1 Petro 3 - Fana Ngbangɔ 1987

Sé du tɛ awe kɔli na tɛ akɔ la

¹ Ĩ awe kɔli, ĩ́ bi nga tɛrɛ ĩ hɛ̃ akɔ ĩ, wadila akɔ ĩ ko la akɛ̃ tɛnɛ tɛ Nzapa aye lo ni, na lo ti se li ye tɛ ĩ. Ko bɛ se ta ĩ tɛnɛ tɛnɛ tɛ Nzapa kɔi hɛ̃ la ma ko, ala na yengɔ lo tɛ lo.

² Ta sanga ma, ala na hũngɔ ya, se li ye tɛ ĩ adu mbiri mbiri, ĩ ndotɔndɔ nga la.

³ Ta ĩ gi ya, ĩ fua tɛrɛ ĩ na lɛkɛngɔ kwa li ĩ, na yungɔ anzɔ̃nzɔ̃ ye ti wɔrɔ, na anzɔ̃nzɔ̃ bɔngɔ ti kota ngere, wa ĩ dɛ̃ ka lɛ azi ma.

⁴ Kanda ale dɛ̃ngɔ tɛ ĩ adu dɛ̃ngɔ mɛ alo ka bɛ ĩ, ale dɛ̃ngɔ ni adu dɛ̃ngɔ ti dede bɛ, dɛ̃ngɔ ti bɛ pii. Gi tɛrɛ dɛ̃ngɔ ni ko la ta ndogbɛ̃ ma, ko ni nga la Nzapa ndomu ka lɛ lo ngbondoni sĩ.

⁵ Ndo gã ko, se mɛ ndo awe mɛ ahɛ̃ tɛrɛ la so vɔrɔngɔ Nzapa, ndolɛndɛrɛ nga lo, ndoli ya ani dɛ̃ la. Ala ndobi ndo tɛrɛ la hɛ̃ akɔ la.

⁶ Se mɛ ndo nga Sara mɛ ya Abrahama ali nga na ni la. Lo ndoma ndo nyɔ Abrahama, ko lo ndoili ndo lo ya: “Gbia tɛ mbi.” Ĩ awe ti ngoi mɛ, se ĩ li ye mɛ nzɔ̃ni, se ta ĩ du nga na mbɛtɔ kɔi ma ko, ĩ ti nga ma aya Sara.

⁷ Ĩ akɔli mɛ ĩ du na wali, ale ĩ du na awe ĩ nzɔ̃ni, na lo mɛ ya, ĩ hĩnga ya, ala du azi mɛ woni. Ĩ tɔndɔ la, ta sanga ma, bɛta du mɛ gbanda Nzapa ahɛ̃ ĩ ko, lo hɛ̃ nga gbanda hɛ̃ la. Ale ĩ li nga so, wadila ta ye kɔi agbanzi sambela tɛ ĩ ma.

Hũngɔ pɛnɔ na lo ti lingɔ nzɔ̃ ye

⁸ Ti kɔngɔ nda tɛnɛ tɛ mbi ko, mbi tisa ĩ ya, í du na bɛ kɔi, ĩ́ ma vundu tɛ afɔ̃ ĩ, ĩ́ yengbi nga ma se tɛ zo na nyita lo, ĩ́ du na nzɔ̃ bɛ na ndo afɔ̃ ĩ, ta í du awa yakɛ ma.

⁹ Se zo ali ĩ siɔni ko, ta ĩ́ li nga lo siɔni ma. Se zo aguru ĩ ko, ta ĩ́ guru nga lo ma. Kanda ale ĩ́ vɔrɔ Nzapa, ya Nzapa asunu zo ni ko. Ta sanga ma, ngoi mɛ ndo Nzapa aili ĩ ko, lo ko ndo kapa ya, ni na sunungɔ ĩ nvɛni.

¹⁰ Buku tɛ Nzapa apa ya: “Zo ko aye ya, ni du nzɔ̃ du, Ni du nga na dengɔ bɛ na ya du tɛ ni ko, Ale lo zia tɛnɛngɔ siɔ tɛnɛ, Lo zia nga pangɔ nvɛnɛ.

