1 Tɛsalɔnikɛ 2 - Fana Ngbangɔ 1987

Kwa mɛ Polo ali ka Tɛsalɔnikɛ

¹ Aya bua, ĩ nvɛni ĩ hĩnga nzɔ̃ni ya, ta e nɔ ndo ka tɛ ĩ sanga ma.

² Ĩ hĩnga ya, uzu ti e singɔ ka tɛ ĩ ko, aguru ndo e, agia ndo nga e ka kɔdɔrɔ ti Filipɛ. Abɛ ambanga azi akɛ̃ ndo e ka ka ka ko, Nzapa ahɛ̃ ndo e nguru ya, e pa Nzɔ̃ Pa tɛ ni hɛ̃ ĩ.

³ Ngoi mɛ ndo e ndopa hɛ̃ azi ya, ala ye lo tɛ Nzapa ko, ta tɛnɛ ti nvɛnɛ ndo la e ndopa, bere e ndo na siɔ dangɔ bɛ ma. Ta e ndogi ndo nga kɔdɛ ya, e handa zo kɔi ma.

⁴ Kanda ngoi zu ko, e ndopa ndo tɛnɛ nga ma se mɛ bɛ Nzapa aye. Ta sanga ma, lo hũ ya e abɛta azi, la lo zia Nzɔ̃ Pa tɛ lo na yamba ti e ya, e pa ni. E tɛnɛ ndo tɛnɛ so dengɔ na bɛ Nzapa mɛ ahĩnga dangɔ bɛ tɛ e, kanda ta e tɛnɛ ndo ni so dengɔ na be azi ma.

⁵ Ĩ hĩnga nzɔ̃ni ya, ta e tɛnɛ ndo nzɔ̃ tɛnɛ fani kɔi ya, e kara na ĩ lɛkpɛ lɛkpɛ ma, ta e tɛnɛ ndo nga tɛnɛ kɔi ya, ĩ hɛ̃ e ye na lo ni ma. Nzapa nvɛni ahĩnga ya, tɛnɛ tɛ e adu na seni.

⁶ Ta e tɛnɛ ndo tɛnɛ ya, ĩ gonda e, bere azi mɛ ndɛ̃ agonda e na lo ni ma.

⁷ Ti mbiri mbiri ko, e lengbi ndo ti mungɔ tɛrɛ e ndo ĩ nga ma agbia, na lo mɛ ya, e awa pangɔ kwa tɛ Kristo. Kanda e ndo adede azi, nga ma se tɛ ta ayangambi.

⁸ Wa so fangɔ ya, bɛ e aye ndo ĩ sĩ ko, ta e ye ndo bo pangɔ Nzɔ̃ Pa tɛ Nzapa hɛ̃ ĩ ma, kanda e ye ndo nga ya, e ka tɛrɛ e na lo tɛ ĩ. Ta sanga ma, ĩ ti ndo nga ma afɔ̃ e ti kpɔ̃ bɛ e!

⁹ Aya bua, e da be e ya, ta bɛ ĩ ali na se mɛ ndo e li na kpengba kwa ma. Ta bɛ ĩ ali nga na kota nzɛ̃ngɔ mɛ ndo e nzɛ̃ ma. Ngoi mɛ ndo e ndopa Nzɔ̃ Pa tɛ Nzapa hɛ̃ ĩ ko, e ndoli ndo kwa bi na lá ya, ta e yɔ ye ti ĩ ma.

¹⁰ Ĩ hĩnga ndo ye mɛ e li, ko Nzapa ahĩnga ndo nga ni. Ngoi mɛ ndo e dɛ ka popo tɛ ĩ ko, sé du tɛ e ndo nzɔ̃ni, nga bɛtani, ko ta azi abela ndo e ma.

¹¹ Ĩ hĩnga ya, e li ndo ye tɛrɛ ĩ kɔi kɔi zu nga ma se mɛ to ayangambi ndoli na ye tɛrɛ aya lo.

