1 Petro 2 - Fana Ngbangɔ 1987

I du azi tɛ Nzapa

¹ Oko Nzapa ahɛ̃ ĩ du ti fanani ko, ale ĩ kɛ̃ lingɔ asiɔ ye zu, ĩ́ kɛ̃ pangɔ nvɛnɛ, ĩ kɛ̃ lingɔ poroso, ĩ kɛ̃ dungɔ na gwɛ̃ ti ye tɛ zo, ĩ kɛ̃ nga dingɔ zo.

² Kanda ale ĩ du na gwɛ̃ ti mangɔ tɛnɛ tɛ Nzapa, nga ma se mɛ pesɛ nyi ndodu na gwɛ̃ ti ãngɔ mɛ ta lo. Ale ĩ li so, wadila ĩ mai, ko Nzapa aso ĩ.

³ Ta sanga ma, asu ka ya Buku tɛ Nzapa ya: “ĩ tara ndo nzɔ̃ bɛ tɛ Gbia, ko ĩ hũ ya, Gbia adu nzɔ̃ Zo.”

⁴ Ale ĩ i tɛrɛ ĩ ka tɔ̃nda Gbia Yezo mɛ ndohɛ̃ azi bɛta du. Lo nga ma kota tɛ̃ne mɛ ndo azi akɛ̃ abi, ko Nzapa asara ndo lo akpã, na lo mɛ ya, lo ngbondoni ka lɛ ni.

⁵ Ĩ mɛ ĩ lua bɛta du, ĩ nga ĩ du nga ma atɛnɛ ko, ĩ i tɛrɛ ĩ ka tɔ̃nda Nzapa, wa lo mu ĩ, lo wa na da mɛ Tɔrɔ Santo ndodu da. Lo nga na kpãngɔ ĩ ka ya da ni ya, ĩ du abɛta awa lungɔ Nzapa na ye, ko ĩ lu lo na aye na bɛ ĩ kɔi ti ndo Yezo Kristo, wadila aye ni ko adɛ bɛ lo.

⁶ Asu ka ya Buku tɛ Nzapa ya: “Mbi sara ngbondo tɛnɛ kɔi mbi kpã ni na olo Nga ma tɛnɛ ti nda ngɔrɔ da ka kɔdɔrɔ ti Siona. Zo ko la aye lo tɛ tɛ́nɛ ni ko, Ta kamɛnɛ na gbɔ̃ngɔ lo bɛ gbɔ ma.”

⁷ Ĩ azi mɛ ĩ ye lo tɛ tɛ́nɛ ni ko, ĩ ndohũ ni ka le ĩ ngbondoni. Wa azi ko la akɛ̃ yengɔ lo tɛ tɛ́nɛ ni ko, ala ndohũ ni ka lɛ la gɛgɛrɛ, nga ma se mɛ asu ka ya Buku tɛ Nzapa ya: “Tɛ́nɛ mɛ ndo awa wangɔ da akɛ̃ abi ko, Ni la ati tɛ́nɛ ti nda ngɔrɔ da.”

⁸ Asu nga ka ya Buku tɛ Nzapa na ndo mɛ ndɛ̃ ya: “Azi ndota li gɛrɛ la na tɛ́nɛ ni ko, Ko andokinda la.” Ala ndota li gɛrɛ la na tɛ́nɛ ni ko, na lo mɛ ya, ala kɛ yengɔ tɛnɛ tɛ Nzapa. Ko adu nyɔ Nzapa mɛ ndo lo hɛ̃ ya, adu na lo tɛ la la.

⁹ Kanda tɛ ĩ ko, ĩ du ale mɛ Nzapa asara ĩ akpã na lo tɛ lo, ĩ du awa lungɔ Gbia Nzapa na ye, ĩ abɛta azi tɛ Nzapa. Nzapa aili ĩ ya, ĩ lo ka ya mbingo ĩ si, í du na ya vuru ndo mɛ ngbɛ̃. Lo sara ĩ lo kpã ya, ĩ pa lo ti akwa ti ndima tɛ ni hɛ̃ azi.

¹⁰ Ndo uzu ko, ta ĩ ndo azi tɛ Nzapa ma, ta lo ndoma nga ndo vundu tɛ ĩ ma. Kanda na olo ko, ĩ ti azi tɛ lo, lo ndoma nga vundu tɛ ĩ.

Ale sé du tɛ ĩ adu nzɔ̃ni

¹¹ Aya bua, ĩ du awa ndɛ̃ ge lɛ sese, ĩ nga ma awa fɔnɔ. Mbi gbɔ̃ gɛrɛ ĩ ya, ĩ bata li ĩ na lo ti gwɛ̃ ti tɛrɛ ĩ mɛ ndotiri to na tɔrɔ tɛrɛ ĩ.

