2 Kɔrinto 11 - Fana Ngbangɔ 1987

Polo na awa pangɔ kwa tɛ Yezo Kristo na nvɛnɛ

¹ Mbi na tɛnɛngɔ tɛnɛ ma bere mbi wa nyingɔ. Ko mbi ye ya, ĩ gbe bɛ ĩ, ĩ ma mbi. Biani, ale ĩ gbe bɛ ĩ, ĩ ma mbi.

² Mbi ndoli sɔbɛrɛ na lo tɛ ĩ, nga ma se mɛ Nzapa ndoli na sɔbɛrɛ na lo tɛ ĩ. Ta sanga ma, ĩ du nga ma mɔsia mɛ mbi gbe lo tɛ lo ya, lo du bo na kɔli kɔi, kɔli ni la Yezo Kristo. Ko mbi ye ya, ĩ du na vuru bɛ, wa gbanda mbi hɛ̃ ĩ nga ma mɔsia mɛ ade li lo ngbɔ̃ hɛ̃ lo.

³ Ĩ du azi mɛ ĩ hɛ̃ tɛrɛ ĩ zu hɛ̃ Yezo Kristo, ĩ nga na vuru bɛ na ndo lo. Ko mbi ndokpɛ ya, nga ma se ko ndo ngbɔ ahanda na Eva na poroso ko, ta Satana agbe nga dangɔ bɛ tɛ ĩ, ko ĩ dɔ lege tɛ Yezo Kristo ĩ zia ma.

⁴ Ta sanga ma, se azi aga apa lo tɛ Yezo mɛ aɔngbi na omɛ ndo e pa hɛ̃ ĩ ko, ĩ ndoye ya, ala ha na ĩ. Tɔrɔ mɛ ala ndopa lo tɛ lo hɛ̃ ĩ ko, ta adu Tɔrɔ Santo mɛ ĩ lua ma. Ko Nzɔ̃ Pa mɛ ndo e pa hɛ̃ ĩ, ĩ ye lo ni ko, ta ni la ala ndopa hɛ̃ ĩ ma.

⁵ Awa pangɔ kwa tɛ Yezo ko la ĩ ndomu la ka lɛ ĩ ya, ala du ngbondoni ko, mbi da bɛ mbi ya, ta ala ɔ mbi bɛ kɔi ma.

⁶ Bere ta mbi hĩnga tɛnɛngɔ tɛnɛ nzɔ̃ni ma, kanda mbi hĩnga ló mɛ mbi ndopa. Na ya alo zu ko, mbi fa ndo na ĩ yango ya, mbi hĩnga ló mɛ mbi ndopa.

⁷ Ngoi mɛ ndo mbi pa na Nzɔ̃ Pa tɛ Nzapa hɛ̃ ĩ ko, ta mbi hũnda ndo ĩ ya, ĩ futa mbi ma. Mbi zu ndo na tɛrɛ mbi ya, Nzapa aya ĩ. Ko oko adu ya, mbi li ndo ĩ siɔni la? Ipɔ!

⁸ Mbi ye ndo ya, adu awa Eklezia ti kɔdɔrɔ mɛ ndɛ̃ hĩ wadila ala futa mbi. Adu ndo ma bere mbi mu faranga na ti la mbi kã ya mbi za ĩ na pangɔ Nzɔ̃ Pa tɛ Nzapa.

⁹ Ngoi mɛ ndo mbi ka tɛ ĩ, mbi ndo nga na gwɛ̃ ti faranga ko, ta mbi yɔ ndo ye kɔi na ti ĩ ma! Ta sanga ma, ayata e awa Kristo mɛ ndo alo ka sese ti Masedoanɛ aga ko, ala hɛ̃ ndo mbi aye mɛ mbi na gwɛ̃ ni. Na ya alo zu ko, ta mbi yɔ ndo ye kɔi na ti ĩ ma, ko mbi ye bo ya, ta mbi yɔ ye na ti ĩ ma.

