2 Kɔrinto 1 - Fana Ngbangɔ 1987

Balangɔ

¹ Mbi Polo mɛ ndo Nzapa asara mbi na se bɛ lo nvɛni akpã ya, mbi du wa pangɔ kwa tɛ Yezo Kristo, nga na nyita e Timɔte la e to mbɛti olo hɛ̃ ĩ. E bala ĩ. E to mbɛti olo hɛ̃ ĩ azi ti Eklezia mɛ ka Kɔrinto. E to nga mbɛti ni hɛ̃ azi tɛ Nzapa zu mɛ ndodu ka sese ti Grɛsɛ zu.

² To e Nzapa na Gbia Yezo Kristo ali bɛ nzɔ̃ bɛ hɛ̃ ĩ, ali bɛ nga ya, bɛ ĩ adu pii ma ke!

Polo ahɛ sia kɔli hɛ Nzapa

³ É gonda Nzapa mɛ To Gbia tɛ e Yezo Kristo. Lo To e mɛ lo ndoma vundu sĩ, lo nga Nzapa mɛ ndosa nguru bɛ azi ngoi zu!

⁴ Lo ndosa nguru bɛ e na ya apɛnɔ zu mɛ e ndohũ. Lo ndoli so ya, e sa nga nguru na bɛ azi mɛ ndohũ le apɛnɔ ndɛ̃ ndɛ̃ ndɛ̃, nga ma se mɛ lo ndosa na nguru bɛ e.

⁵ Yezo Kristo ahũ ndo pɛnɔ sĩ, ko se ko la e ndohũ pɛnɔ sĩ nga ma lo ko, se mɛ nga e ndolua nguru sĩ ti ndo lo la.

⁶ Se e hũ pɛnɔ ko, alengbi ya, e hũ pɛnɔ ni so sangɔ nguru bɛ ĩ, ko ĩ ngbã nga na lege ti songɔ kwá. Se e lua nguru ko, alengbi ya, e lua nguru ni ko so sangɔ nga nguru bɛ ĩ, wadila ĩ gbe nga bɛ ĩ na ya gi tɛrɛ apɛnɔ mɛ e ndohũ.

⁷ E hĩnga nzɔ̃ni ya, ĩ na ngbãngɔ na lege ti songɔ kwá. E hĩnga nga ya, Nzapa ndosa nguru bɛ ĩ, nga ma se mɛ lo ndosa nguru bɛ e, na lo mɛ ya, ĩ ndohũ pɛnɔ nga ma se mɛ e ndohũ nga na pɛnɔ.

⁸ Aya bua, e ye ya í hĩnga ya, e hũ ndo pɛnɔ sĩ nvɛni ka sese ti Azia. Pɛnɔ ni anɛ ndo tɛrɛ e nga ma ndo, e ha ndo gbengɔ bɛ e gba, ko e ndoda ndo bɛ e ya, ta e na ngbãngɔ le e ngɛ̃ ma.

⁹ Ti biani ko, e ndoda ndo bɛ e ya, afa ngbanga li e ya, aho e. E hũ ndo pɛnɔ ni so ya, ta e kpã bɛ e ndo e nvɛni ma, kanda ale e ndokpã bɛ e bo na ndo Nzapa mɛ ndoso azi na pɛ kwá.

¹⁰ Kwá alu ndo e sĩ nvɛni, ko Nzapa ndo la aso e na ya kwá ni, lo nga gbanda la lo ti so e na ya kwá. Biani, e ndolɛndɛre ya, lo ti lo so gbanda e.

¹¹ Ta sanga ma, ĩ nvɛni nga na zangɔ e na sambela mɛ ĩ na sambelangɔ na lo tɛ e. Na lo ni ko, Nzapa na mangɔ sambela mɛ azi gba na sambelangɔ na lo tɛ e, lo nga na lingɔ nzɔ̃ lo ni ko hɛ̃ e, ko azi gba na hɛ̃ngɔ lo sia kɔli na lo nzɔ̃ lo mɛ lo li hɛ̃ e.

Polo ahɛ̃ nyɔ lo ya ta ni na diringɔ ka Kɔrinto

¹² Ĩ ba ye mɛ e lengbi ti gondangɔ tɛrɛ e na lo ni lo mɛ: e hĩnga nzɔ̃ni ge ya bɛ e ya, na ya du tɛ e ge lɛ sese, mai bo du mɛ e du ka popo tɛ ĩ ko, du ni adu bɛtani, adu nga mbiri mbiri. Ko Nzapa la ali ya, du ni ko adu so. Wa ta du tɛ e adu so, na lo ti ndara tɛ azi ti lɛ sese ma, kanda adu na lo ti nzɔ̃ bɛ tɛ Nzapa.

