1 Timɔte 6 - Fana Ngbangɔ 1987

¹ Ale ambɛ zu amu ato gbia la nga ma azi mɛ alengbi ti tɔndɔngɔ la sĩ. Ale ala li so, so zo atɛnɛ tɛnɛ siɔni na ili Nzapa, atɛnɛ nga tɛnɛ siɔni na lo ti lo mɛ e ndoha.

² Ambɛ ko la ato gbia la adu awa Kristo ko, ale ta ala samana na ato gbia la, na lo mɛ ya, ato gbia la ni adu ayata la awa Kristo ma. Kanda ale ambɛ ni ali hɛ̃ la kwa nzɔ̃ni buai, na lo mɛ ya, azi ko la ambɛ ni ko ndoza la na kwa ko, ala du awa Kristo mɛ ambɛ ko ndoye la. Ba lo mɛ ale mɔ ndoha, ko mɔ ndowa nga na ambɛ la.

Alo ti nvɛnɛ nga na abɛta lo

³ Se zo aha lo mɛ ndɛ̃, se ta lo ye abɛta tɛnɛ tɛ Gbia tɛ e Yezo Kristo ma, se ta lo ye nga lo mɛ e ndoha na lo ti se li ye mɛ ndode bɛ Nzapa ma ko,

⁴ zo ni ko lo wa yakɛ sĩ, ko ta lo hĩnga nga ye kɔi ma. Lo nga zo mɛ lo ye bimbingɔ tɛnɛ sĩ, lo ye nga pangɔ pa ngbɔndɔ ngbɔndɔ na lo ti atɛnɛ. Na lo ni la azi ndoli sɔbɛrɛ, ndopa pa, ndoguru afɔ̃ la, ndodu na siɔ dangɔ bɛ ndo afɔ̃ la,

⁵ ndobimbi tɛnɛ mɛ ta nda ni ndokɔ ma. Azi ni ko ndodu na siɔ dangɔ bɛ, ta ala ndohĩnga nga bɛta lo ma. Ala ndoda bɛ la ya, na lo ti lo Nzapa ko, ani ti awa nwa.

⁶ Biani, se zo ali ye mɛ ndode bɛ Nzapa, adu nga na dengɔ bɛ na lo ti aye mɛ lo na ni ko, lo lua kota nwa tɛ Nzapa.

⁷ Ta sanga ma, ngoi mɛ ndo e ga ge le sese olo ko, ta e ga ndo na ye kɔi ti e ma.

⁸ Kanda se e du na tɛ nga na bɔngɔ ko, oko alengbi na e.

⁹ Kanda azi ko la ndoye ya, ani ti awa nwa ko, Satana ndohanda la, ko ala ndoza sɔ̃ tɛ lo, na lo ti agɛgɛrɛ siɔ ye mɛ ala na gwe ni, asiɔ ye mɛ ndogbɛ̃ zo zu zu zu.

¹⁰ Ta sanga ma, yengɔ faranga ndoili lɛ asiɔ ye ndɛ̃ ndɛ̃ ndɛ̃ na tɛrɛ zo. Ambanga azi adɔ ndo lege tɛ Nzapa azia, na lo mɛ ya, ala ye ndo faranga sĩ, ko bɛ la ndosɔ ndo nga na lo ni sĩ.

Wangɔ mɛ Polo awa na Timɔte

¹¹ Wa mɔ mɛ mɔ tɛ mɔ zo tɛ Nzapa ko, ale mɔ kpɛ asiɔ ye ko zu. Li kpengbani ya, mɔ li ye mɛ mbiri mbiri, ye mɛ ndode be Nzapa. Ngbã bo na yengɔ lo tɛ Nzapa, ye afɔ̃ mɔ, gbe bɛ mɔ, du na dede bɛ.

¹² Tiri nzɔ̃ to na lo kwa tɛ Nzapa tɛ e, gbɔ̃ du ti kaka, ko mɔ̃ bata ni, ta sanga ma, Nzapa aili ndo mɔ na lo ni, na ngoi mɛ ndo mɔ pa lo ni nzɔ̃ni na gbɛlɛ azi ma wo ma.

¹³ Na ili Nzapa mɛ ndohɛ̃ dungɔ lɛ ngɛ̃ hɛ̃ aye zu, nga na ili Yezo Kristo mɛ ndo apa nzɔ̃ lo ni na gbɛlɛ Pɔnse Pilato ko, mbi hɛ̃ mɔ nyɔ ya,

¹⁴ mɔ tɔndɔ ndia mɛ Nzapa alu hɛ̃ mɔ, mɔ̃ bata ni na vuru bɛ, ko ta mɔ̃ li ye ya, azi abela mɔ na lo ni ma. Li so nga ka Gbia tɛ e Yezo Kristo adiri aga na ni.

¹⁵ Ngoi mɛ gbanda bi mɛ Nzapa ako alengbi ko, lo to Yezo Kristo. Bo Nzapa kɔi la lombe, wa dengɔ bɛ, Gbia tɛ agbia.

¹⁶ Bo lo kɔi la lo ndongbã kaka, lo ndodu na ya vuru ndo mɛ ta zo kɔi alengbi ti ingɔ tɛrɛ lo ka tɔ̃ ni ma. Ta zo kɔi ade ahũ lo bɛ gbɔ ma, ta zo kɔi alengbi nga ti hũngɔ lo ma. É gonda bɛ lo, ko lo lɛ bɛ nga gbia buru na buru ma ke! Seni la.

¹⁷ Hɛ̃ nyɔ hɛ̃ azi ko la na nwa ti lɛ sese na ti la ya, ta ala du awa yakɛ ma. Hɛ̃ la nyɔ ya, ta ala kpa nga bɛ la na ndo nwa ni ko ma, na lo mɛ ya, ta nwa ni ko ndoninga ma. Kanda ale ala kpã bɛ la na ndo Nzapa mɛ ndohɛ̃ e ye kwɛ ma wo ma. Lo ndohɛ̃ e aye ni ko ya, e saba na lo ni.

¹⁸ Hɛ̃ nga la nyɔ ya, ala li nzɔ̃ kwa sĩ, ala du awa kangɔ kaye, ala hɛ̃ nga ye hɛ̃ afɔ̃ la.

¹⁹ Se ala li so ko, afa ya ala bo bɛta nwa mɛ ndoninga na lo ti bi mɛ ka gbɛlɛ la, wadiía ala lua bɛta du.

²⁰ Ee Timɔte, ló mɛ Nzapa azia na yamba ti mɔ ko, bata ni nzɔ̃ni. Gɛgɛrɛ tɛnɛ, na tɛnɛ mɛ ta ndode bɛ Nzapa ma ko, ta mɔ dɔ nyɔ mɔ ya ni ma. Ta mɔ dɔ nga nyɔ mɔ na ya lo ti nvɛnɛ mɛ azi ndoha ma. Ala ndoili lo ni ko ya, adu hĩngangɔ ndo. Kanda ta adu bɛta hĩngangɔ ndo ma.

²¹ Mbi pa so, ta sanga ma, ambanga azi amu ndo tɛrɛ la ya, ani hĩnga ndo, ko ala dɔ ndo lege ti lo yengɔ tɛ la azia. Nzapa ali be nzɔ̃ bɛ hɛ̃ ĩ ma ke!