¹⁰ Ko mbi na gondangɔ tɛrɛ mbi na lo ni. Mbi pa ya, na ya sese ti Grɛsɛ zu ko, ta zo kɔi ti gbanzingɔ mbi na gondangɔ tɛrɛ mbi na lo ni da ma. Ko na ili Yezo Kristo mɛ ndopa bɛta tɛnɛ ko, tɛnɛ ko la mbi tɛnɛ ko, adu bɛta tɛnɛ.

¹¹ Mbi tɛnɛ so, na lo mɛ ya, ta mbi ndoye ĩ ma? Ipɔ! Nzapa ahĩnga ya, mbi ndoye ĩ!

¹² Awa pangɔ kwa tɛ Yezo Kristo na nvɛnɛ ndoyɔ faranga ti ĩ. Ta mbi ndoyɔ tɛ mbi faranga ti ĩ ma. Ko mbi ye bo ya, ta mbi yɔ faranga ti ĩ ma, so ala lua lege, agonda tɛrɛ la ya, ani ndoli kwa nga ma se tɛ mbi.

¹³ Ta ala du abɛta awa pangɔ kwa tɛ Yezo Kristo ma. Ala ndopa nvɛnɛ na lo ti kwa mɛ ala ndoli. Ala ndohanda azi ya, ani awa pangɔ kwa tɛ Yezo Kristo, kanda ta seni la ma.

¹⁴ Ko ta e lengbi ti bemangɔ na lo ni ma, ta sanga ma, Satana nvɛni alengbi ti gbinyangɔ tɛrɛ lo, tingɔ nga ma angelo mɛ alo ka vuru ndo.

¹⁵ Wa se awa kwa tɛ Satana agbinya nga tɛrɛ la, ati nga ma abɛta awa kwa tɛ Nzapa ko, ta e lengbi ti bemangɔ na lo ni ma. Ko na ndangba bi gbanda ko, Nzapa ahɛ̃ la gbanda etumbu, alengbi na siɔ ye mɛ ala li.

Apɛnɔ mɛ Polo agbe bɛ lo na ya ni

¹⁶ Mbi diri mbi pa ya: ale ta zo kɔi amu mbi ka le lo ya, mbi wa nyingɔ ma. Bere se ĩ mu mbi ka le ĩ ya, mbi wa nyingɔ ko, ale ĩ ye ya mbi wa nyingɔ, wa mbi gonda nga tɛrɛ mbi yakere.

¹⁷ Biani, tɛnɛ ti gondangɔ tɛrɛ mbi mɛ mbi ndotɛnɛ na olo ko, ta adu ya, Gbia la aye ya mbi gonda tɛrɛ mbi ma. Ko ngoi mɛ mbi ndogonda tɛrɛ mbi ko, mbi ndotɛnɛ tɛnɛ ma bere mbi wa nyingɔ.

¹⁸ Wa nga ma la azi mɛ ndɛ̃ ma ya ma ndogonda tɛrɛ la na lo ti aye ti lɛ sese ko, mbi nga na gondangɔ tɛrɛ mbi.

¹⁹ Ĩ mɛ awa ndara ko, ĩ ndokɛ̃ kia ĩ gbe bɛ ĩ na lo tɛ awa nyingɔ!

²⁰ Ĩ ndogbe bɛ ĩ ya, abi ĩ ambɛ, bere amu aye tɛ ĩ ti ĩ na poroso, ahanda ĩ, asamana na ĩ, agia nga bɛ ĩ.

²¹ Mbi ndoma kamɛnɛ ti pangɔ ya, ta e ndo na nguru bɛ yakere ti lingɔ so ma! Kanda se zo atara ya, ni gonda tɛrɛ ni na lo ti ye kɔi ko, mbi nga na tarangɔ ya, mbi gonda tɛrɛ mbi. Mbi tɛnɛ tɛnɛ olo so ma bere mbi wa nyingɔ.

²² Ala ndopa ya, ani awa Ebreo, ko mbi nga wa Ebreo! Ala ndopa ya, ani awa Izrayɛlɛ, ko mbi nga wa Izrayɛlɛ. Ala ndopa ya, ani atara Abrahama, ko mbi nga tara Abrahama.

