2 Kɔrinto 10 - Fana Ngbangɔ 1987

Polo apa ya nguru tɛ ni alo ka tɛ Nzapa

¹ Mbi Polo, mbi gbɔ̃ gɛrɛ ĩ na lo ye kɔi. Azi ndopa tɛnɛ na ili mbi ya, ngoi mɛ mbi e na ĩ, e du ndoni kɔi ko, mbi tɛnɛ tɛnɛ mɛ woni, wa ngoi mɛ mbi du yɔngɔrɔni na ĩ ko, mbi ti wa tɛnɛngɔ kpengba tɛnɛ hɛ̃ ĩ. Yezo Kristo adu dede zo, lo nga wa nzɔ̃ bɛ. Na lo ni ko, lo mɛ mbi gbɔ̃ gɛrɛ ĩ na lo ni lo mɛ:

² na ngoi mɛ gbanda mbi si ka tɛ ĩ ko, ta ĩ li ya, mbi ti wa tɛnɛngɔ kpengba tɛnɛ hɛ̃ ĩ ma. Ambanga azi na popo tɛ ĩ ndokara ló na ili mbi ya, mbi ndoli kwa na se kɔdɛ tɛ azi ti lɛ sese. Ko mbi hĩnga nzɔ̃ni ya, ngoi mɛ mbi na singɔ ka tɛ ĩ ko, mbi na fangɔ na la ya, mbi wa tɛnɛngɔ kpengba tɛnɛ.

³ Biani, e ndodu ge lɛ sese, ko to mɛ e ndotiri ko, ta e ndotiri ni nga ma se mɛ azi ti lɛ sese ndotiri na to ma.

⁴ Aye ti tiringɔ na to mɛ e ndotiri na to ko, ta adu tɛ azi ti lɛ sese ma, kanda adu akpengba ye ti tiringɔ na to mɛ alo ka tɛ Nzapa. Akpengba ye ti tiringɔ na to ni alengbi ti gbɛ̃ngɔ kpengba da mɛ awa kɛ̃ngɔ Nzapa ndobere da. E ndogbɛ̃ asiɔ kɔdɛ tɛ azi.

⁵ Ye zu ko la azi ndoli na yakɛ ya, agbanzi zo na hĩngangɔ lege tɛ Nzapa ko, e ndogbɛ̃ nga ni. E ndotɛnɛ tɛnɛ zu hɛ̃ azi so gbinyangɔ dangɔ bɛ tɛ la ya, ala ma nyɔ Kristo.

⁶ Ngoi mɛ se e hũ ya, ĩ ndoma nyɔ e na seni ko, e na hɛ̃ngɔ etumbu hiɔ hɛ̃ ambanga azi na popo tɛ ĩ mɛ ndokɛ̃ mangɔ nyɔ e.

⁷ Ĩ ndomu aye ka lɛ ĩ bo nga ma se mɛ ĩ ndohũ na ni. Wa se zo ahĩnga biani ya, ni zo tɛ Kristo ko, ale lo hĩnga nga ya, mbi nga zo tɛ Kristo nga ma se tɛ ni.

⁸ Gbia Yezo ahɛ̃ mbi nguru ya, mbi kpengba na ĩ na ya lo yengɔ tɛ ĩ. Ko ta nguru ni adu nguru ti gbɛ̃ngɔ lo yengɔ ni ma. Ko abɛ nga mbi gonda tɛrɛ mbi na lo ti nguru ni aɔ maka ko, ta kamɛnɛ na gbɔ̃ngɔ mbi ma.

⁹ Ta mbi ye ya, na lo ti mbɛti mɛ mbi su hɛ̃ ĩ ko, ĩ du na dangɔ bɛ ya, mbi ye sangɔ mbɛtɔ bɛ ĩ ma.

¹⁰ Andopa ya, na ya ambɛti mɛ mbi ndoto hɛ̃ ĩ ko, mbi ndotɛnɛ hɛ̃ ĩ akpengba tɛnɛ, mbi ndolɔngbi nga ló hɛ̃ ĩ, wa ngoi mɛ se mbi nvɛni mbi du na popo tɛ ĩ ko, mbi tɛnɛ tɛnɛ mɛ woni, ko tɛnɛ ni adu nga gɛgɛrɛ.

¹¹ Ko ale azi ko ndopa so ahĩnga nzɔ̃ni ya, ló mɛ e ndosu hɛ̃ ĩ na ya mbɛti, na ngoi mɛ e ge yɔngɔrɔni na ĩ ko, nga bo ló ni ko la e na lingɔ na ngoi mɛ e na singɔ ka tɛ ĩ.

¹² Ambanga azi ndomu tɛrɛ la ya, ani akota azi. Ko ta e lengbi bɛ ti nɛngɔ ya, e na la kwɛ kɔi ma, ta e lengbi bɛ nga ti hangɔ tɛrɛ e na la ma. Ta ala na kɔdɛ ma, ta sanga ma, ala ndokpã maka ti tɛrɛ la nvɛni so hangɔ tɛrɛ la na ni, ko ala ndoha tɛrɛ la bo na tɛrɛ la nvɛni.

¹³ Wa tɛ e ko, ta e lengbi ti gondangɔ tɛrɛ e ɔngɔ maka ma. Kanda e lengbi ti gondangɔ tɛrɛ e bo na lo ti kwa mɛ Nzapa ahɛ̃ e. Kwa mɛ lo hɛ̃ e adu ya, lo hɛ̃ e lege ya, e nɔ ngbĩi e si nga ka tɛ ĩ.

¹⁴ Ko ngoi mɛ ndo e si ka tɛ ĩ so pangɔ Nzɔ̃ Pa tɛ Yezo Kristo ko, ta e ɔ ndo maka ti kwa mɛ Nzapa ahɛ̃ e ma.

¹⁵ La e ngbã na ndo maka ti kwa tɛ e. Ta e gonda tɛrɛ e na lo ti kwa mɛ azi mɛ ndɛ̃ ali ma. Kanda e ndolɛndɛrɛ ya, lo yengɔ tɛ ĩ amai, wadila e li kwa mɛ ngbondoni ka popo tɛ ĩ aɔ ti uzu. Ko ale e li bo kwa ni, e ngbã na ndo maka ti kwa tɛ e.

¹⁶ Wa so pɛni ko, e na nɔngɔ pangɔ Nzɔ̃ Pa hɛ̃ azi mɛ ndodu ka sese mɛ ka pɛ ĩ. Adu sese mɛ ta ade apa Nzɔ̃ Pa da ma. Ko ta e na gondangɔ tɛrɛ e na lo ti kwa mɛ ndo azi mɛ ndɛ̃ ali ka sese mɛ Nzapa ahɛ̃ la ya, ala li kwa da ma.

¹⁷ Ko nga ma se mɛ Buku tɛ Nzapa apa ya: “Zo ko la asepara gondangɔ tɛrɛ lo ko, ale lo gonda tɛrɛ lo na lo ye mɛ Gbia Nzapa ali.”

¹⁸ Ti biani ko, zo ko la ndogonda tɛrɛ lo nvɛni ko, ta Nzapa ndohɛ̃ lo ndima ma, kanda zo mɛ Nzapa ndogonda lo ko, zo mɛ alua ndima la.