezo Kristo ko, mbi hũ ndo ya, Gbia ahɛ̃ ndo mbi nzɔ̃ lege ti pangɔ na Nzɔ̃ Pa ni.

¹³ Kanda bɛ mbi angbã ndo ngbũ nvɛni, na lo mɛ ya, kai ko, ta mbi tã ndo Tito mɛ nyita e wa Kristo ma. Nda mɛ ndo mbi zei azi ti Troasi, mbi zia la, mbi gwe ka sese ti Masedoanɛ la.

E nwɔ siɔ ye zu na lo tɛ Yezo Kristo

¹⁴ É hɛ̃ sia kɔli hɛ̃ Nzapa! Ta sanga ma, lo ndode uzu tɛ e ngoi zu na ya nɔ tɛ e so fangɔ ya, Yezo Kristo anwɔ asiɔ lo zu. Ko oko afa nga ya, e nwɔ nga ni zu, na lo mɛ ya, e na Yezo Kristo e ti bo kɔi. Nzapa ndoto e na ndo kwɛ, ya e pa tɛnɛ tɛ Yezo Kristo, wadila azi ahĩnga lo. Tɛnɛ ni adu nga ma nzɔ̃ yɔmbɔ mɛ afũ amu ndo kwɛ.

¹⁵ Biani, e du nga ma nzɔ̃ yɔmbɔ mɛ Kristo azɔ so dengɔ na bɛ Nzapa, na lo mɛ ya, e ndopa tɛnɛ tɛ Yezo Kristo hɛ̃ azi. Ko finya nzɔ̃ yɔmbɔ ni agundu na popo tɛ azi mɛ amu lege ti songɔ kwá, agundu nga na popo tɛ azi mɛ amu lege tɛ Nzapa.

¹⁶ Azi mɛ amu lege ti songɔ kwá ndomu finya ni ko ka lɛ la nga ma nzɔ̃ yɔmbɔ mɛ ahɛ̃ la bɛta du. Wa tɛ azi mɛ ayu lege tɛ Nzapa ko, ala ndomu tɛ la finya ni ko ka lɛ la nga ma adu siɔ finya mɛ ndokpɔ la. Ko zo mɛ alengbi ti lingɔ kwa ni ko na nguru tɛ lo na?

¹⁷ Ambanga azi ma ya ma amu tɛnɛ tɛ Nzapa ndode na buze so luangɔ na faranga, ko ta e tɛ e nga ma la ma. Kanda e du awa pangɔ kwa tɛ Yezo Kristo, Nzapa la ato e, e ndopa nga tɛnɛ tɛ lo na bɛ e kɔi, ko lo ndohũ e.