1 Yoanɛ 1 - Fana Ngbangɔ 1987

Yezo Kristo lo Tɛnɛ tɛ Nzapa

¹ E su mbɛti olo hɛ̃ ĩ na lo ti Tɛnɛ mɛ ndohɛ̃ azi bɛta du. Tɛnɛ ni ndo dazu gã, na ngoi mɛ ndo ta Nzapa ade ali sese ma. E ma ndo lo na ma e, e hũ ndo lo na lɛ e nvɛni, e ba ndo lo, ko e bɔrɔ ndo nga tɛrɛ lo na ti e.

² Ngoi mɛ Tɛnɛ ni ĩ ga ĩ si na popo tɛ azi ko, e hũ lo. Nda mɛ e ndopa lo tɛ lo hɛ̃ ĩ, ko e ndotɛnɛ nga hɛ̃ ĩ ya, lo du ti kaka, lo na To e Nzapa ndodu ndoni kɔi ka yayu, so pɛni, Nzapa ato lo hɛ̃ e ya, e hũ lo la.

³ Ye mɛ ndo e hũ na lɛ e, e ma nga na ma e, la e ndopa nga lo ni hɛ̃ ĩ ya, ĩ ma. E pa ni hɛ̃ ĩ ya ĩ ma, wa dangɔ bɛ tɛ ĩ na tɛ e ati bo kɔi, nga ma se mɛ dangɔ bɛ tɛ e na tɛ To e Nzapa, nga na tɛ Nyi lo Yezo Kristo ati bo kɔi.

⁴ E su mbɛti olo hɛ̃ ĩ ya, bɛ e na ĩ ade zɔgɔrɔ.

Nzapa lo wa vurungɔ na ndo

⁵ Ĩ ma tɛnɛ mɛ ndo e ma na nyɔ Yezo Kristo, la e separa pangɔ hɛ̃ ĩ lo mɛ: Nzapa lo wa vurungɔ na ndo, ko ta mbingo yakere ndodu na ndo mɛ lo da ma.

⁶ Se e pa ya, dangɔ bɛ tɛ e na tɛ Nzapa ati bo kɔi, wa se e ti sana, e dɔ nɔ na ya mbingo ko, afa ya, e du awa nvɛnɛ na ya tɛnɛ tɛ e, nga na ya kwa tɛ e.

⁷ Kanda se e dɔ nɔ na ya vuru ndo, nga ma se mɛ Nzapa nvɛni ndodu na ya vuru ndo, wadila dangɔ bɛ tɛ e na tɛ afɔ̃ e awa Kristo ati bo kɔi, ko mɛnɛ tɛrɛ Nyi lo Yezo akpo siɔ ye tɛ e zu.

⁸ Se e pa ya, ta e awa lingɔ siɔ ye ma ko, afa ya, e ndohanda tɛrɛ e nvɛni, ko ta e hĩnga bɛta lo tɛ Nzapa ma.

⁹ Kanda asiɔ ye mɛ e li, se e pa ni na gbɛlɛ Nzapa ko, lo ka lɛ lo na ndo asiɔ ye tɛ e, lo hã ni zu, ko bɛ e ati vuruni. Ta sanga ma, lo ndoli ye na seni, ko ta lo ndoweza kapa tɛ lo ma.

¹⁰ Se e pa ya, ta e li siɔ ye ma ko, afa ya, e ndomu Nzapa ka lɛ e ya lo wa nvɛnɛ, ko ta e hĩnga nga tɛnɛ tɛ lo ma.