1 Timɔte 1 - Fana Ngbangɔ 1987

Balangɔ

^1-2 Mbi Polo mɛ Nzapa na Yezo Kristo ahɛ̃ nyɔ hɛ̃ mbi ya, mbi du wa pangɔ kwa tɛ Yezo Kristo, la mbi to mbɛti olo hɛ mɔ Timɔte mɛ mɔ nga ma bɛta nyi mbi, na lo mɛ ya, mɔ ye lo tɛ Yezo Kristo. Nzapa la aso e, ko Yezo Kristo la e ndolɛndɛrɛ lo. Mbi bala mɔ. To e Nzapa na Gbia tɛ e Yezo Kristo ali bɛ nzɔ̃ bɛ hɛ̃ mɔ, ama bɛ vundu tɛ mɔ, ali bɛ nga ya, bɛ mɔ adu pii ma ke!

Du na kpengba lɛ na lo tɛ awa hangɔ lo tɛ Nzapa na nvɛnɛ

³ Mbi ye ya, mɔ ngbã ka kɔdɔrɔ ti Efɛzɛ nga ma se ko ndo mbi pa na ni hɛ̃ mɔ, na ngoi ti gwengɔ mbi ka sese ti Masedoanɛ. Ka Efɛzɛ ko, awa hangɔ lo tɛ Nzapa na nvɛnɛ da, ko ale mɔ gbanzi la na hangɔ lo ni.

⁴ Pa nga hɛ̃ la ya, ala zia kpãngɔ bɛ la na ndo agɛgɛrɛ tɛnɛ ti mbaye, ala zia nga dikɔngɔ ili akotara la gbara gbara, na lo mɛ ya, andohɛ̃ azi lege ya, ala bimbi tɛnɛ na popo tɛ la. Ko ta gi tɛrɛ ye ni ko ndoza la ya, ala li ye mɛ Nzapa aye ma. E hĩnga ye mɛ ndode bɛ Nzapa, na lo mɛ ya, e ye lo tɛ lo.

⁵ Mbi pa hɛ̃ mɔ ya, mɔ gbanzi la, wadila ala ye afɔ̃ la. Ti nɛngɔ ya, ala ye afɔ̃ la ko, ale bɛ la adu vuruni, ale ala li ye mɛ ala hĩnga ya adu nzɔ̃ni, ale ala ye nga lo tɛ Nzapa na bɛ la kɔi.

⁶ Ambanga azi azia anzɔ̃nzɔ̃ aye ni ko, ayu lege, ko ala ndobimbi bo tɛnɛ mɛ ta nda ni da ma.

⁷ Ala ndoye ya, ani du awa hangɔ ndia tɛ Nzapa, kanda ta ala ndohĩnga nda tɛnɛ tɛ la nvɛni mɛ ala ndotɛnɛ, nga na ló mɛ ala ndoha na kpengba bɛ ma.

⁸ E hĩnga ya, ndia tɛ Nzapa adu nzɔ̃ni, se e tɔndɔ ni na seni.

⁹ E hĩnga nga ya, ta Nzapa alu ndia na lo tɛ abɛta azi ma, kanda lo lu ni na lo tɛ asiɔ azi, azi mɛ ndosaba tɛrɛ lo, azi mɛ ndokɛ̃ nyɔ lo, azi mɛ ta ndokpe lo, ndokpe nga aye mɛ Santo ma, azi mɛ na siɔ bɛ, azi mɛ ndoho to la bere ta la, azi mɛ ndokpɔ azi,

¹⁰ azi mɛ ndoli siɔ ye ti kamɛnɛ, akɔli mɛ ndofɔnɔ na afɔ̃ la akɔli ma bere afɔ̃ la ni ati awe la, azi mɛ ndoka afɔ̃ la na ngere ya, ala ti ambɛ, azi mɛ ndopa nvɛnɛ, azi mɛ ndonyɔ ngɛ na nvɛnɛ, nga na azi mɛ ndoli aye mɛ ndɛ̃ zu mɛ ta alengbi na bɛta lo tɛ Nzapa mɛ andoha ma.

