1 Tɛsalɔnikɛ 3 - Fana Ngbangɔ 1987

^1-2 Ngoi mɛ ndo ta e ti ndoma pa tɛ ĩ ma ko, e ha gbengɔ bɛ e gba, la e to Timɔte nyita e wa Kristo ka tɛ ĩ. Ko na pɛ nyi ngoi ndo ko, e ngbã tɛ e na kunɛ e ge kɔdɔrɔ ti Atɛnɛ. Ĩ hĩnga ya, e na Timɔte e ndoli kwa tɛ Nzapa, e ndopa nga Nzɔ̃ Pa tɛ Yezo Kristo. E to ndo lo hɛ̃ ĩ ya, lo sa nguru bɛ ĩ, lo wa ĩ, ya ĩ ngbã na yengɔ lo tɛ Yezo Kristo,

³ wadila ta zo kɔi na popo tɛ ĩ adɔ lege tɛ Gbia Yezo azia, na lo ti apɛnɔ mɛ ĩ ndohũ ma. Ta sanga ma, ĩ nvɛni ĩ hĩnga ya, Nzapa apia ndo apa ya, ale e awa Kristo e hũ gi tɛrɛ apɛnɔ ko.

⁴ Ngoi mɛ ndo e dɛ ka popo tɛ ĩ ko, e pia ndo e pa hɛ̃ ĩ ya, azi na hɛ̃ngɔ e pɛnɔ. Ko e hũ nga ndo pɛnɔ ni biani, nga ma se mɛ ĩ hĩnga na ni.

⁵ Mbi ha gbengɔ bɛ mbi gba, la mbi to Timɔte ka tɛ ĩ ya, lo ba bere ĩ dɛ bo na yengɔ lo tɛ Yezo Kristo kpɔ! Mbi ndokpe ndo ya, bere Satana ka ahanda ĩ, ko kwa tɛ e ka ati gɛgɛrɛ.

⁶ Kanda na olo ko, Timɔte alo ka tɛ ĩ adiri ge tɛ e, ko lo pa anzɔ̃ pa tɛ ĩ hɛ̃ e ya, ĩ dɛ bo na yengɔ lo tɛ Yezo Kristo kpɔ, ko ĩ ndoyengbi nga. Lo pa nga ya, ĩ ndoda bɛ ĩ na e ngoi zu, ko bɛ ĩ ndode na lo tɛ e. Lo pa nga ya, ĩ ndosepara bangɔ e fani mɛ ndɛ̃, nga ma se mɛ e ndosepara nga bangɔ ĩ.

⁷ Aya bua, e ndohũ ndo pɛnɔ sĩ. Kanda ngoi mɛ Timɔte ĩ lo ka tɛ ĩ ĩ diri, lo ĩ pa nga pa tɛ ĩ hɛ̃ e ko, nguru ti gbɔ̃ e. Lo yengɔ tɛ ĩ la asa nguru bɛ e,

⁸ ta sanga ma, na olo ko, adu nga ma e ti lua fana du, na lo mɛ ya, ĩ dɛ bo na yengɔ lo tɛ Gbia kpengbani.

⁹ Ta e hĩnga se mɛ e lengbi ti hɛ̃ngɔ na sia kɔli hɛ̃ Nzapa, na lo kota dengɔ bɛ mɛ ĩ hɛ̃ e ka gbɛlɛ lo ma!

¹⁰ Bi na lá, e ndohũnda Nzapa na bɛ e kɔi ya, lo zi lege hɛ̃ e, e nvɛni e diri e nɔ e ba ĩ, ko e ha ĩ na ye mɛ ta ĩ dɛ ĩ hĩnga ma, wa lo yengɔ tɛ ĩ ati kpengbani buai.

¹¹ To e Nzapa nvɛni, na Gbia tɛ e Yezo Kristo alɛkɛ bɛ lege hɛ̃ e, wa e nɔ e ba ĩ ma ke!

¹² Gbia tɛ e Yezo Kristo ali bɛ ya, ĩ ti ĩ yengbi aɔ ti uzu, ko ĩ ye nga azi mɛ ndɛ̃ zu aɔ ndo ti uzu ma ke! Lo li bɛ nga ya, ĩ ye la, nga ma se mɛ e ndoye na ĩ ma ke!

¹³ Lo na lingɔ so ya, ni kpengba na lo yengɔ tɛ ĩ, wa na ngoi mɛ gbanda Gbia tɛ e Yezo na azi tɛ lo zu adiri aga ko, bɛ ĩ ati vuruni, ko ta Nzapa abela nga ĩ na lo ye kɔi ma.