1 Yoanɛ 5 - Fana Ngbangɔ 1987

E ɔ aye ti lɛ sese na nguru

¹ Zo ko la aye lo tɛ Yezo ya, lo Mɛsia ko, zo ni ko lo nyi Nzapa. Se mɔ ye zo ko, ale mɔ ye nga nyi lo.

² Ĩ ba se mɛ e hĩnga ya, e ye na aya Nzapa lo mɛ: se e ye Nzapa, e tɔndɔ ndia mɛ lo lu hɛ̃ e ko, afa ya, e ye nga aya lo.

³ Ĩ ba se mɛ e lengbi ti yengɔ na Nzapa lo mɛ: ale e ndotɔndɔ ndia mɛ lo lu hɛ̃ e. Ta ndia ni adu kpengbani buai na lo tɛ e ma.

⁴ Ta sanga ma, aya Nzapa zu alengbi ti nwɔngɔ aye ti lɛ sese. E lengbi ti nwɔngɔ la nga sia? E lengbi ti nwɔngɔ la, na lo mɛ ya, e ye lo tɛ Yezo ya, lo Mɛsia.

⁵ Zo mɛ alengbi ti nwɔngɔ aye ti lɛ sese na? Adu bo zo ko aye lo tɛ Yezo ya, lo Nyi Nzapa.

Aye mɛ ndofa ya Yezo lo Nyi Nzapa

⁶ Yezo Kristo nvɛni aga ndo ge lɛ sese, lo mu ndo batisimɔ ti ngu, mɛnɛ tɛrɛ lo asa ndo na ngoi mɛ azi aho lo. Ngoi mɛ ndo lo ga ko, ta lo mu ndo bo batisimɔ ti ngu ma, kanda mɛnɛ tɛrɛ lo asa ndo nga na ngoi mɛ aho lo. Tɔrɔ tɛ Nzapa nvɛni ndofa nga na e ya, ye ko zu adu biani. Ta sanga ma, ta Tɔrɔ Santo ndopa nvɛnɛ bɛ gbɔ ma.

⁷ Ĩ ba aye ota mɛ ndofa ya, Yezo lo Nyi Nzapa lo mɛ:

⁸ Tɔrɔ tɛ Nzapa, na batisimɔ ti ngu, nga na mɛnɛ tɛrɛ lo mɛ asa, ko nyɔ aye ko zu ta ase bo kɔi.

⁹ Se azi apa hɛ̃ e tɛnɛ ti ye mɛ ala hũ ko, e ye tɛnɛ tɛ la. Ĩ hĩnga ya, tɛnɛ mɛ Nzapa ndotɛnɛ aɔ tɛnɛ mɛ azi ndotɛnɛ, ko Nzapa nvɛni ndo la atɛnɛ tɛnɛ na lo tɛ Nyi lo.

¹⁰ Zo ko la aye lo tɛ Nyi Nzapa ko, lo hĩnga ka bɛ lo ya, aye olo adu biani. Wa zo ko la akɛ̃ yengɔ tɛnɛ mɛ Nzapa ndotɛnɛ ko, lo ndomu Nzapa ka le lo ya, lo wa nvɛnɛ, na lo mɛ ya, ta lo ye tɛnɛ mɛ Nzapa atɛnɛ na lo tɛ Nyi lo ma.

¹¹ Ĩ ma tɛnɛ mɛ Nzapa atɛnɛ lo mɛ: lo pa ya, ni hɛ̃ e ndo du ti kaka, ko e lua du ti kaka ni so Nyi ni.

¹² Zo ko ndodu ndoni kɔi na Nyi Nzapa ko, lo lua du ti kaka we. Wa zo ko ta ndodu ndoni kɔi na Nyi Nzapa ma ko, ta lo lua du ti kaka ma.

Du ti kaka

¹³ Mbi su mbɛti olo hɛ̃ ĩ azi mɛ ĩ ye lo tɛ Nyi Nzapa, ya ĩ hĩnga ya, ĩ pia ĩ lua du ti kaka wɛ.

¹⁴ Ĩ ba bɛ mɛ e ndokpã ndo Nzapa lo mɛ: e hĩnga ya, se e yɔ ye mɛ be lo aye ko, lo na mangɔ e.

¹⁵ Nga ma se ko la e hĩnga ya, lo ndoma sambela tɛ e ko, e hĩnga nga ya, e lua ye mɛ e yɔ ka ti lo.

¹⁶ Se zo ahũ nyita lo wa Kristo na lingɔ siɔ ye, wa se ta adu siɔ ye ti hongɔ tɔrɔ tɛrɛ zo ma ko, ale lo vɔrɔ Nzapa na lo tɛ nyita lo ni, wadila Nzapa aso tɔrɔ tɛrɛ nyita lo ni. Tɛnɛ mɛ mbi tɛnɛ adu bo na lo tɛ azi mɛ ndoli siɔ ye, kanda ta siɔ ye ni adu siɔ ye mɛ alengbi ti hongɔ tɔrɔ tɛrɛ la ma. Mbanga siɔ ye kɔi da, ko se zo ali ni ko, aho tɔrɔ tɛrɛ lo. Ko ta mbi tɛnɛ hɛ̃ ĩ ya, ĩ vɔrɔ Nzapa na lo tɛ azi ko ndoli gi tɛrɛ siɔ ye ni ko ma.

¹⁷ Ye zu ko la akɛ̃ nyɔ Nzapa ko, adu siɔ ye. Kanda mbanga siɔ ye kɔi mɛ ndɛ̃ nga da, ko se zo ali ni ko, ta alengbi ti hongɔ tɔrɔ tɛrɛ lo ma.

¹⁸ E hĩnga ya, zo ko la lo nyi Nzapa ko, ta lo ndobaba lingɔ siɔ ye ma. Ta sanga ma, Yezo Nyi Nzapa ndobata lo, ko ta Satana alengbi ti lingɔ lo siɔni ma.

¹⁹ E hĩnga ya, e aya Nzapa, ko e hĩnga nga ya, Satana lo gbia ti lɛ sese kwɛ zu.

²⁰ E hĩnga ya, Yezo Nyi Nzapa aga ndo ge lɛ sese, aha e na ndara ya, e hĩnga bɛta Nzapa. Na lo tɛ Yezo Kristo la, e ndodu ndoni kɔi na bɛta Nzapa. Lo la bɛta Nzapa mɛ ahɛ̃ e du ti kaka.

²¹ Aya mbi, ta ĩ ye lo tɛ angbilondo bɛ gbɔ ma o!