¹¹ Bɛta lo ni alo na ya Nzɔ̃ Pa tɛ Nzapa mɛ na ndima, lo mɛ nga na dengɔ bɛ, ko Nzapa azia ni na yamba ti mbi ya mbi pa.

Polo ahɛ̃ sia kɔli hɛ Nzapa na lo ti vundu mɛ Nzapa ama hɛ̃ lo

¹² Mbi hɛ̃ sia kɔli hɛ̃ Gbia tɛ e Yezo Kristo mɛ asa nguru tɛrɛ mbi ya, mbi li na kwa tɛ ni. Mbi hɛ̃ lo sia kɔli na lo ko la lo mu mbi ka le lo ya, mbi du zo mɛ lo lengbi ti kpãngɔ bɛ lo ndo mbi, lo kpã nga mbi wa kwa tɛ lo.

¹³ Ndo gã ko, mbi ndoguru ndo lo, mbi ndohɛ̃ ndo pɛnɔ hɛ̃ azi tɛ lo, mbi ndotɛnɛ ndo siɔ tɛnɛ na ili lo. Ko abɛ nga so ko, Gbia Nzapa ama vundu hɛ̃ mbi, na lo mɛ ya, ta mbi hĩnga ndo ye mɛ mbi ndoli ma, ta mbi ndoye ndo nga lo tɛ Yezo ma.

¹⁴ Gbia tɛ e Yezo Kristo ali nzɔ̃ bɛ tɛ lo ma wo ma hɛ̃ mbi, lo zi lege hɛ̃ mbi, la mbi ye lo tɛ lo, mbi ye nga lo.

¹⁵ Wa ĩ ba tɛnɛ ti biani mɛ azi zu alengbi ti yengɔ ni na be la kɔi lo mɛ: Yezo Kristo aga ndo ge le sese so songɔ awa lingɔ siɔ ye. Ko siɔ ye tɛ mbi la aɔ tɛ la zu.

¹⁶ Na lo ni la Nzapa ama vundu hɛ̃ mbi. Lo ye ya, Yezo Kristo afa ti ndo mbi hɛ̃ awa lingɔ siɔ ye mɛ siɔ ye tɛ mbi aɔ ndo tɛ la zu ya, ni na yɔngɔrɔ bɛ sĩ. Ko yɔngɔrɔ bɛ mɛ ndo lo na ni ndo mbi na sangɔ nguru bɛ azi mɛ na yengɔ lo tɛ lo, na luangɔ nga du ti kaka.

¹⁷ Nzapa mɛ ndole gbia buru na buru zu, lo mɛ kaka, lo mɛ ta andohũ lo ma, lo mɛ bo lo kɔi la Nzapa ko, azi atɔndɔ bɛ lo, agonda bɛ nga lo buru na buru ma ke! Seni la.

¹⁸ Timɔte nyi mbi, mbi zia atɛnɛ ko mbi tɛnɛ na yamba ti mɔ, ya mɔ pa ni hɛ̃ azi nga ma se ko ndo awa pangɔ nyɔ Nzapa apa na ni uzu na lo tɛ mɔ. Da bɛ mɔ na atɛnɛ ni, wa mɔ tiri nzɔ̃ to.

¹⁹ Ngbã bo na yengɔ lo tɛ Yezo Kristo, ngbã nga na vuru bɛ. Ambanga azi akɛ̃ ndo batangɔ bɛ la vuruni, ko na lo ni ko, lo yengɔ tɛ la akpi kpɔɔ.

²⁰ Imeneo na Alɛkizandrɛ nga na popo tɛ azi ni ko. Ko mbi zia la se na yamba ti Satana ya, ala hĩnga ya, ta ani lengbi ti gurungɔ Nzapa ma.