1 Timɔte 5 - Fana Ngbangɔ 1987

Aye mɛ ale mɔ ndoli bɛ awa Kristo

¹ Ale ta mɔ bela bange na kpengba tɛnɛ ma. Kanda ale mɔ wa lo, nga ma se mɛ mɔ ndowa na to mɔ. Mu aya kɔli nga ma ayata mɔ.

² Mu atara bange nga ma atara mɔ, mu nga aya awe nga ma ayata mɔ, du na vuru bɛ na gbɛlɛ la.

³ Tɔndɔ awe muã mɛ ta zo ti la kɔi ma.

⁴ Kanda se we muã adu na aya lo, bere na atara lo da ko, uzu ale ala hĩnga lingɔ ye mɛ ndode bɛ Nzapa, na tɛrɛ azi ti nda se wa tɛ la nvɛni. Ale ala bata nga awa dúngɔ la, nga ma se mɛ ndo awa dúngɔ la abata na la, ta sanga ma, ye mɛ nzɔ̃ni ka lɛ Nzapa la.

⁵ Wali mɛ we muã nvɛni, ko ta zo ti zangɔ lo da ma ko, lo ndolɛndɛrɛ Nzapa, ta lo ndonzɛ̃ na vɔrɔngɔ Nzapa, nga na hũndangɔ lo bi na lá ya, lo za ni ma.

⁶ Kanda we muã ko la ndoye dungɔ na ya dengɔ bɛ ti lɛ sese ko, abɛ se lo dɛ lɛ lo ngɛ̃ ko, tɔrɔ tɛrɛ lo akpi wɛ.

⁷ Ba tɛnɛ mɛ ale mɔ pa hɛ̃ la, so zo abela la la.

⁸ Se ta zo akã asongo lo ma, se ta lo kã mai bo azi ti nda se wa tɛ lo nvɛni ma ko, afa ya, lo kɛ̃ lege tɛ Nzapa, ko siɔ ye tɛ lo aɔ nga ndo siɔ ye tɛ zo mɛ ta aye lo tɛ Nzapa ma.

⁹ We muã mɛ mɔ lengbi ti sungɔ ili lo na ya buku tɛ awe muã la, we muã mɛ buru tɛ lo aɔ buru sui mana, ko ale we muã ni adu ndo bo na kɔli kɔi.

¹⁰ Ale azi ahĩnga nga ya, lo ndoli ndo nzɔ̃ kwa, lo ndokã ndo aya lo nzɔ̃ni, lo ndoyamba ndo azi mɛ ndosi ka tɛ lo nzɔ̃ni. Ale lo du zo mɛ ndo ndokpo gɛrɛ azi tɛ Nzapa, zo mɛ ndo ndoza awa pɛnɔ, zo mɛ ndo ndoli nga anzɔ̃ ye ndɛ̃ ndɛ̃ ndɛ̃.

¹¹ Kanda ta mɔ su ili awe muã mɛ ade amɔsia na ya buku ni ko ma. Ta sanga ma, ngoi mɛ gwɛ̃ ti dungɔ na kɔli ti gbɔ̃ la ko, ala dɔ lege tɛ Yezo Kristo azia.

¹² Na lo ni ko, ngbanga na tingɔ na la, na lo mɛ ya, ala weza kapa mɛ ndo ala ko hɛ̃ Yezo Kristo uzu.

¹³ Mbanga ló mɛ ale ta mɔ su ili awe muã mɛ ade amɔsia na ya buku ni ko ma lo mɛ: ala ti awa ndɛkɔ, ko kwa tɛ la bo fɔnɔngɔ na nda se wa tɛ azi. Ala ti nga awa fɔnɔngɔ na ili azi, awa yɔrɔngɔ nyɔ la na ya tɛnɛ tɛ azi, awa tɛnɛngɔ tɛnɛ mɛ ta alengbi ma.

