1 Petro 5 - Fana Ngbangɔ 1987

Ale akangba ti Eklezia ndobata azi tɛ Nzapa nzɔ̃ni

¹ Na olo mɛ ko, mbi na tɛnɛ ti tɛngɔ hɛ̃ akangba ti Eklezia mɛ so popo tɛ ĩ. Mbi nga kangba ti Eklezia. Ngoi mɛ ndo andohɛ̃ Yezo Kristo pɛnɔ ko, mbi hũ ndo na lɛ mbi. Ko mbi lua nga gbanda ndima mɛ Nzapa na fangɔ na azi. Ĩ ma tɛnɛ mɛ mbi separa wangɔ na akangba ti Eklezia lo mɛ:

² azi tɛ Nzapa mɛ Nzapa azia la na yamba ti ĩ ko, ĩ́ bata la nzɔ̃ni, nga ma se mɛ wa batangɔ angasã ngbaga ndobata na angasã ngbaga tɛ lo. Ale ĩ bata la na nzɔ̃ bɛ nga ma se mɛ Nzapa aye, ta ĩ bata la na siɔ bɛ ma. Ta ĩ́ li kwa tɛ Nzapa so gwɛ̃ luangɔ faranga ma, kanda ale ĩ hɛ̃ tɛrɛ ĩ zu na ya kwa ni.

³ Azi tɛ Nzapa mɛ lo zia la na ti ĩ ya, ĩ bata la ko, ta ĩ lɛ gbia ndo la na nguru ma. Kanda ale ĩ fa la na nzɔ̃ lɛ lo, wadila ala mu nzɔ̃ se li ye tɛ ĩ.

⁴ Wa na lá ko gbanda Gbia tɛ awa batangɔ angasã ngbaga asi ko, lo hɛ̃ ĩ mbana gɛrɛ ti ndima mɛ ta dɛ̃ngɔ ni ndowɛ ma.

⁵ Ĩ aya kɔli, ale ĩ ndobi tɛrɛ ĩ hɛ̃ akangba. Ale ĩ zũ, ĩ ngara tɛrɛ ĩ hɛ̃ afɔ̃ ĩ, ya ĩ zangbi. Ta sanga ma, asu ka ya Buku tɛ Nzapa ya: “Nzapa ndokɛ̃ awa yakɛ, ko lo ndoli nzɔ̃ bɛ hɛ̃ azi mɛ ndobi tɛrɛ la.”

⁶ Wa ĩ́ bi tɛrɛ ĩ ya, ĩ du na gbɛ ti Nzapa mɛ wa nguru, wadila lo ya ĩ ndozu na ngoi mɛ lo ye.

⁷ Alo zu mɛ bɛ ĩ ndosɔ na lo ni ko, ĩ́ zia ni ka ti lo, ta sanga ma, lo ndobata ĩ.

⁸ Ale ĩ du na kpengba lɛ, ĩ bata li ĩ nzɔ̃ni, ta sanga ma, Satana mɛ wa kɛ̃ngɔ ĩ ndongongoro nga ma se mɛ zɛ̃ ndongongoro na ni, ndongburuka so gingɔ zo ya ni tɛ.

⁹ Ale ĩ ndongbã bo na yengɔ lo tɛ Yezo, ĩ kɛ̃ ló hɛ̃ Satana, ta sanga ma, ĩ hĩnga ya, ayata ĩ awa Kristo mɛ amu le sese zu ko, ala ndohũ nga gi tɛrɛ apɛnɔ mɛ ĩ ndohũ.

¹⁰ Ĩ ndohũ pɛnɔ, kanda na pɛ ngoi yakere ko, Nzapa mɛ ndoli kota nzɔ̃ bɛ hɛ̃ e, lo nvɛni na lɛkɛngɔ ĩ, kpengbangɔ na bɛ ĩ, hɛ̃ngɔ ĩ nguru. Lo la lo ili ĩ ya, ĩ lua ndima ti kaka ka tɛ ni, na lo mɛ ya, ĩ na Kristo ĩ ti bo kɔi.

¹¹ Nzapa alɛ bɛ gbia buru na buru ma ke! Seni la.

Ndangba balangɔ

¹² Nyi mbɛti olo mbi to hɛ̃ ĩ ko, Silasi la asu ni. Mbi ndomu lo ya, lo bɛta nyita e wa Kristo. Mbi to mbɛti olo hɛ̃ ĩ ya, mbi sa nguru bɛ ĩ, ko mbi fa nga na ĩ ya, bɛta nzɔ̃ bɛ tɛ Nzapa adu nga ma se mɛ mbi ndopa na ni hɛ̃ ĩ. Wa ta ĩ diri gesi na ya ni ma.

¹³ Azi ti Eklezia ti Babilɔnɛ abala ĩ. Nzapa asara la akpã ya, ala ti azi tɛ ni, nga ma se mɛ ndo lo sara nga na ĩ lo kpã ya, ĩ ti azi tɛ ni. Nyi mbi Marko abala nga ĩ.

¹⁴ Ĩ balangbi tɛrɛ ĩ nzɔ̃ni na se tɛ awa Kristo. Nzapa ali bɛ ya, bɛ ĩ awa Kristo zu adu pii ma ke!