2 Kɔrinto 13 - Fana Ngbangɔ 1987

Ndangba tɛnɛ

¹ Mbi na gangɔ ka tɛ ĩ ti fani ota. Ko e na fangɔ ngbanga tɛ azi na se mɛ asu na ni ka ya Buku tɛ Nzapa ya: “Se zo avɔ̃ to tɛrɛ fɔ̃ lo ko, ale atemwɛ adu osɛ bere ota, ko ala tɛnɛ bo tɛnɛ kɔi, wadila afa ngbanga ti tɛnɛ ni.”

² Mbi separa tisangɔ azi mɛ ndo ali siɔ ye uzu, mbi separa nga tisangɔ azi mɛ ndɛ̃ zu. Mbi tisa ndo la uzu na ngoi mɛ ndo mbi nɔ ka tɛ ĩ ti fani osɛ. Ko na olo, ta mbi ka popo tɛ ĩ ma ko, mbi diri mbi tisa la ya: ngoi mɛ mbi na diringɔ gangɔ ka tɛ ĩ ko, ta mbi na mangɔ vundu tɛ zo kɔi ma.

³ Ĩ ndosepara ya, tɛnɛ mɛ mbi ndotɛnɛ ko, ale mbi fa ya, Yezo Kristo la ndotɛnɛ ni ti nyɔ mbi biani. Wa mbi na fangɔ na ĩ. Se mɛ Kristo ndoli na ye tɛrɛ ĩ ko, ta adu woni ma, kanda lo ndofa nguru tɛ lo na popo tɛ ĩ.

⁴ Ti biani, ngoi mɛ ndo agɔngɔ lo ndo krusi ko, lo ndo woni. Kanda na olo ko, lo so, ko lo ndodu lɛ lo ngɛ̃ na nguru tɛ Nzapa. Wa tɛ e ko, e na lo e ti bo kɔi, ko e nga woni. Kanda e na lo e ndodu nga lɛ e ngɛ̃ ndoni kɔi. Ko kwa mɛ e na lingɔ ka popo tɛ ĩ ko, e na lingɔ ni na nguru tɛ Nzapa.

⁵ Ale ĩ ndohũndangbi tɛrɛ ĩ ya, bere ĩ ye lo tɛ Yezo Kristo na bɛ ĩ kɔi. Ko se ĩ li nga so ko, ĩ hĩnga ya, Yezo Kristo ndodu ka ya bɛ ĩ, ta seni la ma? Ta ĩ lengbi ti fangɔ ya, ĩ awa yengɔ lo tɛ lo ma?

⁶ Ko mbi ndolɛndɛrɛ ya, ĩ na hũngɔ ya, tɛ e ko, e lengbi ti fangɔ ya, e du abɛta awa parfgɔ kwa tɛ Yezo Kristo.

⁷ E ndosambela Nzapa hɛ̃ ĩ ya, ta ĩ li siɔ ye kɔi ma. Bɛ se ta e lua lege ti fangɔ na ĩ ya, e du abɛta awa pangɔ kwa tɛ Yezo Kristo ma ko, e ye bo ya, ale ĩ li nzɔ̃ lo.

⁸ Ta sanga ma, ta e lengbi ti lingɔ ye mɛ ndogbanzi lege ti bɛta lo tɛ Nzapa ma. Kanda e lengbi bo ti lingɔ ye mɛ ndozi lege ni.

⁹ Ngoi mɛ se ĩ du kpengbani na lege tɛ Nzapa, ko e du tɛ e woni ko, e ndosaba. Ko na ya sambela tɛ e ko, e ndohũnda nga Nzapa ya, ĩ ti abɛta anzɔ̃ azi.

¹⁰ Na lo ni la ngoi mɛ mbi ge yɔngɔrɔni ko, mbi su mbɛti olo hɛ̃ ĩ ya, ngoi mɛ gbanda mbi si ka tɛ ĩ ko, ta mbi lɔngbi ló hɛ̃ ĩ, na lo nguru mɛ Nzapa ahɛ̃ mbi ma. Nzapa ahɛ̃ mbi nguru ni ya, mbi kpengba na lo yengɔ tɛ ĩ. Kanda ta lo hɛ̃ mbi nguru ni ya, mbi gbɛ̃ ĩ ma.

Ndangba balangɔ

¹¹ Aya bua, na olo ko, mbi zei ĩ! Ale ĩ li kpengbani ya, ĩ ti abɛta anzɔ̃ azi. Ale ĩ sa nguru bɛ afɔ̃ ĩ, ale nyɔ ĩ ase kɔi, ale ĩ du nga na mangbingɔ, wadila Nzapa adu ndoni kɔi na ĩ. Lo ndoye azi, lo ndoli ya, bɛ azi adu pii.

¹² Ale ĩ balangbi tɛrɛ ĩ nzɔ̃ni na se tɛ awa Kristo. Awa Kristo zu mɛ ge abala nga ĩ.

¹³ Gbia Kristo ali bɛ nzɔ̃ bɛ hɛ̃ ĩ zu ma ke! Nzapa mɛ ndoye azi, aye bɛ nga ĩ zu ma ke! Tɔrɔ Santo abombi bɛ nga ĩ zu ndoni kɔi ma ke!