1 Timɔte 3 - Fana Ngbangɔ 1987

Awa batangɔ azi ti Eklezia

¹ Tɛnɛ mɛ mbi na pangɔ ni ko, adu bɛta tɛnɛ. Tɛnɛ ni lo mɛ: zo ko la aye tingɔ wa batangɔ azi ti Eklezia ko, lo ye lingɔ nzɔ̃ kwa.

² Ale lo du zo mɛ ta ndoli ye mɛ alengbi ti belangɔ lo na lo ni ma, ale lo du na wali bo kɔi, lo li ye na nyɔ kpɔ̃ ni, lo du na nzɔ̃ kɔdɛ, lo li ye na seni. Ale lo yamba azi mɛ ndosi ka tɛ lo nzɔ̃ni, ale lo hĩnga nga hangɔ lo tɛ Nzapa.

³ Ale ta lo nyɔ kana agbɔ̃ lo ma, ale ta lo du wa gingɔ ló ma. Kanda ale lo du dede zo, zo mɛ ndomangbi na azi. Ale ta lo du zo mɛ bɛ lo kotani na ndo faranga ma.

⁴ Ale lo du zo mɛ lo lengbi ti batangɔ nda se wa tɛ lo nvɛni nzɔ̃ni, ale lo li ya, aya lo ama nyɔ lo, atɔndɔ nga lo na seni.

⁵ Ta sanga ma, se ta zo ahĩnga batangɔ nda se wa tɛ lo nvɛni ma ko, ta lo lengbi nga ti batangɔ azi ti Eklezia tɛ Nzapa ma!

⁶ Ale ta lo du zo mɛ agbinya bɛ lo fanani ma, so lo yakɛ tɛrɛ lo, ko Nzapa afa ngbanga abi li lo, nga ma se mɛ ndo Satana ayakɛ na tɛrɛ lo, ko na lo ni ndo la Nzapa afa ngbanga abi li lo.

⁷ Ale azi mɛ ta awa Kristo ma atɔndɔ nga zo ni ko, so ala samana na lo, ko lo za sɔ̃ mɛ Satana apeta.

Ló tɛ adiakrɛ

⁸ Ale adiakrɛ adu azi ti ndima, azi mɛ ta nyɔ la se se ma. Ale ala du azi mɛ ta ndonyɔ kana sĩ ma, azi mɛ ta ndolua faranga na se lege mɛ siɔni ma.

⁹ Ko bɛta tɛnɛ mɛ Nzapa afa ko, ale ala ngba na yengɔ lo ni na vuru bɛ.

¹⁰ Uzu ti la tingɔ adiakrɛ ko, ale atara bɛ la, wa so pɛni, se ta ala du na siɔ lo ma, wadila ala li kwa tɛ la ti diakrɛ.

¹¹ Ale awe la adu nga awe ti ndima, awe mɛ ta ndodi zo ma, awe mɛ ndoli ye na nyɔ kpɔ̃ ni, awe mɛ ta ndoweza kwa kɔi mɛ ala na ni ma.

¹² Ale adiakrɛ adu na wali bo kɔi, ale ala hĩnga batangɔ aya la, na azi mɛ ndɛ̃ mɛ na nda se wa tɛ la nzɔ̃ni.

¹³ Adiakrɛ ko la ndoli kwa tɛ la nzɔ̃ni ko, azi ndotɔndɔ la, ko ala lengbi ti tɛnɛngɔ tɛnɛ mɛ aba lo yengɔ lo tɛ Yezo Kristo na kpengba bɛ.

Kota lo mɛ Nzapa afa

¹⁴ Mbi ndolɛndɛrɛ ya, mbi si ka tɛ mɔ bo lo mɛ, la mbi su mbɛti olo hɛ̃ mɔ ya,

¹⁵ bɛ se ta mbi si ka tɛ mɔ hiɔ ma ko, mɔ hĩnga se mɛ azi ti nda se wa tɛ Nzapa alengbi ti dungɔ na ni. Ala du azi ti Eklezia tɛ Nzapa mɛ lɛ lo ngɛ̃. Ala ndoha bɛta lo tɛ Nzapa, ko ala ndokpengba na ya bɛta lo ni nga ma ngbo da mɛ ndokpengba na da.

¹⁶ Biani, bɛta lo ti lo Nzapa tɛ e mɛ Nzapa afa ko, adu kotani. Bɛta lo ni adu lo tɛ zo mɛ ndo amu tɛrɛ zo. Tɔrɔ Santo afa ndo ya, zo ni ko adu bɛta zo, Aangelo ahũ ndo zo ni ko. Apa ndo lo tɛ zo ni ko hɛ̃ apaganɔ, Azi ti lɛ sese aye ndo lo tɛ lo, Ko Nzapa aya ndo lo ka yayu, ka ndo ti ndima.