1 Timɔte 2 - Fana Ngbangɔ 1987

Polo aha lo ti sambela

¹ Tɛnɛ ti uzu mɛ mbi na wangɔ na ĩ awa Kristo lo mɛ: ĩ sambela Nzapa na lo tɛ azi zu, ĩ vɔrɔ tɛrɛ ĩ hɛ̃ lo na lo tɛ la ya, lo za la, ĩ́ hɛ̃ nga lo sia kɔli na lo tɛ la.

² Ale ĩ sambela Nzapa na lo tɛ agbia, nga na lo tɛ akota azi zu, wadila kɔdɔrɔ tɛ e adu pii, ko e du nga na mangbingɔ. Na lo ni ko, du tɛ e alengbi ti dengɔ bɛ Nzapa, ko sé du tɛ e adu nga nzɔ̃ni ka gbɛlɛ lo.

³ Ĩ ba sambela mɛ Nzapa mɛ Wa songɔ e ndohũ ka le lo nzɔ̃ni, ko ndode nga bɛ lo la.

⁴ Andode bɛ lo, na lo mɛ ya, lo ye ya, ni so azi zu, ko ala hĩnga nga bɛta lo tɛ ni.

⁵ Ta sanga ma, Nzapa bo kɔi, ko zo mɛ ndolɛkɛ popo tɛ lo na azi nga bo kɔi la Yezo Kristo

⁶ mɛ ndo aka tɛrɛ lo so tɔ̃ngɔ azi zu. Lo kpi ndo na bi mɛ ndo Nzapa ako, ko oko afa ya, Nzapa aye ya, ni so azi zu.

⁷ Na lo ni la lo kpa mbi wa nɔngɔ kwa, so pangɔ pa tɛ Yezo Kristo. Lo nɛ hɛ̃ mbi ya, mbi ha azi mɛ ta Ayuda ma na bɛta lo tɛ ni, wadila ala ye lo ni. Bɛta tɛnɛ la mbi tɛnɛ, ta adu nvɛnɛ ma.

⁸ Na lo ni la mbi ye ya, na ndo kwɛ ko, akɔli asambela Nzapa, aya ti la ndozu so vɔrɔngɔ lo na bɛ mɛ vuruni, ta ala du na ngɔnzɔ ma, ta ala pa nga pa ma.

⁹ Wa tɛ awe ko, mbi ye nga ya, ala yu bɔngɔ na se mɛ alengbi, nga na se mɛ nzɔ̃ni, ala yu bɔngɔ ni na se mɛ ya, ta gwɛ̃ tɛ la agbɔ̃ akɔli ma. Ale ta ala fua li la na se kɔdɛ mɛ ya, le azi asa tɛrɛ la ma. Ta ala fua tɛrɛ la na anzɔ̃nzɔ̃ ye mɛ alɛkɛ na wɔrɔ ma. Ta ala fua nga tɛrɛ la na lenge, bere na bɔngɔ ti kota ngere ma.

¹⁰ Kanda ale ala li nzɔ̃ kwa, adu ye mɛ ale awe mɛ ndopa ya, ani ndotɔndɔ Nzapa andoli. I ba se mɛ ala lengbi ti fuangɔ na tɛrɛ la la.

¹¹ Ale awe adunga kpɔ na ngoi ko la andoha la na tɛnɛ tɛ Nzapa, ko ale ala bi tɛrɛ la zu hɛ̃ wa hangɔ lo ni.

¹² Ta mbi hɛ̃ lege hɛ̃ wali ya, lo ha kɔli na tɛnɛ tɛ Nzapa, bere lo du gbia ti ndo kɔli ma, ale lo du kpɔ.

¹³ Ta sanga ma, Nzapa ali ndo kɔli mɛ ili lo Adamu uzu, la lo li wali mɛ ili lo Eva gesi.

¹⁴ Ko ta Adamu ndo la Satana ahanda lo ma, kanda Eva ndo la Satana ahanda lo, Eva ndo nga la akɛ̃ nyɔ Nzapa.

¹⁵ Abɛ nga so ko, se wali angbã bo na yengɔ lo tɛ Nzapa, na yengɔ afɔ̃ lo azi, na lingɔ ye mɛ ndode bɛ Nzapa, nga na lingɔ ye ya, ta gwɛ̃ tɛ lo agbɔ̃ akɔli ma ko, lo na songɔ kwá, na ngoi ti lo dúngɔ nyi.