1 Tɛsalɔnikɛ 4 - Fana Ngbangɔ 1987

Se li ye mɛ ndode bɛ Nzapa

¹ Aya bua, e na kɔngɔ nda mbɛti tɛ e so mɛ: ndo uzu ko, e ha ĩ na se li ye mɛ ndode bɛ Nzapa, ko e hĩnga ya, ĩ ndodu nga so biani. Ko na olo ko, e gbɔ̃ gɛrɛ ĩ ka ka ka na ili Gbia Yezo ya, ĩ ti du nzɔ̃ni aɔ ndo ti uzu.

² Ĩ hĩnga tɛnɛ tɛ Gbia Yezo mɛ ndo e ha na ĩ.

³ Ĩ ba ye mɛ Nzapa ndoye lo mɛ: ale ĩ ndodu na vuru bɛ, alengbi ya, ta ĩ li siɔ ye ti kamɛnɛ ma.

⁴ Ale zo kɔi kɔi na popo tɛ ĩ adu na wali, ko lo ngbã ndoni kɔi na wali ni, nga ma se mɛ bɛ Nzapa ndode na lo ni, ko se azi ahũ ko, ahĩnga ya, dungbingɔ tɛ la adu nzɔ̃ni.

⁵ Apaganɔ adu azi mɛ ta ahĩnga Nzapa ma. Ala ndongbã ndoni kɔi na awe la bo na lo ti kota siɔ gwɛ̃ ti tɛrɛ la. Ko ta ĩ li tɛ ĩ nga ma se tɛ la ma.

⁶ Na ndo atɛnɛ olo tɛ kɔli na wali ko, ale ta zo kɔi ali ye siɔni tɛrɛ ayata lo awa Kristo, bere ahanda la bɛ gbɔ ma. E pia ndo e pa tɛnɛ ni ko hɛ̃ ĩ, e tisa ndo nga ĩ kpengbani na lo ni ya: Gbia ahɛ̃ gbanda etumbu hɛ̃ azi mɛ ndoli gi tɛrɛ asiɔ ye ni ko.

⁷ Ta sanga ma, ta Nzapa aili ndo e ya, e li siɔ ye ti kamɛnɛ ma, kanda lo ili ndo e ya, e du na vuru bɛ.

⁸ Ndani la zo ko la akɛ̃ mangɔ tɛnɛ olo ko, ta adu ya, lo kɛ̃ zo ma, kanda lo kɛ̃ Nzapa mɛ ahɛ̃ ĩ Tɔrɔ Santo.

⁹ Wa na lo ti yengbingɔ tɛ ĩ nga ma se tɛ zo na nyita lo ko, ta alengbi ya, asu mbɛti hɛ̃ ĩ sungɔ na lo ni ma. Ĩ nvɛni ĩ ma ndo se mɛ Nzapa apa na ni ya, ale ĩ ndoyengbi.

¹⁰ Biani, se mɛ ĩ ndoye nga na awa Kristo zu mɛ ndodu ka sese ti Masedoanɛ la. Kanda e gbɔ̃ gɛrɛ ĩ ya, ĩ ti yengbi aɔ ndo ti uzu.

¹¹ Ko ĩ li kpengbani ya, ĩ du na mangbingɔ ka popo tɛ ĩ, ĩ́ kpa lɛ ĩ bo na ndo aye tɛ ĩ nvɛni, ĩ́ li kwa na ti ĩ nvɛni, wa ĩ kã na tɛrɛ ĩ, nga ma se mɛ ndo e pa na ni hɛ̃ ĩ.

¹² Se ĩ li nga so ko, azi mɛ ta awa Kristo ma na tɔndɔngɔ ĩ, ko ta ĩ na yɔngɔ ye ka ti azi ma.

Gangɔ tɛ Gbia Yezo

¹³ Aya bua, e separa ya, ĩ́ hĩnga ye mɛ gbanda na singɔ na azi mɛ akpili, so ĩ du na vundu nga ma se tɛ azi mɛ ndɛ̃ mɛ ta ndokpã bɛ la na ndo gangɔ tɛ Yezo ma.

¹⁴ E hĩnga ya, Yezo akpi ndo, la lo so. Se mɛ nga ĩ hĩnga ya, azi mɛ ndo aye lo tɛ Yezo, la ala kpili ndo we ko, Nzapa aso gbanda la ya, ala na Yezo adu ndoni kɔi la.

¹⁵ Tɛnɛ mɛ e na tɛnɛngɔ na olo ko, Gbia nvɛni ndo la aha ni. Tɛnɛ ni lo mɛ: lá ko gbanda Gbia Yezo adiri aga ko, e azi mɛ gbanda e dɛ lɛ e ngɛ̃ na ngoi ni ko, ta e ɔ gbanda uzu tɛ azi mɛ ndo akpili gã bɛ gbɔ ma.

¹⁶ Na lá ni gbanda ko, azi ama gbanda Nzapa so ndohɛ̃ nyɔ mboro mboro hɛ̃ aangelo, azi ama gbanda legɔ̃ gbia tɛ aangelo, azi ama nga gbanda mbana tɛ Nzapa so ndokpale. So pɛni, Gbia nvɛni alo gbanda ka yayu azu. Azi mɛ ndo aye lo tɛ lo, la ala kpili ndo we ko, ala so gbanda kɔzoni.

¹⁷ Wa e azi mɛ gbanda e dɛ lɛ e ngɛ̃ na ngoi ni ko, Nzapa aya e gbanda na la ndoni kɔi ka ya da baba ya, e tengbi na Gbia Yezo ka lɛ mbo. Ko e na lo e du gbanda ngoi zu ndoni kɔi.

¹⁸ Na lo ni ko, ĩ tɛnɛ tɛnɛ ni ko na popo tɛ ĩ, wa nguru agbɔ̃ afɔ̃ ĩ.