2 Kɔrinto 12 - Fana Ngbangɔ 1987

Gbia Yezo afa Polo na aye na ya Suma

¹ Abɛ se ta adu nzɔ̃ni ya, mbi gonda tɛrɛ mbi ma ko, ale mbi gonda bo tɛrɛ mbi. Wa na olo ko, mbi na pangɔ hɛ̃ ĩ aye mɛ ndo Gbia Yezo apa hɛ̃ mbi na ya Suma, nga na lo mɛ ndo lo fa na mbi.

² Mbi hĩnga mbanga wa Kristo kɔi mɛ aɔ na olo buru sui kɔi ndoni siɔ ko, Nzapa aya lo, akpã lo ka yayu ka tɛ lo. (Bere Nzapa aya ndo lo biani ee, bere adu ndo suma la lo hũ ee, ta mbi hĩnga ma, bo Nzapa kɔi la ahĩnga.)

³ Biani mbi hĩnga ya, Nzapa aya ndo kɔli ni ko akpã lo ka paradizo ka tɛ lo. (Ko mbi ti mbi pa ya, bere Nzapa aya ndo lo biani ee, bere adu ndo suma la lo hũ ee, ta mbi hĩnga ma, bo Nzapa kɔi la ahĩnga.)

⁴ Ko ka Paradizo la lo ma tɛnɛ mɛ ta zo alengbi ti tɛnɛngɔ ma, tɛnɛ mɛ ale ta zo atɛnɛ nga ma.

⁵ Mbi na gondangɔ tɛrɛ mbi na lo tɛ kɔli ni ko, wa ta mbi na gondangɔ tɛrɛ mbi na lo tɛ mbi nvɛni ma. Kanda mbi na gondangɔ tɛrɛ mbi bo na lo ti ye zu mɛ ndofa ya, mbi woni.

⁶ Se adu ya, mbi ye gondangɔ tɛrɛ mbi ko, ale ta mbi na gondangɔ tɛrɛ mbi gɛgɛrɛ, nga ma se tɛ wa nyingɔ ma, ta sanga ma, tɛnɛ mɛ mbi ye tɛnɛngɔ ko, adu bɛta tɛnɛ. Ko ta mbi ye gondangɔ tɛrɛ mbi ma, ta sanga ma, ta mbi separa ya, zo amu mbi ya, mbi kota zo na lo ti ye mɛ mbi ndogonda tɛrɛ mbi na lo ni ma. Kanda mbi ye ya, zo atɔndɔ mbi na lo ti sé du tɛ mbi mɛ lo ndohũ, nga na lo ti tɛnɛ mɛ lo ndoma na nyɔ mbi.

⁷ Ta Nzapa ndoye ya, mbi yakɛ tɛrɛ mbi na lo ti aye ma wo ma mɛ ndo lo fa na mbi ma, nda mɛ ndo lo hɛ̃ mbi pɛnɔ mɛ ndosɔ sĩ la. Pɛnɔ ni ndosɔ tɛrɛ mbi, ko adu nga ma Satana ato wa kwa tɛ lo ya, lo sɔ̃ mbi. Ko adu so, wadila ta mbi yakɛ tɛrɛ mbi ma.

⁸ Mbi vɔrɔ ndo Gbia fani ta na lo ti pɛnɔ ni ya, lo hã ni tɛrɛ mbi lo zi.

⁹ Ko lo gbinya ndo hɛ̃ mbi ya, nzɔ̃ bɛ mɛ ni li hɛ̃ mbi alengbi, ta sanga ma, ngoi ko la mbi du woni, wadila nguru tɛ ni afa tɛrɛ lo yango. Wa se adu so ko, mbi separa na bɛ mbi kɔi ya, mbi gonda tɛrɛ mbi na lo ti aye mɛ afa ya, mbi woni, wadila nguru tɛ Kristo ali kwa na tɛrɛ mbi.

¹⁰ Na lo ni la mbi ndosaba na ngoi mɛ mbi woni, na ngoi mɛ aguru mbi, na ngoi mɛ mbi hũ pɛnɔ, nga na ngoi mɛ ahɛ̃ mbi pɛnɔ. Pɛnɔ ni mɛ mbi ndohũ ko, adu na lo tɛ Kristo. Ta sanga ma, na ngoi ko la mbi du woni ko, ngoi mɛ mbi du kpengbani la.

Bɛ Polo angbã ngbũ na ndo awa Kristo ti Kɔrinto

¹¹ Mbi tɛnɛ tɛnɛ ti gondangɔ tɛrɛ mbi ma bere mbi ti wa nyingɔ. Ĩ la ĩ li ya, mbi tɛnɛ so. Ĩ la ĩ lengbi ti lɛngɔ kongba tɛ mbi ya, ta pa ili mbi agbɛ̃ ma. Ta sanga ma, bɛ se mbi du gɛgɛrɛ zo ko, awa pangɔ kwa tɛ Yezo Kristo mɛ ĩ ndohũ la ya, ala du ngbondoni ko, ta ala ɔ mbi ma.