²³ Ala ndopa ya, ani awa kwa tɛ Yezo Kristo, ko mbi wa kwa tɛ Yezo Kristo mbi ɔ la. Mbi tɛnɛ so ma bere ta kpe li mbi da ma. Mbi ndoli kwa mbi ɔ la. Fani sĩni ko, abi ndo mbi bɔlɔkɔ aɔ la. Asɔ̃ ndo mbi aɔ la. Fani sĩni nvɛni ko, kwá alu ndo mbi aɔ la.

²⁴ Fani kɔ̃, agbia tɛ Ayuda ahɛ̃ ndo nyɔ, ko asɔ̃ mbi na fimbo. Ko fani kɔi kɔi mɛ ndo asɔ̃ mbi ko, asɔ̃ ndo mbi fani sui ta ndoni gumbaya.

²⁵ Fani ta, agbia ti Roma ahɛ̃ ndo nyɔ, ko asɔ̃ mbi na kɛkɛ. Fani kɔi ko, aboroka ndo mbi na tɛnɛ ya aho mbi. Masua atu ndo na mbi fani ta. Fani kɔi ko, mbi la ndo ka lɛ ngu lá kɔi bi nga kɔi.

²⁶ Fani sĩni mɛ ndo mbi ndogwe fɔnɔ ko, mbi so ndo kwá ti ngu mɛ asĩsĩ ako gegi, mbi so ndo kwá na ti awa nzĩ. Mbi so ndo kwá na ti azi mɛ ta Ayuda ma, mbi so ndo kwá na ti ayata mbi Ayuda nvɛni. Mbi so ndo kwá na ti awa nvɛnɛ mɛ ndopa ya, ani awa Kristo. Mbi so ndo kwá na ya akɔdɔrɔ, ka bɛ ndo, nga ka lɛ kota ngu.

²⁷ Mbi li ndo akpengba kwa, mbi nzɛ̃ ndo nga. Fani sĩni ko, ta mbi ndola ndo langɔ na bi ma. Gwɛ̃ tɛ na gwɛ̃ ngu ndogbɔ̃ ndo mbi. Fani sĩni ko, mbi ndokɛ̃ ndo tengɔ ye. Mbi ndohũ ndo pɛnɔ ti de, ta mbi ndo nga na bɔngɔ ma.

²⁸ Mbi hũ ndo nga apɛnɔ mɛ ndɛ̃ mɛ ta mbi lengbi ti dikɔngɔ ni ma. Mbi ndoda ndo bɛ mbi na azi ti Eklezia zu, ko lá kɔi kɔi ko, bɛ mbi ndosɔ ndo so la.

²⁹ Se ta yengɔ lo tɛ Yezo ali bɛ zo kpa ma ko, asɔ bɛ mbi ma bere adu mbi. Se zo ali siɔ ye ko, azɔ bɛ mbi ma wá.

³⁰ Se mbi ye gondangɔ tɛrɛ mbi ko, mbi na gondangɔ tɛrɛ mbi na lo ti aye zu mɛ ndofa ya, mbi woni.

³¹ Nzapa mɛ To Gbia Yezo ahĩnga ya, tɛnɛ ko la mbi tɛnɛ ko, ta adu nvɛnɛ ma. Agonda bɛ Nzapa buru na buru ma ke!

³² Ngoi mɛ ndo mbi ka kɔdɔrɔ ti Damasi ko, gbia tɛ leta akpã ndo aturugu ka anyɔ gbágbá ti briki mɛ aka kɔdɔrɔ ni kɛrɛrɛ ya, na singɔ mbi ko, ala gbɔ̃ mbi. Arestasi mɛ ndo gbia ti sese la akpã gbia tɛ leta ni ko.

³³ Ko awa Kristo mɛ ka Damasi amu ndo mbi ama na mbi ti tɛrɛ gbágbá mɛ aka Damasi kɛrɛrɛ, akpã mbi na ya sakpa, aɔ na mbi ti nyɔ pula ti gbágbá ni, azu na mbi ka pɛ gbágbá ni. La mbi kpɛ ndo ti aturugu ni mbi ɔ.