¹² Ale sé du tɛ ĩ adu nzɔ̃ni na popo tɛ apaganɔ. Se ĩ li so, bɛ se ala vɔ̃ to tɛrɛ ĩ ya, ĩ asiɔ azi ko, ala na hũngɔ ya, ĩ ndoli anzɔ̃ ye, ko gbanda ko, ala gonda Nzapa na lá ti gangɔ tɛ lo.

¹³ Na lo tɛ Gbia Yezo Kristo ko, ale ĩ bi tɛrɛ ĩ hɛ̃ azi zu mɛ adu agbia ti lɛ sese, ale ĩ ma nyɔ kota gbia ti Roma mɛ aɔ azi zu.

¹⁴ Ale ĩ ma nga nyɔ agbia mɛ lo kpã la ya, ala hɛ̃ etumbu hɛ̃ azi mɛ ndoli asiɔ ye, ko ala gonda nga azi mɛ ndoli anzɔ̃ ye.

¹⁵ Ta sanga ma, Nzapa aye ya, ĩ́ li anzɔ̃ ye, wadila awa buba mɛ ta ahĩnga ye ma agi tɛnɛ ti tɛnɛngɔ gba.

¹⁶ Ĩ du abɔrɔ, kanda ta ĩ mu lo bɔrɔ ni, ĩ vĩ na lɛ ĩ, ko ĩ́ li siɔ ye ma. Kanda ale ĩ li ye nga ma awa kwa tɛ Nzapa.

¹⁷ Ale ĩ tɔndɔ azi zu, ĩ́ ye ayata ĩ awa Kristo, ĩ kpɛ Nzapa, ĩ tɔndɔ kota gbia ti Roma.

Ale e ndohũ pɛnɔ nga ma Yezo

¹⁸ Ĩ azi mɛ ĩ ndoli kwa ka tɛ agbia tɛ ĩ ko, ĩ́ bi tɛrɛ ĩ hɛ̃ la, ĩ tɔndɔ la na bɛ ĩ kɔi. Ta ĩ tɔndɔ bo agbia tɛ ĩ mɛ anzɔ̃ azi, nga adede azi ma. Kanda ale ĩ tɔndɔ nga agbia tɛ ĩ mɛ awa zaga.

¹⁹ Ti biani, zo mɛ ta ali siɔ ye ma, la ahɛ̃ lo pɛnɔ sanga sanga ko, se lo da bɛ lo na Nzapa, lo gbe bɛ lo na ya pɛnɔ ni ko, lo li nzɔ̃ni.

²⁰ Ta sanga ma, se ĩ li ye mɛ siɔni, ahɛ̃ ĩ pɛnɔ na lo ni, ko bɛ se ĩ gbe bɛ ĩ ko, ta zo alengbi ti gondangɔ ĩ ma. Kanda se ĩ li ye mɛ nzɔ̃ni, ahɛ̃ ĩ pɛnɔ na lo ni, wa se ĩ gbe bɛ ĩ ko, adu nzɔ̃ni ka lɛ Nzapa.

²¹ Ta sanga ma, Nzapa aili ĩ ya, ĩ gbe bɛ ĩ na ya pɛnɔ, na lo mɛ ya, Yezo Kristo nvɛni ahũ ndo pɛnɔ so ĩ. Ko lo fa ndo ĩ na nzɔ̃ lɛ lo ya, ĩ hũ pɛnɔ nga ma ni.

²² Tɛ lo ko, ta lo li ndo siɔ ye ma, ta ama ndo tɛnɛ kɔi ti nvɛnɛ na nyɔ lo bɛ gbɔ ma.

²³ Ngoi mɛ ndo azi aguru lo ko, ta lo guru ndo nga la ma. Ngoi mɛ ndo azi ahɛ̃ lo pɛnɔ ko, ta lo pa ndo nga ya, ni hɛ̃ la pɛnɔ ma. Kanda lo zia ndo aye ni zu ka yamba ti Nzapa mɛ wa fangɔ ngbanga na seni.

²⁴ Yezo Kristo nvɛni ayɔ ndo asiɔ ye tɛ e, lo kpi na ni ka ndo krusi ya, e ti nga ma awa kwáni mɛ tɛ la na lingɔ siɔ ye awe, ko e li ye na seni. Tɛrɛ ĩ ahã na lo ti kã mɛ ndo adɛ na lo.

²⁵ Ndo uzu ko, ĩ ndo nga ma angasã ngbaga mɛ ayu ndo, kanda na olo ko, ĩ diri ka tɛ Yezo Kristo mɛ nga ma wa batangɔ angasã ngbaga, lo mɛ nga wa batangɔ tɔrɔ tɛrɛ ĩ.