1 Yoanɛ 4 - Fana Ngbangɔ 1987

Tɔrɔ tɛ Nzapa na tɔrɔ tɛ Wa kɛ̃ngɔ Yezo

¹ Aya bua, awa nvɛnɛ mɛ ndonɛ ya, ani awa pangɔ nyɔ Nzapa, asu kpaya kpaya ge lɛ sese. Na lo ni ko, ta ĩ ye lo tɛ azi ko ndomu tɛrɛ la ya, ani na Tɔrɔ mɛ alo ka tɛ Nzapa ma. Ĩ tara bɛ la uzu, so hĩngangɔ biani ya, ala na Tɔrɔ mɛ alo ka tɛ Nzapa.

² Ĩ ba se mɛ ĩ lengbi ti hĩngangɔ ya, tɔrɔ mɛ ala na ni adu Tɔrɔ tɛ Nzapa lo mɛ: se zo atɛnɛ na nyɔ lo ya, Yezo Kristo amu ndo tɛre zo biani, la lo ga ge lɛ sese ko, zo mɛ na Tɔrɔ mɛ alo ka tɛ Nzapa la.

³ Kanda se zo akɛ̃ ya, ta Yezo Kristo amu ndo tɛrɛ zo ma ko, ta zo ni ko na Tɔrɔ mɛ alo ka tɛ Nzapa ma. Tɔrɔ mɛ lo na ni adu tɔrɔ tɛ Wa kɛ̃ngɔ Yezo Kristo. Ĩ ma ndo ya, Wa kɛ̃ngɔ Yezo na gangɔ. Na olo ko, lo ga ge lɛ sese we.

⁴ Aya mbi, ĩ azi tɛ Nzapa, ko ĩ nwɔ ndo awa nvɛnɛ ni ko, ta sanga ma, Tɔrɔ Santo mɛ ĩ na ni aɔ tɔrɔ mɛ na ya tɛrɛ azi ti lɛ sese na nguru.

⁵ Awa nvɛnɛ ni ko adu azi ti lɛ sese, ko tɛnɛ tɛ la adu tɛnɛ tɛ azi ti lɛ sese, nda mɛ azi ti lɛ sese ndoma la la.

⁶ Kanda e du tɛ e azi tɛ Nzapa. Zo ko ahĩnga Nzapa ko, zo mɛ alengbi ti mangɔ e la, kanda zo ko ta ahĩnga Nzapa ma ko, ta lo lengbi ti mangɔ e ma. Ĩ ba se mɛ e lengbi ti hĩngangɔ na zo mɛ na bɛta Tɔrɔ tɛ Nzapa, nga na zo mɛ na tɔrɔ ti nvɛnɛ la.

Bɛ Nzapa ndoye azi

⁷ Aya bua, ale e ndoyengbi, ta sanga ma, lo yengbingɔ alo ka tɛ Nzapa. Zo ko bɛ lo aye ayata lo awa Kristo ko, lo nyi Nzapa, lo hĩnga nga Nzapa.

⁸ Se ta bɛ zo aye ayata lo awa Kristo ma ko, afa ya, ta lo hĩnga nga Nzapa ma. Ta sanga ma, e hĩnga ya, bɛ Nzapa ndoye azi.

⁹ Ĩ ba se mɛ Nzapa ndofa ya, ni ye e lo mɛ: lo to ndo ngbongi Nyi lo ge lɛ sese ya, e lua bɛta du so Nyi lo.

¹⁰ Ko lo yengɔ ni adu nga so mɛ: Nzapa aye e kɔzoni, la lo to Nyi lo ya, lo ga, lo tiɔ sende ti siɔ ye tɛ e, wadila ni Nzapa ni ka lɛ ni ndo asiɔ ye tɛ e. Kanda ta e ndo la e ye Nzapa kɔzoni ma.

¹¹ Aya bua, nga ma la Nzapa aye e nga so ko, ale e ndoyengbi nga

¹² Ta zo kɔi ade ahũ Nzapa ma. Se e yengbi ko, Nzapa adu ndoni kɔi na e, ko afa ya, e ye lo na bɛ e kɔi.

¹³ Ĩ ba se mɛ e lengbi ti hĩngangɔ ya, e ndodu ndoni kɔi na Nzapa, ko lo ndodu nga ndoni kɔi na e lo mɛ: lo hɛ̃ ndo e Tɔrɔ Santo tɛ lo.

¹⁴ E nvɛni, e hũ ndo na lɛ e ya, To e Nzapa ato ndo Nyi lo ya, lo du Wa songɔ azi ti lɛ sese, ko adu lo ni la e ndopa hɛ̃ azi.

¹⁵ Zo ko apa na gbɛlɛ azi ya, Yezo lo Nyi Nzapa ko, Nzapa adu ndoni kɔi na lo, ko lo nvɛni lo du nga ndoni kɔi na Nzapa.

¹⁶ E la e hĩnga ya Nzapa ndoye e, ko e ye nga ló ni. Nzapa ndoye azi. Zo ko la ndoye ayata lo awa Kristo ko, afa ya, lo ndodu ndoni kɔi na Nzapa, ko Nzapa ndodu nga ndoni kɔi na lo.

¹⁷ Ĩ ba se mɛ e hĩnga ya, e ye Nzapa na bɛ e kɔi lo mɛ: lá ko gbanda Nzapa afa na ngbanga tɛ azi ko, ta e du gbanda na mbɛtɔ ma. Ta sanga ma, du tɛ e ge lɛ sese adu nga ma du tɛ Yezo.

¹⁸ Se Nzapa aye zo ko, ta zo ni adu na mbɛtɔ ma. Zo ko ahĩnga ya, Nzapa aye ni biani ko, ta lo lengbi ti dungɔ na mbɛtɔ ma. Zo ko na mbɛtɔ ko, adu nga ma lo lua etumbu we.

¹⁹ Tɛ e ko, Nzapa aye ndo e kɔzoni, nda mɛ e ye lo, ko e ye nga ayata e awa Kristo la.

²⁰ Se zo anɛ ya: “Mbi ye Nzapa”, wa se bɛ lo ti kɛ̃ nyita lo wa Kristo ko, afa ya, lo wa nvɛnɛ. Ta zo kɔi ade ahũ Nzapa na lɛ lo bɛ fani kɔi ma, kanda lo ndohũ bo ayata lo awa Kristo. Se ta zo aye ayata lo awa Kristo mɛ lo ndohũ la ma ko, lo na yengɔ Nzapa mɛ ta lo dɛ lo hũ lo ma nga sia?

²¹ Ĩ ba ndia mɛ Yezo Kristo alu hɛ̃ e lo mɛ: zo ko la aye Nzapa ko, ale lo ye nga ayata lo awa Kristo.