¹¹ Ale lo zia lingɔ siɔ ye, Ko lo li ye mɛ nzɔ̃ni. Ale lo kpã mangbingɔ na popo tɛ afɔ̃ lo, Ko ta lo zia ni ma.

¹² Ta sanga ma, Gbia ndoba azi mɛ ndoli nzɔ̃ ye, Lo ndoma nga sambela tɛ la. Kanda tɛ awa lingɔ siɔ ye ko, Lo ndokɛ̃ hũngɔ la na le lo.”

¹³ Se ĩ li anzɔ̃ ye na gonvɛnɛ ko, ta zo kɔi ti lingɔ ĩ siɔni da ma.

¹⁴ Bɛ se azi ahɛ̃ ĩ pɛnɔ na lo ti nzɔ̃ ye mɛ ĩ ndoli ko, ĩ du na dengɔ bɛ. Ta í kpɛ azi ma, ta í kpã nga bɛ ĩ ngbũ ma.

¹⁵ Kanda ale ĩ tɔndɔ Yezo Kristo mɛ Gbia tɛ ĩ. Ĩ lɛkɛ tɛrɛ ĩ so gbinyangɔ tɛnɛ hɛ̃ azi zu mɛ ndohũnda ĩ na nda mɛ ĩ ndolɛndɛrɛ Yezo Kristo.

¹⁶ Ale ĩ kambisa nda ni hɛ̃ la na dede bɛ, ĩ tɔndɔ nga la. Ale ĩ du na vuru bɛ ya, se azi avɔ̃ to tɛrɛ ĩ ko, kamɛnɛ agbɔ̃ la nvɛni na ndo tɛnɛ tɛ la. Ta sanga ma, ala ndodi ĩ siɔni na lo ti nzɔ̃ se li ye tɛ ĩ mɛ ĩ na ni, na lo mɛ ya, ĩ na Yezo Kristo ĩ ti bo kɔi.

¹⁷ Se Nzapa aye ya, ĩ hũ pɛnɔ na lo ti lingɔ nzɔ̃ ye ko, oko adu nzɔ̃ni aɔ lingɔ siɔ ye, ko ĩ hũ pɛnɔ na lo ni.

¹⁸ Yezo Kristo nvɛni akpi ndo so ĩ. Lo kpi ndo bo fani kɔi so hãngɔ siɔ ye tɛ azi zingɔ. Lo mɛ ndo ta lo li siɔ ye ma ko, lo kpi ndo so songɔ asiɔ azi, wadila ĩ ti azi tɛ Nzapa. Azi aho ndo ngbonga tɛrɛ lo, kanda Nzapa aso ndo lo na nguru tɛ Tɔrɔ Santo.

¹⁹ Nga bo na lo nguru ni ko ndo la Yezo agwe so hangɔ atɔrɔ tɛrɛ awa kwáni na lo tɛ Nzapa, ala mɛ ndo afunga la ka bɔlɔkɔ ya, ala ku lá ti fangɔ ngbanga.

²⁰ Adu atɔrɔ tɛrɛ azi ti uzu mɛ ndo akɛ̃ nyɔ Nzapa na ngoi mɛ ndo Noa alɛkɛ na masua. Ko Nzapa agbe ndo bɛ lo, lo ku la ya, ala gbinya bɛ la. Kanda bo azi miambe gɛgɛrɛ ndo la ali ya masua, la aso kwa ti ngu.

²¹ Ngu ni ndofa batisimɔ mɛ ndoso ĩ na olo mɛ. Batisimɔ mɛ ĩ ndomu ko, ta adu na lo ti kpongɔ bi ka tɛrɛ zo zingɔ ma, kanda adu na lo ti hũndangɔ Nzapa ya, lo kpo siɔ ye ka bɛ zo. Batisimɔ aso ĩ, na lo mɛ ya, Yezo Kristo aso ndo na pɛ kwa.

²² Lo diri tɛ lo ndo ka yayu, lo du ka ndo kɔti ti Nzapa, ko aangelo, na atɔrɔ zu mɛ na nguru, ndolɛ nga gbia ka le ndozu ko, ala na gbe gɛrɛ lo.