¹² E ndosa ndo nguru bɛ ĩ, e ndopa ndo nga hɛ̃ ĩ kpengbani ya, sé du tɛ ĩ adu nga ma se mɛ Nzapa ndoye. Lo la lo ndoili ĩ ya, ĩ si ka Kɔdɔrɔ Gbia tɛ ni, ko ĩ lua nga ndima kai.

¹³ Ĩ ba nga nda mɛ e ndohɛ̃ sia kɔli hɛ̃ Nzapa ngoi zu na lo tɛ ĩ lo mɛ: ngoi mɛ ndo e pa na tɛnɛ tɛ Nzapa hɛ̃ ĩ ko, ĩ ma ndo ni, ĩ ye ndo nga lo ni. Ko ta ĩ ye ndo lo ni ya, adu tɛnɛ mɛ alo ka tɛ azi ma, kanda ĩ ye ndo lo ni ya, adu tɛnɛ mɛ alo ka tɛ Nzapa. Biani, seni bo la. Ko tɛnɛ ni ndoli kwa ka ya bɛ ĩ awa Kristo.

¹⁴ Aya bua, awa Eklezia tɛ Nzapa mɛ ka sese ti Yudea, ala mɛ ndo aye lo tɛ Yezo Kristo ko, azi ahɛ̃ ndo la pɛnɔ, ko ngi lɛ pɛnɔ ni la azi ahɛ̃ nga ĩ. Azi ti kɔdɔrɔ tɛ ĩ ahɛ̃ ndo ĩ pɛnɔ, nga ma se mɛ ndo Ayuda ahɛ̃ na pɛnɔ hɛ̃ awa Eklezia ti Yudea.

¹⁵ Ambanga Ayuda akpɔ ndo awa pangɔ nyɔ Nzapa, ambanga aho Gbia Yezo Kristo, ko ambanga mɛ ndɛ̃ ahɛ̃ ndo nga e pɛnɔ. Ta bɛ Nzapa ndode na lo ye mɛ ala ndoli ma ala du awa kɛ̃ngɔ azi kwɛ zu!

¹⁶ Ala ndogi kɔdɛ ti gbanzingɔ e ya, azi mɛ ta Ayuda ma ko, ta e pa tɛnɛ tɛ Nzapa hɛ̃ la ma, so Nzapa aso azi ni ko. La siɔ ye tɛ la ndobu gi bungɔ na ndo angbina siɔ ye mɛ ndo ala ya lingɔ ni gã. Ko Nzapa apia ndo ali ngɔnzɔ hɛ̃ la wɛ.

Polo asepara diringɔ banga awa Kristo ti Tɛsalɔnikɛ

¹⁷ Aya bua, na olo ko, mbi na tɛnɛngɔ tɛnɛ na lo tɛ e. Na pɛ nyi ngoi mɛ ndo e kangbi na ni ko, e na kota gwɛ̃ ti diringɔ bangɔ ĩ. E kangbi ndo bo tɛrɛ e, kanda bɛ e adɛ ndo ĩ. Nda mɛ e ndoli kpengbani ya, e diri e nɔ e ba ĩ la.

¹⁸ Biani, e ye ndo diringɔ ka tɛ ĩ. Mbi Polo nvɛni mbi ndogi ndo kɔdɛ fani sĩni ya, mbi diri mbi nɔ ka tɛ ĩ, kanda Satana agbe ndo lege ni.

¹⁹ E ye diringɔ bangɔ ĩ, na lo mɛ ya, na lo tɛ ĩ la e ndokpã bɛ e na ndo mbana gɛrɛ mɛ gbanda Nzapa ahɛ̃ e. Ĩ la ĩ ndohɛ̃ e dengɔ bɛ. Ĩ la ĩ du azi mɛ ĩ ndofa ya, kwa tɛ e nzɔ̃ni. Ko na lo tɛ ĩ ko, e na sabangɔ na ngoi mɛ gbanda Gbia tɛ e Yezo adiri aga.

²⁰ Biani, e ndogonda Nzapa, ko bɛ e ndode nga na lo tɛ ĩ!