1 Petro 1 - Fana Ngbangɔ 1987

Balangɔ

¹ Mbi Petro mɛ wa pangɔ kwa tɛ Yezo Kristo la mbi su mbɛti olo, mbi to hɛ̃ ĩ azi tɛ Nzapa mɛ ĩ kpɛlɛ kɔdɔrɔ tɛ ĩ, ĩ gundu ka sese ti Pɔnti, ti Galatia, ti Kapadɔsɛ, ti Azia, nga na ti Bitinia. Mbi bala ĩ.

² To e Nzapa ahɛ̃ ndo nyɔ lo, ko lo pia ndo lo sara ĩ lo kpã ya, ĩ ti azi tɛ ni na nguru tɛ Tɔrɔ Santo. Lo li ndo nga so ya, ĩ ma nyɔ Yezo Kristo, wadila mɛnɛ tɛrɛ lo akpo siɔ ye tɛ ĩ. Nzapa ali bɛ kota nzɔ̃ bɛ hɛ̃ ĩ, ali bɛ nga ya, bɛ ĩ adu pii aɔ ndoni ma ke!

É kpã bɛ e ndo Nzapa mɛ aso e

³ É gonda Nzapa mɛ To Gbia tɛ e Yezo Kristo! Lo ma vundu tɛ e ma wo ma, ko lo hɛ̃ e fana du na lege ti songɔ Yezo Kristo na pɛ kwá. Nda mɛ e ndolɛndɛrɛ ya, lo nga na songɔ e na pɛ kwá la.

⁴ Ko e lengbi ti sabangɔ na lo ti anzɔ̃ ye mɛ Nzapa ako kapa so hɛ̃ngɔ azi tɛ lo. Adu anzɔ̃ ye mɛ ta alengbi ti gbɛ̃ngɔ ma, ta bi alengbi ti gbɔ̃ngɔ ni ma, ta dɛ̃ngɔ ni ndowɛ nga ma. Nzapa abata ni ka yayu hɛ̃ ĩ,

⁵ na lo mɛ ya, ĩ ye lo tɛ lo, ko lo ndobata ĩ na nguru tɛ lo ya, na ngoi mɛ gbanda sese awe ko, ni so ĩ, ko azi zu ahũ na lɛ la.

⁶ Na lo ni la ĩ ndosaba. Abɛ adu na olo ya, ĩ ndohũ le apɛnɔ ndɛ̃ ndɛ̃ ndɛ̃ mɛ ndotara bɛ ĩ na pɛ nyi ngoi ko, ĩ ndodu na dengɔ bɛ.

⁷ Apɛnɔ mɛ ĩ ndohũ ndotara bɛ ĩ so fangɔ ya, bere ĩ ye lo tɛ Yezo biani. Wɔrɔ adu ye mɛ ndowɛ. Abɛ nga so ko, azi ndotara ni na wá ya ani ba, bere adu bɛta wɔrɔ. Ko se mɛ nga Nzapa ndotara na lo yengɔ tɛ ĩ mɛ adu ngbondo ye aɔ wɔrɔ la. Lo ndoli nga so ya, na lá ko gbanda Yezo Kristo adiri aga ko, ni gonda ĩ, ko ni hɛ̃ nga ĩ ndima.

⁸ Abɛ ta ĩ hũ ndo Yezo Kristo na lɛ ĩ ma ko, bɛ ĩ aye lo. Abɛ ta ĩ ndohũ lo na olo ma ko, ĩ ye lo tɛ lo. Nda mɛ ĩ ndosaba, bɛ ĩ ndode nga ma wo ma la. Dengɔ bɛ ni adu kotani buai, ta kɔdɛ ti kambisangɔ ni da ma.

⁹ Ta sanga ma, ĩ lua ye mɛ ndo ĩ ndokpã bɛ ĩ ndo ni na ya lo yengɔ tɛ ĩ: alengbi ya, Nzapa aso tɔrɔ tɛrɛ ĩ.

¹⁰ Ndo gã ko, awa pangɔ nyɔ Nzapa agi ndo nda tɛnɛ tɛ Nzapa kɔlɛɛ ya, ani hĩnga se mɛ Nzapa na songɔ na azi. Ala pia ndo apa lo ti nzɔ̃ bɛ mɛ Nzapa na lingɔ hɛ̃ ĩ.

¹¹ Tɔrɔ tɛ Yezo Kristo mɛ ndo na ya tɛrɛ la apia ndo apa hɛ̃ la ya, Kristo ahũ gbanda pɛnɔ, so pɛni ko, lo lua ndima. Ala ndogi ndo ya, ani hĩnga ngoi mɛ aye ni ko na singɔ, nga na se mɛ aye ni ko na singɔ na ni.

