1 Yoanɛ 2 - Fana Ngbangɔ 1987

Yezo Kristo aga so zangɔ e

¹ Aya mbi, mbi su mbɛti olo hɛ̃ ĩ ya, ta ĩ li siɔ ye ma. Wa se zo ali siɔ ye ko, ale e hĩnga ya, wa lɛngɔ kongba tɛ e ka gbɛlɛ To e Nzapa da. Ili lo la Yezo Kristo, lo bɛta zo.

² Ta sanga ma, Yezo Kristo ndo la akpi so tiɔngɔ sende ti siɔ ye tɛ e, wa se mɛ Nzapa aka le lo ndo ni la. Ta Nzapa na kangɔ le lo bo na ndo siɔ ye tɛ e kɔi ma, lo nga na kangɔ le lo na ndo siɔ ye tɛ azi ti lɛ sese zu.

³ Se e tɔndɔ ndia mɛ Nzapa alu hɛ̃ e ko, e na hũngɔ ya, e hĩnga Nzapa biani.

⁴ Se zo anɛ ya, ni hĩnga Nzapa, wa se ta lo tɔndɔ ndia mɛ Nzapa alu ma ko, lo wa nvɛnɛ, ko ta lo hĩnga bɛta lo tɛ Nzapa ma.

⁵ Kanda zo ko la ndotɔndɔ ndia tɛ Nzapa ko, zo mɛ aye Nzapa na bɛ lo kɔi la. Ĩ ba se mɛ e lengbi ti hĩngangɔ ya, e na Nzapa e ti bo kɔi lo mɛ:

⁶ zo ko ndonɛ ya, ni ndodu ndoni kɔi na Nzapa ko, ale du tɛ lo adu nga ma du tɛ Yezo Kristo.

Fana ndia

⁷ Aya bua, ndia mɛ mbi su mbi to hɛ̃ ĩ ko, ta adu fana ndia ma. Bo ngbina ndia mɛ ndo alu hɛ̃ ĩ na ngoi mɛ ndo ĩ ma na Nzɔ̃ Pa tɛ Yezo kɔzoni la. Ngbina ndia ni adu tɛnɛ mɛ ndo ĩ ma gã.

⁸ Abɛ nga so ko, adu nga ma fana ndia la mbi su mbi to hɛ̃ ĩ. Du tɛ Yezo na popo tɛ azi afa ndo ya, ndia ni adu bɛta ndia, ko du tɛ ĩ ndofa nga so. Bɛta Wa vurungɔ na ndo aga we, ko mbingo ndowɛ.

⁹ Zo ko anɛ ya, ni ndodɔ nɔ na ya vuru ndo, ko bɛ lo ti kɛ̃ nyita lo wa Kristo ko, zo ni ko ade na ya mbingo.

¹⁰ Zo ko bɛ lo aye nyita lo wa Kristo ko, zo mɛ ndodɔ nɔ na ya vuru ndo la. Na lo ni ko, ta zo mɛ ndɛ̃ alengbi ti hũngɔ sé du tɛ wa dɔngɔ nɔ na ya vuru ndo, ko zo ni ko anɔ ali siɔ ye ma.

¹¹ Wa zo ko la bɛ lo akɛ̃ nyita lo wa Kristo ko, zo ni ko ade na ya mbingo, lo ndodɔ nɔ na ya mbingo, ko ta lo hĩnga nga ndo mɛ lo ndogwe da ma. Ta sanga ma, mbingo avu lɛ lo, lo ti wa ziba.

¹² Aya mbi, mbi su mbɛti olo hɛ̃ ĩ, na lo mɛ ya, Nzapa aka lɛ lo ndo siɔ ye tɛ ĩ na lo tɛ Yezo Kristo.

¹³ Mbi su mbɛti olo hɛ̃ ĩ ato mbi, na lo mɛ ya, ĩ hĩnga Zo mɛ ndo dazu gã, na ngoi mɛ ndo ta Nzapa ade ali sese ma. Mbi su mbeti olo hɛ̃ ĩ apandara, na lo mɛ ya, ĩ nwɔ ndo nga Satana.

¹⁴ Aya mbi, mbi su mbɛti olo hɛ̃ ĩ, na lo mɛ ya, ĩ hĩnga To e Nzapa. Mbi su mbɛti olo hɛ̃ ĩ ato mbi, na lo mɛ ya, ĩ hĩnga Zo mɛ ndo dazu gã, na ngoi mɛ ndo ta Nzapa ade ali sese ma. Mbi su mbɛti olo hɛ̃ ĩ apandara, na lo mɛ ya, bɛ ĩ ade kpengbani, ĩ ndobata tɛnɛ tɛ Nzapa ka bɛ ĩ, ko ĩ nwɔ ndo nga Satana.

Ta ĩ ye aye ti lɛ sese ma

¹⁵ Ta ĩ kpã bɛ ĩ na ndo du tɛ azi ti lɛ sese ma, ta ĩ ye aye ti lɛ sese ma. Zo ko ndoye aye ti lɛ sese ko, afa ya, ta lo ye To e Nzapa ma.

