1 Tɛsalɔnikɛ 5 - Fana Ngbangɔ 1987

Ale e du Iɛ e ngɛ so kungɔ gangɔ tɛ Gbia Yezo

¹ Aya bua, adu lo ti ngoi, bere lo ti lá ko gbanda aye ni ko na singɔ ko, ta alengbi ya, asu hɛ̃ ĩ mbɛti na lo ni sungɔ ma.

² Ta sanga ma, ĩ nvɛni ĩ hĩnga nzɔ̃ni ya, ta e hĩnga lá mɛ gbanda Gbia adiri aga na ni ma. Lo ga gbanda na lá ni ko, nga ma se mɛ wa nzĩ ndoga na ni na bi, ko ta zo kɔi ndohĩnga ma.

³ Ngoi mɛ gbanda azi anɛ ya: “Kɔdɔrɔ kwɛ ngĩini, ta to nga da ma” ko, lá mɛ gbanda azi ato nda hũngɔ kota pɛnɔ la. Zo zu ahũ gbanda pɛnɔ. Pɛnɔ ni asi gbanda bo ngoi kɔi nga ma pɛnɔ ti gwa mɛ agbagbara ta ngɔ.

⁴ Aya bua, kanda tɛ ĩ ko, ta ĩ nga ma azi ko la ndodu na ya mbingo ma, ko ale ta lá ni ko agbagbara sɛ gbanda ĩ, nga ma se mɛ wa nzĩ ndogbagbara na azi ma.

⁵ Ta sanga ma, ĩ zu ĩ du azi mɛ ĩ ndodɔ nɔ na ya vuru ndo, nga na lɛ lá. Ta e du azi mɛ ndodɔ nɔ na bi, bere na ya mbingo ma.

⁶ Na lo ni ko, ale ta e la langɔ nga ma se tɛ azi mɛ ndɛ̃ ma. Kanda ale e du lɛ e ngɛ̃, ko e li nga ye na nyɔ kpɔ̃ ni.

⁷ Na bi la zo ndola langɔ, ko na bi nga la kana ndogbɔ̃ zo.

⁸ Kanda tɛ e ko, e ndodɔ nɔ na lá, ko ale e ndoli nga ye na nyɔ kpɔ̃ ni. Ale e ndongbã na yengɔ lo tɛ Yezo Kristo, ko ale e ndoyengbi nga. Ta sanga ma, se e li so ko, e du nga ma aturugu mɛ ayu bɔngɔ ti nwa so gbanzingɔ ya, ta ye abɔrɔ tɛrɛ ani ma. Ale e ndokpã nga bɛ e na ndo lá ko gbanda Nzapa aso e, ta sanga ma, se e li nga so ko, e du nga ma aturugu mɛ ayu kpɔtɔ ti nwa so gbanzingɔ ya, ta ye abɔrɔ li ani ma.

⁹ Ta Nzapa asara ndo e akpã ya, ni li ngɔnzɔ hɛ̃ e ma, kanda lo sara ndo e ya, Gbia tɛ e Yezo aso e.

¹⁰ Ta sanga ma, Yezo Kristo akpi ndo so e, ya e na ni e du ndoni kɔi. Bɛ adu ya e kpili ndo, bere adu ya, e dɛ gbanda lɛ e ngɛ̃ na lá ko gbanda Yezo Kristo adiri aga ko, e na lo e du gbanda ndoni kɔi.

¹¹ Na lo ni ko, ale ĩ sa nguru na bɛ afɔ̃ ĩ, nga ma se mɛ ĩ ndoli na ni gã.

Ndangba tɛnɛ

¹² Aya bua, azi mɛ ndoli kwa tɛ Nzapa so popo tɛ ĩ ko, ala la Gbia Nzapa akpã la ndo ĩ, so fangɔ ĩ na lege tɛ lo, nga so hangɔ ĩ na lo tɛ lo. Ko e gbɔ̃ gɛrɛ ĩ ya, ĩ tɔndɔ la.

¹³ Ĩ ye la na bɛ ĩ kɔi na lo kwa tɛ Nzapa mɛ ala ndoli. Ĩ du na mangbingɔ na popo tɛ ĩ.

¹⁴ Aya bua, e gbɔ̃ gɛrɛ ĩ ya, ĩ tisa azi mɛ ndokɛ̃ lingɔ kwa, ĩ sa nguru bɛ awa mbɛtɔ. Ĩ za azi mɛ ta na nguru ma, ĩ du na yɔngɔrɔ bɛ na ndo azi zu.

¹⁵ Ĩ du na kpengba le ya, se zo ali ĩ siɔni ko, ta ĩ gɛ̃ kula ni ma. Kanda ngoi zu ko, ĩ li kpengbani ya, ĩ li nzɔ̃ ye na popo tɛ ĩ, ĩ li nga ni tɛrɛ azi zu.

¹⁶ Ĩ du ngoi zu ha dengɔ bɛ,

¹⁷ ĩ vɔrɔ Nzapa ngoi zu,

¹⁸ alo zu mɛ asi na ĩ ko, ĩ hɛ̃ sia kɔli hɛ̃ Nzapa. Ĩ azi mɛ ĩ na Yezo Kristo ĩ ti bo kɔi ko, í ba aye mɛ Nzapa aye ya, ĩ li la.

¹⁹ Ta ĩ gbanzi Tɔrɔ Santo ya, lo zia lingɔ kwa ka ya bɛ ĩ ma.

²⁰ Ta ĩ samana na azi mɛ ndopa nyɔ Nzapa ma.

²¹ Tɛnɛ zu mɛ azi ndotɛnɛ ko, ĩ gi nda ni kpa. Se ĩ hũ ya, adu nzɔ̃ tɛnɛ mɛ alo ka tɛ Nzapa ko, ĩ bata ni ka bɛ ĩ.

²² Ko ta ĩ li siɔ ye bɛ gbɔ ma.

²³ Nzapa mɛ ndoli ya bɛ azi adu pii ko, ali bɛ ya, bɛ ĩ ati vuruni nga ma se tɛ lo ma ke! Lo bata bɛ du tɛ ĩ, na tɔrɔ tɛrɛ ĩ, na bɛ ĩ, nga na tɛrɛ ĩ zu ma ke! Lo li bɛ so ya, na ngoi mɛ gbanda Gbia tɛ e Yezo Kristo adiri aga ko, ta lo bela ĩ na lo ye kɔi ma ke!

²⁴ Nzapa mɛ ndoili ĩ ya, ĩ du azi tɛ ni ko, lo na lingɔ so biani, ta sanga ma, ta lo ndoweza ló ma.

²⁵ Aya bua, ĩ sambela nga na lo tɛ e.

²⁶ Ĩ balangbi tɛrɛ ĩ nzɔ̃ni na se tɛ ayata awa Kristo.

²⁷ Mbi gbɔ̃ gɛrɛ ĩ na ili Gbia ya, ĩ di mbɛti olo hɛ̃ azi tɛ Nzapa zu mɛ ndodu ka kɔdɔrɔ tɛ ĩ.

²⁸ Gbia tɛ e Yezo Kristo ali bɛ nzɔ̃ bɛ hɛ̃ ĩ ma ke!