1 Yoanɛ 3 - Fana Ngbangɔ 1987

E aya Nzapa

¹ Ĩ da bɛ ĩ na se mɛ To e Nzapa aye na e! Lo ye e sĩ, ko lo ndoili e ya, e aya ni, ko biani, e aya lo. Ta azi ti lɛ sese ndohĩnga ya, e aya Nzapa ma, na lo mɛ ya, ta ala hĩnga lo ma.

² Aya bua, na olo ko, e aya Nzapa. Wa ta e hĩnga se mɛ gbanda e du na ni ma. Bo ye mɛ e hĩnga la, na ngoi mɛ gbanda Kristo adiri aga ko, e ti gbanda nga ma lo, ta sanga ma, e hũ gbanda lo na se tɛrɛ lo.

³ Zo ko ndolɛndɛrɛ Kristo nga so ko, lo ndobata tɛrɛ lo ya, ni du bɛta zo, nga ma se ko Yezo nga bɛta zo.

⁴ Zo ko ndoli siɔ ye ko, zo mɛ akɛ̃ nga tɔndɔngɔ ndia tɛ Nzapa la. Ta sanga ma, lingɔ siɔ ye adu kɛ̃ngɔ tɔndɔngɔ ndia tɛ Nzapa.

⁵ Ko ĩ hĩnga ya, Yezo Kristo aga ndo ge lɛ sese ya, ni hã siɔ ye tɛ azi ni zi. Ta Yezo ali ndo siɔ ye bɛ yakere ma.

⁶ Na lo ni ko, zo ko ndodu ndoni kɔi na Yezo ko, ta lo ndoli siɔ ye ma. Zo ko ndobaba lingɔ siɔ ye ko, ta lo de lo hũ Yezo, bere lo hĩnga nga lo ma.

⁷ Aya mbi, ta azi ahanda ĩ, ko ĩ ye ma. Zo ko la ndoli bɛta ye ko, lo nvɛni nga bɛta zo, nga ma se ko Yezo Kristo nga bɛta zo.

⁸ Kanda zo ko la ta ndozia lingɔ siɔ ye ma ko, lo zo tɛ Satana. Ta sanga ma, Satana ato nda lingɔ siɔ ye ka ndo la Nzapa ali na sese. Na lo ni la Nyi Nzapa aga ge lɛ sese ya, ni gbɛ̃ kwa mɛ Satana ali.

⁹ Zo ko la nyi Nzapa ko, ta lo ndoli siɔ ye ma, ta sanga ma, Tɔrɔ Santo mɛ Nzapa ahɛ̃ lo ndodu na ya tɛrɛ lo. Ta lo lengbi ti babangɔ lingɔ siɔ ye ma, ta sanga ma, To lo la Nzapa.

¹⁰ Ĩ ba se mɛ andohĩnga na aya Nzapa, na aya Satana lo mɛ: zo ko la ta ndoli ye na seni, bere ndoye ayata lo awa Kristo ma ko, ta lo nyi Nzapa ma.

Lo yengbingɔ

¹¹ Tɛnɛ mɛ ndo ĩ ma kɔzoni ndopa ya: é yengbi.

¹² Ale ta e du nga ma Kaina ma. Kaina ndo zo tɛ Satana, lo ho ndo nyita lo nvɛni. Nda mɛ ndo Kaina aho nyita lo nɛ? Kaina aho ndo nyita lo, na lo mɛ ya, kwa mɛ ndo Kaina ndoli adu siɔni, ko kwa tɛ nyita lo Abɛlɛ ndo nzɔ̃ni.

¹³ Aya bua, se bɛ azi ti lɛ sese olo akɛ̃ ĩ ko, ta ĩ bema ma.

¹⁴ Na olo ko, e hĩnga ya, e lo ka ya kwá e si, ko tɔrɔ tɛrɛ e aso wɛ. E hĩnga ni, na lo mɛ ya, bɛ e ndoye ayata e awa Kristo. Zo ko ta bɛ lo ndoye ayata lo awa Kristo ma ko, lo de na ya kwá.

¹⁵ Zo ko be lo akɛ̃ nyita lo wa Kristo ko, lo nga ma wa hongɔ azi. Ko ĩ hĩnga ya, ta wa hongɔ azi ndolua du ti kaka ma.

¹⁶ Yezo Kristo afa e na se mɛ e lengbi ti yengbingɔ na ni. Lo ga ndo, lo kpi so e. Nda mɛ ale e ye nga ya, e ka tɛrɛ e na lo tɛ ayata e awa Kristo la.

¹⁷ Se wa nwa ahũ nyita lo wa Kristo na gwɛ̃ ti ye, ko lo kɛ̃ zangɔ lo ko, afa ya, ta lo ye Nzapa ma.

¹⁸ Aya mbi, ale ta e ndoye ayata e awa Kristo bo na pɔrɔ nyɔ e kɔi ma. Ale e ndoye nga la na bɛ e kɔi, ko e li ye mɛ afa ya, e ndoye la.

E du na bɛ pii ka gbɛlɛ Nzapa

¹⁹ Se e yengbi ko, e hĩnga ya, e aya bɛta Nzapa, ko ta bɛ e atitiri ka gbɛlɛ lo ma.

²⁰ Wa bɛ se e hĩnga ka ya bɛ e ya, e li ndo siɔ ye ko, ta bɛ e atitiri ka gbɛlɛ Nzapa ma. Ta sanga ma, Nzapa ahĩnga ye aɔ ndo dangɔ bɛ tɛ e, ko lo hĩnga ye zu.

²¹ Aya bua, se e hĩnga ka ya bɛ e ya, ta e li siɔ ye ma ko, e du bo na bɛ pii ka gbɛlɛ Nzapa.

²² Ye zu mɛ e ndoyɔ ka ti lo ko, e ndolua ni, na lo mɛ ya, e ndotɔndɔ ndia tɛ lo, ko e ndoli nga ye mɛ bɛ lo ndode na lo ni.

²³ Ĩ ba ndia mɛ lo lu hɛ̃ e lo mɛ: ale e ye lo tɛ Nyi lo Yezo Kristo, ko e yengbi nga ma se mɛ ndo Kristo apa na ni hɛ̃ e.

²⁴ Zo ko la ndotɔndɔ ndia tɛ Nzapa ko, zo mɛ ndodu ndoni kɔi na Nzapa la, ko Nzapa ndodu nga ndoni kɔi na lo. E hĩnga ya, e na Nzapa e ndodu ndoni kɔi, na lo tɛ Tɔrɔ Santo mɛ lo hɛ̃ e.