1 Petro 4 - Fana Ngbangɔ 1987

Ngbina se li ye na fana se li ye

¹ Yezo Kristo ahũ ndo pɛnɔ na ngbonga tɛrɛ lo, na lo ni ko, ĩ mu nga se dangɔ bɛ tɛ lo, ko ĩ́ gbe nga bɛ ĩ. Ta sanga ma, zo ko ahũ pɛnɔ na ngbonga tɛrɛ lo ko, tɛ lo na lingɔ siɔ ye awe.

² Ato na lá olo mɛ, nga na tanga bi tɛ ĩ mɛ adɛ ka gbɛlɛ ĩ ko, ale ĩ du du nga ma se mɛ bɛ Nzapa aye. Ta ĩ li ye na se gwɛ̃ ti tɛrɛ ĩ ma.

³ Ta sanga ma, ndo uzu ko, ĩ mu ndo ngoi yɔngɔrɔni so lingɔ ye, nga ma se mɛ apaganɔ ndoye lingɔ. Ĩ ndo awa lingɔ siɔ ye ti kamɛnɛ, ĩ ndodu ndo na gwɛ̃ ti lingɔ asiɔ ye, ĩ ndonyɔ ndo kana agbɔ̃nɔ ĩ, ĩ na afɔ̃ ĩ, ĩ ndotɛ ndo, ĩ ndonyɔ ndo kana aɔ nyɔ kpɔ̃ ni, ĩ ndovɔrɔ ndo nga angbilondo mɛ adu siɔni buai.

⁴ Asiɔ ye ko ma wo ma ko, ĩ na apaganɔ ĩ ndoli ndo ni. Ko ngoi mɛ ala ĩ hũ ya, ta ĩ na la, ĩ ti ndobombi so lingɔ ni ma ko, ala ndobema, ala ndoguru nga ĩ.

⁵ Kanda na mbanga lá kɔi gbanda ko, ala longa gbanda gbɛlɛ Nzapa so kambisangɔ aye mɛ ndo ala li. Angbã yakere, Nzapa afa ngbanga tɛ azi mɛ lɛ la ngɛ̃, nga na tɛ awa kwáni.

⁶ Na lo ni ndo la Yezo Kristo apa nga Nzɔ̃ Pa hɛ̃ awa kwáni. Na ngoi mɛ ndo ala de lɛ la ngɛ̃ ko, Nzapa afa ndo ngbanga tɛ la, nga ma se mɛ lo ndofa nga na ngbanga tɛ azi zu. Yezo Kristo apa ndo Nzɔ̃ Pa ni hɛ̃ la ya, na lo nguru tɛ Tɔrɔ Santo ko, ala du lɛ la ngɛ̃ nga ma se mɛ Nzapa ndodu lɛ lo ngɛ̃.

Nzapa ahɛ̃ zo kɔi kɔi nguru kwa

⁷ Angbã yakere, nda aye zu akɔ. Na lo ni ko, í du na kɔdɛ, ĩ́ du na kpengba lɛ, wadila ĩ sambela Nzapa na seni.

⁸ Ye mɛ aɔ aye zu la, ale ĩ yengbi sĩ nvɛni, ta sanga ma, se ĩ yengbi, wadila ĩ ka lɛ ĩ ndo asiɔ ye ma wo ma mɛ afɔ̃ ĩ ndoli tɛrɛ ĩ.

⁹ Ale ĩ ndoyamba azi mɛ ndosi ka tɛ ĩ nzɔ̃ni, kanda ta ĩ yamba la na gbelengɔ lɛ ĩ ma.

¹⁰ So popo tɛ ĩ ko, Nzapa ahɛ̃ zo kɔi kɔi nguru kwa ndɛ̃ ndɛ̃ ndɛ̃, ko ale zo kɔi kɔi amu nguru kwa tɛ lo, ali na kwa na seni hɛ̃ afɔ̃ lo.

¹¹ Ale zo ko la na nguru kwa ti pangɔ tɛnɛ tɛ Nzapa, apa bo tɛnɛ ni hɛ̃ azi. Ale zo ko la na nguru ti lingɔ kwa hɛ̃ azi, ali kwa na nguru mɛ Nzapa ahɛ̃ lo. Ĩ li nga so, wadila na ya lo zu ko, azi agonda Nzapa ti ndo Yezo Kristo. Ndima na nguru adu na lo tɛ lo buru na buru. Seni la.

Ale e ndohũ pɛnɔ nga ma se tɛ Yezo Kristo

¹² Aya bua, ta ĩ́ bema na lo kota pɛnɔ mɛ ĩ ndohũ ma, adu apɛnɔ mɛ ndotara lo yengɔ tɛ ĩ. Ta ĩ mu ni nga ma bere adu aye ti kpɛnɛ ma.

¹³ Kanda ale ĩ saba, ta sanga ma, ĩ ndohũ pɛnɔ nga ma se mɛ ndo Yezo Kristo ahũ na pɛnɔ, ya na lá ko gbanda Nzapa afa lo na ya ndima, ĩ hũ lo ko, bɛ ĩ adɛ zɔgɔrɔ.

¹⁴ Se azi aguru ĩ, na lo mɛ ya, ĩ azi tɛ Kristo ko, ĩ du na dengɔ be, ta sanga ma, Tɔrɔ Santo tɛ Nzapa mɛ na ndima ndodu ndoni kɔi na ĩ.

¹⁵ Ale ta zo kɔi so popo tɛ ĩ ahũ pɛnɔ na ti azi, na lo mɛ ya, lo ho zo, bere lo nzĩ ye, bere lo li ye siɔni, bere lo yɔrɔ nyɔ lo na ya tɛnɛ tɛ afɔ̃ lo ma.

¹⁶ Wa se azi ahɛ̃ zo pɛnɔ, na lo mɛ ya, lo wa Kristo ko, ale ta zo ni ama kamɛnɛ ma. Kanda ale lo hɛ̃ sia kɔli hɛ̃ Nzapa, na lo mɛ ya, lo lua ili ni ko na lo tɛ Yezo Kristo.

¹⁷ Ngoi tɛ Nzapa ti fangɔ ngbanga tɛ azi alengbi we. Lo na fangɔ ngbanga tɛ e azi tɛ lo uzu. Wa oko lo na fangɔ ngbanga tɛ e uzu ko, ngbanga mɛ lo na fangɔ bingɔ li azi mɛ akɛ̃ Nzɔ̃ Pa tɛ lo na dungɔ siɔni nvɛni.

¹⁸ Asu ka ya Buku tɛ Nzapa ya: “Adu kpengbani ya, abɛta azi aso. Wa oko la adu nga so ko, songɔ tɛ asiɔ azi na awa lingɔ asiɔ ye adu gbanda kpengbani buai nvɛni!”

¹⁹ Na lo ni ko, azi ko ndohũ pɛnɔ nga ma se mɛ bɛ Nzapa aye ko, ale ala baba bo lingɔ nzɔ̃ ye, ala hɛ̃ nga tɛrɛ la zu hɛ̃ lo mɛ wa lingɔ la. Ta lo ndoweza kapa tɛ lo ma.