¹² Na ngoi mɛ ndo mbi ka tɛ ĩ ko, mbi gbe ndo bɛ mbi sĩ na ya kwa mɛ ndo mbi li. Ko mbi li ndo akukuna ye na aye ti kpɛnɛ na nguru tɛ Nzapa. Ko aye ni ko zu afa ya, mbi bɛta wa pangɔ kwa tɛ Yezo.

¹³ Anzɔ̃ ye mɛ ndo mbi li hɛ̃ azi ti Eklezia mɛ ndɛ̃ ko, mbi li ndo nga ni hɛ̃ ĩ. Kɔtɛ ye mɛ ndo ta mbi li hɛ̃ ĩ ma la, ta mbi yɔ ndo faranga ti ĩ ma. Wa ĩ ka le ĩ ndo siɔ ye ko la mbi li tɛrɛ ĩ, na lo mɛ ya, ta mbi yɔ ndo faranga ti ĩ ma!

¹⁴ Mbi ndolɛkɛ tɛrɛ mbi ya, mbi ga ka tɛ ĩ ti fani ta. Ko ngoi mɛ mbi na singɔ kai ko, ta mbi na yɔngɔ faranga ti ĩ ma, na lo mɛ ya, ta mbi na gwɛ̃ faranga tɛ ĩ ma, kanda mbi na gwɛ̃ tɛ ĩ. Ti biani ko, ta ayangambi la ndogi faranga so kãngɔ na awa dúngɔ la ma. Kanda awa dúngɔ ayangambi la ndogi faranga so kãngɔ na aya la.

¹⁵ Tɛ mbi ko, mbi na dungɔ na dengɔ bɛ sĩ ya, mbi ka aye tɛ mbi zu hɛ̃ ĩ gɛgɛrɛ, ko mbi ka nga tɛrɛ mbi nvɛni hɛ̃ ĩ na ndo ni, so zangɔ ĩ. Nga ma la mbi ye ĩ sĩ nvɛni ko, ta ĩ ye nga mbi sĩ ma?

¹⁶ Wa ĩ hĩnga ya, ta mbi yɔ ndo faranga ti ĩ ma. Kanda ambanga azi na popo tɛ ĩ na karangɔ ló tɛrɛ mbi Polo ya, mbi wa poroso, ko mbi handa ndo ĩ na tɛnɛ ti nvɛnɛ, mbi mu faranga tɛ ĩ ti ĩ mbi kã.

¹⁷ Na popo tɛ azi mɛ ndo mbi to la ka tɛ ĩ ko, mbi pa ndo hɛ̃ mbanga ya, lo handa ĩ, lo mu aye tɛ ĩ lo kã? Ipɔ!

¹⁸ Mbi gbɔ̃ ndo gɛrɛ Tito ya, lo nɔ ka tɛ ĩ. Ko mbi to ndo lo na mbanga nyita e wa Kristo mɛ ĩ hĩnga lo nzɔ̃ni. Ko ĩ na pangɔ ya, Tito ahanda ndo ĩ, amu aye tɛ ĩ ti ĩ aka? Ipɔ! Ye mɛ ndo mbi li, na omɛ ndo nga lo li ko, adu kwɛ kɔi, ko dangɔ bɛ tɛ e ndo nga kwɛ kɔi.

¹⁹ Ato ndo gã, ĩ ndoda bɛ ĩ ya, e ndoye kambisangɔ nyɔ e? Ipɔ, ta seni la ma! Na lɛ Nzapa ko, e ndotɛnɛ tɛnɛ nga ma se mɛ Kristo aye. Aya bua, e ndotɛnɛ tɛnɛ ko zu ya, ĩ mai na ya lo yengɔ tɛ ĩ.

²⁰ Mbi ndokpe ya, na ngoi mɛ gbanda mbi ga ka tɛ ĩ ko, ta bɛ mbi asɔ na lo ti sé du tɛ ĩ, ko bɛ ĩ asɔ nga na lo ti sé du tɛ mbi ma. Mbi ndokpɛ ya, ta mbi tã ĩ na pangɔ pa, na lingɔ sɔbɛrɛ, na lingɔ ngɔnzɔ, na kangbingɔ popo tɛ ĩ, na gurungbingɔ tɛrɛ ĩ, na dingbingɔ, na lingɔ yakɛ, nga na lingɔ ye yenge yenge ma.

²¹ Mbi ndokpɛ ya, ngoi mɛ se mbi ti mbi si ka tɛ ĩ ko, ta Nzapa tɛ e asa kamɛnɛ lɛ mbi na gbɛlɛ ĩ ma. Ta sanga ma, mbi ndokpɛ ya, so mbi ga mbi tã azi ma ya ma mɛ ta agbinya bɛ la ma. Ala ndoli asiɔ ye ti kamɛnɛ, na asiɔ ye mɛ ndobi kamɛnɛ lɛ zo. Mbi ndokpɛ ya, ta mbi to to so la ma.