¹⁴ Na lo ni la mbi separa ya, awe muã mɛ ade amɔsia ati du na kɔli, adú ayangambi, abata nga da tɛ la, so awe muã ni azi lege hɛ̃ awa kɛ̃ngɔ e ya, ala tɛnɛ siɔ tɛnɛ na ili e.

¹⁵ Mbi pa so, ta sanga ma, ambanga awe muã adɔ lege tɛ Nzapa azia, ko ala ndoɔ pɛko Satana.

¹⁶ Wa se wa Kristo ti wali adu na asongo lo mɛ awe muã ko, ale ta lo zia la ya, azi ti Eklezia aza la ma. Kanda ale lo nvɛni lo za la, wadila azi ti Eklezia aza tɛ la awe muã mɛ ta zo ti zangɔ la da ma.

¹⁷ Akangba ko la ndobata azi ti Eklezia nzɔ̃ni, mai bo ala ko la ndohɛ̃ tɛrɛ la so lingɔ kwa ti pangɔ Nzɔ̃ Pa, nga ti hangɔ tɛnɛ tɛ Nzapa ko, ale ĩ tɔndɔ la sĩ, ko ĩ futa nga la na faranga mɛ kpendema.

¹⁸ Ta sanga ma, Buku tɛ Nzapa apa ya: “Ta mɔ gbe nyɔ bagara mɛ ndodɔrɔ le tɛ hɛ̃ mɔ, so gbanzingɔ lo na tɛngɔ ni ma.” Buku tɛ Nzapa apa nga ya: “Ale wa kwa alua faranga tɛ lo.”

¹⁹ Se zo kɔi avɔ̃ to tɛrɛ kangba ti Eklezia ka gbɛlɛ mɔ ko, ta mɔ ye lo ni ma. Kanda se azi mɛ ndɛ̃ osɛ, bere ota apa ya, adu biani, wadila mɔ ye lo ni.

²⁰ Azi ko la ndoli siɔ ye ko, bela la na gbɛlɛ azi zu, wadila mbɛtɔ agbɔ̃ nga ambanga mɛ ndɛ̃.

²¹ Na ili Nzapa, na ili Yezo Kristo, nga na ili aangelo mɛ ndo Nzapa asara la akpã ko, mbi gbɔ̃ gɛrɛ mɔ sĩ nvɛni ya, mɔ tɔndɔ tɛnɛ ko la mbi tɛnɛ hɛ̃ mɔ. Ta mɔ pia mɔ kɛ̃ tɛnɛ tɛ zo mɛ avɔ̃ to tɛrɛ lo ka tɛ mɔ, bere mɔ pia mɔ ye tɛnɛ tɛ lo ma. Ta mɔ ye zo kɔi, ko mɔ dɔ zo mɛ ndɛ̃ mɔ zia ma.

²² Se mɔ ye hɛ̃ngɔ zo kwa ti Eklezia ko, ta mɔ kpã ti mɔ ndo lo hiɔ ya, Nzapa asunu lo ma. Ale mɔ hĩnga lo uzu nzɔ̃ni wadila. Se mɔ hũ azi na lingɔ siɔ ye ko, ta mɔ li tɛ mɔ ni ma, kanda ale mɔ bata bɛ mɔ vuruni.

²³ Timɔte, zia nyɔngɔ bo ngu kɔi, kanda nyɔ nga vinɔ yakere, ya aza kundu mɔ, na lo mɛ ya, kundu mɔ ndosɔ fani sĩni.

²⁴ Asiɔ ye tɛ ambanga azi ndosi yango, uzu ya afa ngbanga tɛ la. Kanda tɛ ambanga azi mɛ ndɛ̃ ko, andohĩnga asiɔ ye tɛ la bo na pɛ fangɔ ngbanga tɛ la.

²⁵ Anzɔ̃ kwa ndofa nga tɛrɛ la yango. Ko abɛ nga ala mɛ ta ndofa tɛrɛ la yango hiɔ ma ko, ta ala ndongbã na gbe mbingo na pɛ yɔngɔrɔ ngoi ma.