1 Timɔte 4 - Fana Ngbangɔ 1987

Awa hangɔ lo tɛ Nzapa na nvɛnɛ

¹ Tɔrɔ Santo apa yango ya, gbanda na ndangba bi ko, ambanga azi adɔ gbanda yengɔ lo tɛ Nzapa azia Ala ma gbanda nyɔ asiɔ tɔrɔ mɛ ndopa nvɛnɛ, ala ye nga gbanda lo mɛ asiɔ tɔrɔ ndoha.

² Awa nvɛnɛ mɛ nga awa poroso gbanda la ayu la na lege. Ala du azi mɛ vuru bɛ tɛ la akpi kpɔɔ.

³ Ala ndoha azi na ye ya, dungɔ na wali, bere dungɔ na kɔli adu siɔni. Ala ndoha nga azi na ye ya, tɛngɔ ambanga tɛ adu nga siɔni. Kanda Nzapa ali atɛ ko ya, awa Kristo mɛ ahĩnga bɛta lo, ahɛ̃ ni sia kɔli uzu, wa ala tɛ ni.

⁴ Ye kwɛ mɛ Nzapa ali ko, adu nzɔ̃ni. Ale ta e kɛ̃ ye kɔi ma, kanda ale e mu ye kwɛ na hɛ̃ngɔ lo sia kɔli.

⁵ Ta sanga ma, ye kwɛ nzɔ̃ni, na lo mɛ ya, Nzapa apa so, ko ye kwɛ nga nzɔ̃ni, na lo ti sambela mɛ e ndosambela.

Nzɔ̃ wa kwa tɛ Yezo Kristo

⁶ Se mɔ ha alo ko hɛ̃ ayata mɔ awa Kristo, wadila mɔ ti nzɔ̃ wa kwa tɛ Yezo Kristo, ko mɔ na fangɔ ya, mɔ kpengba na lo ti tɛnɛ tɛ Nzapa mɛ e ye lo ni, nga na lo ti bɛta lo tɛ lo mɛ mɔ ndotɔndɔ na Seni.

⁷ Wa abuba tɛnɛ ti mbaye mɛ ta ndode bɛ Nzapa ma ko, ta mɔ ye ni ma. Li kpengbani ya, du tɛ mɔ ade bɛ Nzapa.

⁸ Akpengba wele mɛ zo ndole ya, gbe tɛrɛ ni ati kpengbani na lo ni ko, andoza zo yakere. Kanda se du tɛ zo ade bɛ Nzapa ko, andoza zo sĩ nvɛni, na lo mɛ ya, zo ni ahĩnga ya, na olo ko, ni lua fana du wɛ, ko fana du ni nga na ngbãngɔ kaka.

⁹ Tɛnɛ ni ko adu biani, ko azi alengbi ti yengɔ ni na bɛ la kɔi.

¹⁰ Ĩ ba nda mɛ e ndoli kwa kpengbani sĩ la. Ta sanga ma, e ndolɛndɛrɛ Nzapa mɛ lɛ lo ngɛ̃, lo mɛ Wa songɔ azi zu, lo mɛ lo ndoso mai bo awa yengɔ lo tɛ Yezo Kristo.

¹¹ Pa hɛ̃ la alo ko zu, ha nga la na ni.

¹² Ta mɔ ye ya, zo asamana na mɔ, na lo mɛ ya, mɔ dɛ nyi kɔli ma. Kanda ale mɔ du wa fangɔ nzɔ̃ le lo na awa Kristo. Ale mɔ fa la na ni na se tɛnɛ tɛ mɔ, na se du tɛ mɔ, na se mɛ mɔ ndoye na lo tɛ Nzapa, nga na se mɛ mɔ ndodu na vuru bɛ.

¹³ Hɛ̃ tɛrɛ mɔ na dingɔ Buku tɛ Nzapa na gbɛlɛ azi, na pangɔ hɛ̃ la tɛnɛ tɛ Nzapa, nga na hangɔ la na tɛnɛ tɛ lo, nga ka mbi ga na ni.

¹⁴ Ta mɔ zia nguru kwa mɛ mɔ na ni ma, nguru kwa mɛ Nzapa ahɛ̃ mɔ na ngoi mɛ ndo awa pangɔ nyɔ lo apa na lo tɛ mɔ, akangba ti Eklezia akpa nga na ti la ndo mɔ ya, Nzapa asunu mɔ.

¹⁵ Ale mɔ li aye ni ko, ale mɔ hɛ̃ nga tɛrɛ mɔ zu na lo ni, wadila azi zu ahũ ya, mɔ gwe uzu na lege tɛ Nzapa.

¹⁶ Bata li mɔ nzɔni na lo ti du tɛ mɔ nvɛni, nga na lo ti aye mɛ mɔ ndoha na azi. Ngbã bo na lingɔ aye ko zu na kpengba bɛ. Ta sanga ma, se mɔ li so ko, mɔ na songɔ tɛrɛ mɔ nvɛni, mɔ nga na songɔ awa mangɔ mɔ.