^13-14 Ta sanga ma, na ya mbɛti mɛ ndo e su hɛ̃ ĩ ko, e su ndo bo atɛnɛ mɛ woni, atɛnɛ mɛ ĩ lengbi ti dingɔ ni, ko ĩ lengbi nga ti mangɔ nda ni. Ato ndo gã, asi na olo, atɛnɛ mɛ ndo e tɛnɛ hɛ̃ ĩ ko, ta ĩ ma ndo nda ni kwɛ ma. Ko mbi ndolɛndɛrɛ ya, ĩ na mangɔ nda ni na seni zu. Wa na ngoi mɛ gbanda Gbia Yezo aga ko, ĩ gonda gbanda tɛrɛ ĩ na lo tɛ e, nga ma se mɛ nga gbanda e gonda tɛrɛ e na lo tɛ ĩ.

^15-16 Mbi hĩnga alo ni ko zu nzɔ̃ni, ko na lo ni la mbi separa ndo ya, mbi ɔ ti ndo ĩ, wa mbi gwe ka sese ti Masedoanɛ. Na longɔ mbi kai diringɔ ko, mbi diri nga ti ndo ĩ, mbi ba ĩ. Adu nga ma mbi na zangɔ ĩ fani sɛ, ko ĩ lengbi nga ti zangɔ mbi na ye, ya mbi gwe na ni fɔnɔ tɛ mbi ka Yudea.

¹⁷ Ngoi mɛ se mbi hɛ̃ nyɔ mbi na lo ye mɛ mbi separa lingɔ ko, ta mbi ndohɛ̃ nyɔ mbi ni nga ma se tɛ azi ti lɛ sese ma. Na ndo tɛnɛ kɔi ko, ta mbi ndopa ya: “ĩi”, ko mbi ti mbi pa nga ya: “ipɔ” na ngoi kɔi ma.

¹⁸ Na ili Nzapa mɛ ndotɛnɛ tɛnɛ nyɔ lo kɔi ngoi zu ko, mbi pa ya, na ndo tɛnɛ kɔi mɛ ndo mbi ndopa hɛ̃ ĩ ko, ta mbi ndopa ya “ĩi”, ko mbi ti mbi pa ya “ipɔ” na ngoi kɔi ma.

¹⁹ Ta sanga ma, lo tɛ Yezo Kristo Nyi Nzapa ndo la mbi, na Silasi, nga na Timɔte e pa hɛ̃ ĩ. Na ndo tɛnɛ ko kɔi ko, ta Yezo ndopa ya “ĩi”, ko lo ti lo pa nga ya “ipɔ” na ngoi kɔi ma. Tɛnɛ tɛ lo ndodu bo ngoi zu “ĩi”.

²⁰ Na lo tɛ lo la Nzapa apa ya, ĩi, ni na lingɔ ye na se kapa zu mɛ ni ko hɛ̃ e. Na lo ni la e ndogonda Nzapa na ili Yezo Kristo ya: “Seni la.”

²¹ Ko Nzapa nvɛni la ndokpengba na e na ĩ, na lo mɛ ya, e na ĩ na Yezo Kristo e ti bo kɔi. Ko Nzapa nvɛni la asara e akpã ya, e du azi tɛ ni.

²² Lo nga la lo kpã Tɔrɔ Santo tɛ lo ge ya bɛ e, ya adu nga ma nzango so fangɔ ya, e azi tɛ ni, nga so fangɔ ya, ni na hɛ̃ngɔ e anzɔ̃ yɛ mɛ ni bata hɛ̃ e.

²³ Ko ta mbi diri ndo mbi nɔ ka Kɔrinto ma, na lo mɛ ya, ta mbi ye giangɔ bɛ ĩ ma. Nzapa la temwɛ tɛ mbi, ko se adu ya, mbi pa nvɛnɛ ko, mbi ye ya lo ho mbi.

²⁴ Ló mɛ ĩ ye lo ni ko, ta e ndogi ya, e gbɔ̃ ĩ gbɔ̃ngɔ, wa ĩ ye ló ni ma. Ta sanga ma, ĩ kpengba na ya lo yengɔ tɛ ĩ wɛ. Kanda e ye ya, e na ĩ e bombi, e li kwa ndoni kɔi, wadila ĩ lua dengɔ bɛ.