¹⁶ Ĩ ba aye ti lɛ sese lo mɛ: asiɔ ye mɛ tɛrɛ zo ndodu na gwɛ̃ ti lingɔ ni, aye mɛ se zo ahũ ko, lo du na gwɛ̃ ti luangɔ ni, aye ti lɛ sese mɛ zo alua, ko lo ndoyakɛ tɛrɛ lo na lo ni. Aye ko kwe zu adu aye ti lɛ sese. Ta adu aye mɛ alo ka tɛ To e Nzapa ma.

¹⁷ Sese olo na wɛngɔ, ko aye ti lɛ sese zu mɛ azi ndodu na gwɛ̃ ni nga na wɛngɔ. Kanda zo ko ali ye mɛ bɛ Nzapa aye ko, lo lua du ti kaka.

Wa kɛ̃ngɔ Yezo

¹⁸ Aya mbi, angbã yakere sese olo awe. Ĩ ma ndo ya, Wa kɛ̃ngɔ Yezo Kristo na gangɔ. Na olo ko, azi ma wo ma mɛ awa kɛ̃ngɔ Yezo asi wɛ. Ko gangɔ tɛ la ndofa ya, sese adoli ti wɛngɔ.

¹⁹ Ndo uzu ko, e na la e ndodu ndoni kɔi, kanda ta ala ndo azi tɛ e nvɛni ma. Nda mɛ ala lo ge popo tɛ e asi la. Se adu ya, ala ndo azi tɛ e nvɛni ko, ale ta ala lo ndo ge popo tɛ e asi ma. Ala lo ge popo tɛ e asi, so fangɔ ya, ta ala zu adu ndo azi tɛ e nvɛni ma.

²⁰ Wa tɛ ĩ ko, ĩ lua ndo Tɔrɔ Santo mɛ Kristo ahɛ̃ ĩ, ko na lo ni la ĩ zu ĩ hĩnga bɛta lo tɛ Nzapa.

²¹ Ta mbi su mbɛti olo hɛ̃ ĩ, na lo mɛ ya, ĩ yu bɛta lo ni ma. Kanda mbi su ni hɛ̃ ĩ, na lo mɛ ya, ĩ hĩnga ni. Ko ĩ hĩnga nga ya, ta bɛta lo tɛ Nzapa na nvɛnɛ ndodu ndoni kɔi ma.

²² Wa nvɛnɛ la na? Wa nvɛnɛ la zo ko ndopa ya, ta Yezo lo Mɛsia ma. Zo ko apa so ko, Wa kɛ̃ngɔ Yezo la. Ko afa ya, lo bombi To e Nzapa na Nyi lo Yezo, lo kɛ̃ la zu.

²³ Zo ko akɛ̃ Nyi Nzapa ko, afa ya, lo kɛ̃ nga To lo. Se zo apa na gbɛlɛ azi ya, Yezo lo Nyi Nzapa ko, zo mɛ na Nzapa To Yezo ndodu ndoni kɔi la.

²⁴ Nda mɛ ale ĩ bata tɛnɛ mɛ ndo ĩ ma kɔzoni ka bɛ ĩ la. Se ĩ bata tɛnɛ mɛ ndo ĩ ma kɔzoni ka bɛ ĩ ko, ĩ na ngbãngɔ ndoni kɔi na Nyi Nzapa nga na To lo.

²⁵ Ĩ ba ye mɛ Yezo Kristo ako kapa ni hɛ̃ e ya, ni na hɛ̃ngɔ e la du ti kaka.

²⁶ Mbi su mbɛti olo hɛ̃ ĩ na lo tɛ azi ko ndogi kɔdɛ ti handangɔ ĩ.

²⁷ Tɛ ĩ ko, ĩ lua ndo Tɔrɔ Santo mɛ Kristo ahɛ̃ ĩ. Nga ma la Tɔrɔ Santo adɛ na ya tɛrɛ ĩ ko, ta ĩ du na gwɛ̃ tɛ mbanga zo mɛ ndɛ̃ ya, lo ha ĩ na ye mɛ ndɛ̃ ma. Ta sanga ma, Tɔrɔ Santo aha ĩ na ye kwɛ zu, ko ye mɛ lo ha na ĩ adu bɛta ye. Ta nvɛnɛ na ya tɛnɛ ni ma. Nda mɛ ale ĩ ngbã ndoni kɔi na Yezo Kristo, nga ma se ko Tɔrɔ Santo ndoha na ĩ la.

²⁸ Biani, aya mbi, ale ĩ ngbã ndoni kɔi na Kristo, ko lá ko gbanda lo diri lo ga ko, ta bɛ e atitiri ma, ta kamɛne agbɔ̃ nga e na ĩ na gbɛlɛ lo ma.

²⁹ Ĩ hĩnga ya, Yezo Kristo lo bɛta zo. Na lo ni ko, ale ĩ hĩnga nga ya, zo ko ndoli bɛta ye ko, lo nyi Nzapa.