¹² Nzapa afa ndo na awa pangɔ nyɔ lo ya, kwa mɛ ndo ni to la ya, ala pa hɛ̃ azi ko, ta adu na lo tɛ la nvɛni ma, kanda adu na lo tɛ ĩ. Na olo ko, awa pangɔ Nzɔ̃ Pa tɛ Yezo apa lo ti aye ni ko hɛ̃ ĩ. Ala pa lo ti aye ni ko na nguru tɛ Tɔrɔ Santo mɛ Nzapa ahɛ̃ la. Ko aangelo ndosepara nga ya, ani hĩnga lo ti aye mɛ ala pa.

Ale ĩ du asanto na ya du tɛ ĩ

¹³ Na lo ti aye zu mɛ ndo Nzapa ali hɛ̃ ĩ ko, ale ĩ lɛkɛ bɛ ĩ so lingɔ kwa hɛ̃ Nzapa, Ĩ du na kpengba lɛ, ĩ lɛndɛrɛ anzɔ̃ ye mɛ gbanda Nzapa ahɛ̃ ĩ na lá ko gbanda Yezo Kristo aga na ni.

¹⁴ Ale ĩ ma nyɔ Nzapa. Ndo uzu, na ngoi mɛ ta ĩ hĩnga Nzɔ̃ Pa ma ko, ĩ ndo na gwɛ̃ ti lingɔ ye mɛ bɛ ĩ aye. Wa na olo ko, ale ta ĩ ti du na gwɛ̃ ti lingɔ siɔ ye ni ko ma.

¹⁵ Nzapa mɛ ndo aili ĩ ya, ĩ du azi tɛ ni ko, lo santo, ko na ya du zu mɛ ĩ ndodu ko, ale ĩ du nga asanto na ya du tɛ ĩ zu.

¹⁶ Ta sanga ma, asu ka ya Buku tɛ Nzapa ya: “Ale ĩ du asanto, ta sanga ma, mbi santo.”

¹⁷ Se mɛ Nzapa ndofa na ngbanga tɛ azi zu adu bo kɔi, ko lo ndofa ngbanga ni na se ye mɛ zo kɔi kɔi ndoli. Ko ngoi mɛ ĩ ndosambela Nzapa ko, ĩ ndoili lo ya, lo To ĩ. Na lo ni ko, na ya tanga bi mɛ ĩ dɛ na ni ge lɛ sese ko, ale ĩ fa na ya du tɛ ĩ ya, ĩ ndotɔndɔ lo.

¹⁸ Ĩ hĩnga ya, Yezo Kristo atɔ̃ ndo ĩ na kota ngere na ya sé du ti gɛgɛrɛ mɛ ndo akotara ĩ azia ĩ da. Ta lo mu ndo aye mɛ nga ma nwa, bere wɔrɔ mɛ dɛ̃ngɔ tɛ la ndogbɛ̃ la lo tɔ̃ na ĩ ma.

¹⁹ Kanda lo tɔ̃ ndo ĩ na mɛnɛ tɛrɛ lo mɛ adu ngbondoni buai. Lo ndo nga ma nyi ngasã ngbaga mɛ ta na siɔ ye nga na bi ma, la amu alu na Nzapa.

²⁰ Uzu ti Nzapa lingɔ sese ko, lo pia ndo lo sara Yezo Kristo lo kpã ya, lo tɔ̃ azi. Ko ĩ da na olo na ngoi mɛ sese adoli ti wɛngɔ ko, Nzapa afa lo yango ya, ĩ lua nzɔ̃ lo na lo tɛ lo.

²¹ Nzapa aso ndo lo na pɛ kwá, ahɛ̃ lo ndima. Ko ĩ ye lo tɛ Nzapa na lo tɛ lo. Na lo ni, zo mɛ ĩ ye lo tɛ lo, ĩ ndolɛndɛrɛ lo ko, lo Nzapa.

²² Ĩ ndotɔndɔ bɛta lo tɛ Nzapa, la bɛ ĩ ati vuruni ya, ĩ ye ayata ĩ awa Kristo na bɛ ĩ kɔi. Wa ale ĩ yengbi sĩ nvɛni na bɛ ĩ kɔi.

²³ Ta sanga ma, adu ĩ fani mɛ ndɛ̃ na lo ti tɛnɛ tɛ Nzapa mɛ ndohɛ̃ zo bɛta du, tɛnɛ tɛ lo mɛ ndongbã kaka. Ta ĩ aya zo mɛ na kpingɔ ma, kanda ĩ aya Nzapa mɛ kaka.

²⁴ Asu ka ya Buku tɛ Nzapa ya: “Azi zu ndokpili nga ma se mɛ sã ndoulɛ, ko akpi. Ndima tɛ la zu adu nga ma dẽngɔ ti kasa pandara. Ngoi mɛ sã ni aulɛ ko, kasa pandara ni akiɔ̃ ati.

²⁵ Kanda tɛnɛ tɛ Gbia ndongbã buru na buru.” Tɛnɛ ni adu Nzɔ̃ Pa mɛ ndo apa hɛ̃ ĩ.